For di e laman di Aruba pa e awanan prestigioso di Paris 2024, Ethan Westera a nabega den varios situacion yena di desafio pa logra clasifica y duna presencia na Aruba representando Comite Olimpico Arubano den Weganan Olimpico 2024 na Paris den categoria di Sailing.
Naci den un famia cu lasonan profundo den deportenan acuatico, e caminda di Ethan den sailing por bisa, tabata algo ‘di mes’. "Mi a nace practicamente na lama. Semper mi a sinti mi mes cerca di lama y mi no conoce ningun otro manera di biba y/of di entrena. Mi ta kere cu simplemente mi ta stima loke mi ta haci y mi ta gusta e libertad cu mi tin pa haci’e.”
E deporte di 'sailing', hopi liher, a domina e atencion di Ethan, superando su otro esfuersonan atletico poniend’e riba un caminda pa competencianan internacional den 'sailing'. Cu e legado di su tata den windsurfing competitivo y e spirito aventurero di su abuelo tambe riba lama, e tabata destina cu Ethan lo adopta igualmente, e pasion p'e deporte 'ki tambe.
Ethan a logra un medaya di plata na e Weganan Panamericano (Santiago 2023), un logro cu e ta aprecia profundamente. "Tabata un mescla di emocion, pero logrando un medaya di plata y cualifica pa e Olimpiada di Paris. E tabata un momento di orguyo.”
E bientonan consistente y clima calido di Aruba ta haci’e un di e lugarnan ideal pa entrenamento pa 'sailors' for di tur caminda di mundo. "Nos a hasta 'host' e ekipo Hulandes pa nan entrenamentonan den winter na Aruba," Ethan ta conta, enfatisando e condicionnan di clase mundial di Aruba pa e deporte 'ki.
Sinembargo, apesar di tin e tereno perfecto pa entrena, toch e deporte por trece desafionan cune. Esaki a pasa tambe na 2022 ora c’un lesion severo a pone e resistencia di Ethan na prueba. "E hecho di no por a haci loke mi ta stima pa lunanan pa motibo di mi lesion, tabata algo hopi duro p'ami. Pero mi a keda motiva door di concentra riba mehoracionnan chikito, cada dia," e ta splica.
“Un dia tipico di mi entrenamento aworaki ta cuminsa cu mi ta lanta pa 8’or di mainta, come desayuno despues mi ta 'stretch' pa 10 minuut y bay gym. Despues di gym, mi ta bay bek cas pa come cuminda di merdia. Despues mi ta bay club pa algun entrenamento intensivo riba awa. Despues di entrenamento nos tin un 'debriefing' sigui pa mas 'streching' atrobe y despues come cena. Despues mi ta bay drumi pa haci tur cos atrobe di nobo, e siguiente dia.”
E momento cu el a cualifica pa Olimpiada tabata ‘bittersweet’ realmente. Na prome instante, e tabata un sentimento fastioso debi cu el a perde e medaya di oro na e Weganan Panamericano. Sinembargo, hopi liher el a realisa cu su soño Olimpico a keda logra cu su medaya di plata.
Mientras e Olimpiada di Paris ta yegando cerca, e preparacionnan di Ethan ta intensifica mas y mas. E tin tres luna caba na Francia, pa refina su tecnica- y strategianan. "P’ami, e ta tur cos of nada. E ultimo luna di mi entrenamento ta pa refina e detayenan y asina yega na e Olimpiada fresco y cla pa loke ta bin," e ta bisa.
E ta determina pa usa su velocidad y consistencia contra e mihornan di mundo.
Kico lo ta bo bentaha mas grandi den Olimpiada Paris?
“Mi ta sinti cu mi tin tur cos necesario pa competi contra e paisnan grandi. Mi consistencia y enfoke durante e siman lo ta mi bentaha. Velocidad lo ta un di e yabinan di mas grandi cu bo mester tin den e Olimpiadanan y honestamente mi ta pensa cu e top 15 atletanan tin esey.
Den nos siman di 'sailing', e ultimo dia (e careda pa medaya) lo ta esun cu ta bay dicidi bo resultado. Asina ta cu, e ultimo dia bo mester drenta c’un ‘killer mentality’, pero toch alerta pa no exagera y cansa tempran.”
E apoyo di su mayornan tabata crucial den su trayecto deportivo desde su 9 aña, te cu awor. "Mi mama ta inspirami pa soña, mientras mi tata ta tene mi pia riba suela," Ethan ta comparti. E ta spera pa inspira un generacion nobo na Aruba, cu e meta pa eleva e cultura deportivo local na nivelnan elite y internacional, mas cu ta posibel. Mirando p’adilanti cu wowo fiho riba Paris, e futuro di Ethan den sailing ta apenas un buki habri, cu paginan blanco pa keda yena.
"Haci deporte pasobra bo ta stim’e, rodona bo mes c’un ekipo di apoyo, y semper busca felicidad den e biahe aki"
Si bo tabata por a bira e holoshi, cu ken lo bo kier competi cune awe den sailing?
"Cu mi tata bek den su dianan competitivo."
Cual ta un confusion comun di hopi hende riba 'sailing'?
"Hende ta pensa cu sailing ta kitesurfing of surfing. Nan ta keda sorprendi cu nos ta uza tanto bela como un board!"
Tin algun ritual cu bo ta haci prome di cada careda/competencia?
"No tin ritual p’ami."
Bo ta carga un amuleto di suerte durante competencianan?
"Recientemente mi a pone un tattoo na memoria di mi abuelo cu a fayece e aña ‘ki. Mi ta sinti cu e ta cumi asina durante e competencianan."
Bo ta papia cu bo mes ora bo ta competi?
"Generalmente no, y si mi ta haci’e, generalmente ta algo ‘no bon’ ;-)
Comite Olimpico Arubano (COA) ta e organisacion deportivo nacional di Aruba y miembro di Comite Olimpico Internacional (COI).
Funda dia 21 di augustus 1985, despues cu Aruba a haya su status autonomo den Reino Hulandes, COA a bira e Comite Olimpico Nacional (CON) pa Aruba. E tabata separa for di Comite Olimpico di Antiyas Hulandes (NAOC) cu 14 federacion di deporte, fundacion, inclui baseball, atletismo, y basketball.
COA ta reconoci oficialmente pa COI desde 1986, cu su mision pa desaroya y proteha e Movimiento Olimpico na Aruba. E prome biaha cu atletanan Arubano a participa den e Olimpiada tabata na e Weganan di Seoul na 1988.
COA a cuminsa opera den stadion Guillermo Prospero Trinidad na Oranjestad for di 1994 y a muda pa un sede nobo na Vondellaan 27 na 2019. E facilidad nobo a keda inaugura dia 11 di Maart 2023 despues di un renovacion total. COA ta afilia cu varios organisacion deportivo internacional, inclui ANOC, PANAM Sports, ODESUR, ODECABE, y CANOC.
Built with Shorthand