Mientras Philip Elhage ta preparando pa subi un escenario internacional na e Olimpiada di Paris 2024, e ta carga no solamente su ambicion personal, pero tambe e speransa di Aruba pa sobresali den e disciplina unico aki.
Compitiendo den e deporte di tiro cu ta di 10 Meter Air Pistol y bou bandera di Aruba, e trayecto di Philip ta alinea cu dedicacion y resiliencia. Naci den un famia profundamente envolvi den e mundo di tiro, su caminda a keda forma tanto pa herencia como pa su pasion personal.
"Mi tio(qepd) tabata un ‘Gunsmith’ y importador di arma y munishon na Corsow. E tabata un fanatico di tiro Olimpico y a sigura cu nunca mi tabata falta ekipo pa por a practica e deporte di tiro. Varios otro miembro di mi famia tabata competi y tambe tabata fungi como entrenador den tiro Olimpico. Despues cu mi a cumpli 18 aña, nan a invitami pa purba y asina mi biahe den e deporte aki a cuminsa. Tabata un decision facil pa sigui y mira te ki punto mi por a yega. Mi tabatin e hendenan corecto rond di mi pa cuminsa, no solamente miembronan di famia pero tambe hendenan di e comunidad cu ta practica e deporte di tiro y kendenan tabata duna sosten na nos grupo nobo cu tabata cuminsando na mes momento.
E impacto profundo di atende e ceremonia di apertura di e Olimpiada na Atenas 2004 na television hunto cu su compañeronan di universidad tabata un momento crucial pa Philip. "Nos tabata biba den e campus di nos universidad. Tabata 2004 y mi no tabata tumando e deporte di tiro na serio. Pero ora mi a wak e ceremonia di habrimento aki, mi tabata sa kico mi meta lo bira pa e siguiente 4 añanan."
Nota: Corsow, bou e regla actualnan di IOC no por a solicita pa un Comite Olimpico Nacional reconoci. Como resultado, atletanan di Corsow tin e opcion pa competi pa Hulanda of bou di e bandera di Aruba, cu tin su propio Comite Olimpico Nacional reconoci. Esaki ta permiti atletanan di Corsow pa toch participa na e Weganan Olimpico, aunke no ta bou nan propio bandera natal.
Despues di representa Antiyas Hulandes na 2008 y awor competiendo bou di e bandera di Aruba, Philip ta expresa nada mas cu gratitud y orguyo. "Nos tabata bay Aruba hopi bes pa bishita famia, pues semper mi tabatin un sentimento cu Aruba ta 'mi cas leu for di cas'. Mi ta realmente aprecia e oportunidad cu Aruba a dunami pa sigui competi den mi deporte. Pa esaki, mi lo ta semper gradicido y lo duna tur mi esfuerso den e competencianan."
Pa esnan cu no ta familiar cu deporte di tiro, Philip ta splica e diferente disciplinanan y loke ta distingui rifle, pistola, y un shotgun.
Pistol -> 10 Meter air pistol ta un disiplina pa tanto homber- y muhernan. Aki e tiradonan ta tira riba e obhetivo (target) for di 10 meter leu, c’un air pistol. E meta ta pa alcansa e di 10 Ring mas tanto biaha cu por. Esaki ta e tamaño di 1 cen di Corsow.
Pistol -> Sport Pistol (solamente pa muhernan) ta keda tira for di 25 meter riba un obhetivo (target) mas grandi, e tin 2 parti; 1- e etapa de precision y e 2- e ‘duel stage’. Den e etapa di precision bo tira 6 serie di 5 turno di tiro den 300 segundo, y den e ‘duel stage’ bo tin 6 serie di 5 turno di tiro unda e tirado ta mantene su brasa na un angulo di 45° pa 7 segundo despues tin 3 segundo pa hisa y tira un turno di tiro mas.
Pistol Rapid Fire ta keda tira for di 25 meter y ta un disciplina solamente pa hombernan. E tin 3 etapa. Etapa 1 ta 4 serie di 5 tiro (1 tiro pa 1 cada obehtivo (target) den 8 segundo, etapa 2 ta mescos cu etapa 1 pero den 6 segundo, y etapa 3 ta den 4 segundo.
Rifle tin 10M air rifle, ta mescos cu pistol pero e number 10 ta referi na e tamaño di e punta di un pin.
Y e otro disciplina di rifle ta di 3 posicion unda e tiradonan ta tira den posicion para, riba rudia y boca abou for di 50 meter leu riba un obehtivo (target) mas grandi.
Shotgun -> Den 'trap shooting', e tirado ta tira un disco di klei for di un bunker, e disco ta biaha na velocidadnan y den diferente direccionnan sin orden specifico, for di un bunker.
Skeet -> E tirado mester tira 2 disco di klei cu ta bin di banda robes y banda drechi. (e tirado no por pone e shotgun na su schouder di antemano)
E deporte di tiro ta exigi un inmenso precision y enfoke mental. "Mi a purba hopi entrenamentonan mental, pero na e momento mes, loke mi ta traha riba dje pa hacimi mas fuerte ta mi proceso entre cada tiro. Esaki ta yudami pa keda liber di pensamentonan cu por strobami y asina mi por keda 100% enfoka mentalmente."
Mi a practica hopi deporte den mi bida, y mi por comprende pakico hende por mira tiramento diferente of no ta kere cu e ta un deporte. Ora mi compara un tirador di pistol c’un pitcher di baseball, e pitcher ta menos statico c’un tirador y e parti fisico di un pitcher ta exigi hopi mas cu tirador, pero e parti mental di pitcher y tiramento ta mescos. Incluso e ritmo y rutina entre cada pitcheo. E finalnan den tiramento ta rekeri un fortaleza mental halto compara cu, por ehempel, tira un 'penalty' den futbol.
Nos mester haci esaki te cu 24 biaha den un final.”
"Desgraciadamente, e realidad ta cu tiro olimpico a perde su popularidad e ultimo 10 añanan. Na Aruba, Boneiro, y Corsow, nos tin solamente un 'air pistol range' cu ta na Corsow pero cu ta tambe outdated. Sinembargo, mi ta trata na pensa esaki como un ventaha. Si mi por haci bon trabou riba e range ey, mi lo ta bon riba un mihor range."
Un dia tipico di entrenamento pa Philip ta rigoroso y bon structura. "Dependiendo riba e skema di entrenamento, mi lo core e mainta of despues di tiro. Mi ta pasa rond di 3 ora na e 'range' mainta, ‘warming up’, tira, analisa e entrenamento, y haci notanan pa e siguiente dia. Despues di e tempo na 'range', mi ta busca mi yiu for di scol, come lunch cu e famia, revisa mi notanan, 'dry fire' pa e siguiente dia di entrenamento y bolbe bay core si mi no a core e mainta ey."
Pa sigura rendimento bou di presion, Philip ta enfatisa e importancia di entrenamento pa consistencia. "Tiramento t'asina simpel, toch nos ta haci’e hopi complica. Ningun hende a yega di tira un score perfecto di 600. Awor cu mi ta mas bieu mi a siña cu no tur tiro por ta un 10. Algun di e tiro bon lo ta 9. Pero den entrenamento, nos mester trata di ta mas cerca di perfeccion cu ta posibel, asina ora nos yega na e momentonan aki, e chensnan ta na nos fabor. Si mi sa cu mi a haci tur loke mi por den entrenamento y den e competencia, mi lo ta satisfecho.”
Cu su mira awor riba Olimpiada 2024, Philip ta bisa cu e ta cla. "Personalmente, mi kier mantene mi proceso consistente di cuminsamento te fin y keda enfoka mentalmente. Pa Aruba, mi lo semper representa e bandera Arubano cu gran respet y aprecio, haciendo mi esfuerso pa por ta e mihor ehempel."
Philip ta spera pa laga un legado duradero den e mundo di deporte di tiro, specialmente pa generacionnan futuro na Aruba y Caribe.
"Cu e facilidadnan y programanan corecto, mi ta kere cu nos por logra hopi exito den e deporte di tiro. Mi soño ta pa por tin un scol di tiro dedica na e disciplina Olimpico aki, specialmente air pistol."
Un momento soprendente durante un competencia?
"Na Martinique, durante un evento di 50 Meter pistol, un tarantula a subi riba mi mesa. Nan a kita e tarantula, y eventualmente mi a gana e di 2 lugar."
Bo tin algun ritual prome di competencia?
"Semper mi ta tira mea extra den mi tas di tiro. Si mi tira bon, mi ta laga nan pa futuro competencianan. Si no, mi ta cambia nan."
Si bo por a competi den cualkier otro deporte Olimpico djis pa ‘fun’ cua e lo ta?
"Speed Skating (winter) of Track Cycling (track time trial).
Nan ta deporte explosivo c’un margen chikito pa eror y esaki ta fascinami."
Kico ta e cos mas inespera cu bo ta carga cu bo den bo tas?
"Un mini rubber duck. Mi ta kere cu mi yiu a pone den mi tas y mi a djis lage eyden. E tin añanan den mi tas."
Bo tin un amuleto di suerte pa competencianan?
"Si, mi hanger."
Comite Olímpico Arubano (COA) ta e organisacion deportivo nacional di Aruba y miembro di Comite Olimpico Internacional (COI).
Funda dia 21 di augustus 1985, despues cu Aruba a haya su status autonomo den Reino Hulandes, COA a bira e Comite Olímpico Nacional (CON) pa Aruba. E tabata separa for di Comite Olimpico di Antiyas Hulandes (NAOC) cu 14 federacion di deporte, fundacion, inclui baseball, atletismo, y basketball.
COA ta reconoci oficialmente pa COI desde 1986, cu su mision pa desaroya y proteha e Movimiento Olímpico na Aruba. E prome biaha cu atletanan Arubano a participa den e Olimpiada tabata na e Wegnan di Seoul na 1988.
COA a cuminsa opera den stadion Guillermo Prospero Trinidad na Oranjestad for di 1994 y a muda pa un sede nobo na Vondellaan 27 na 2019. E facilidad nobo a keda inaugura dia 11 di Maart 2023 despues di un renovacion total. COA ta afilia cu varios organisacion deportivo internacional, inclui ANOC, PANAM Sports, ODESUR, ODECABE, y CANOC.
Built with Shorthand