Aruba ta pone su paso firme riba e escenario mundial di deporte cu su participacion den e Weganan Olimpico di Paris 2024. E Comite Olimpico Arubano (COA) a tuma un papel crucial pa sigura cu Aruba ta visibel na e evento deportivo mas grandioso di mundo. For di Aruba su debut na 1988, Aruba a participa den tur Weganan Olimpico di zomer, cu representacionnan yena di orguyo y determinacion.

Despues di separacion di Antias Hulandes na 1986, Aruba a competi pa prome biaha como pais na e Weganan Olimpico di Seoul, Sur Korea na 1988. Desde 1952 te cu 1984, atletanan Arubano tabata competi como parti di Antias Hulandes. Cu e formacion di Comite Olimpico Arubano na 1985 y su reconocimento for di Comite Olimpico Internacional na 1986, Aruba a bira un nacion c'un Comite Olimpico Nacional reconoci den e mundo Olimpico. E reconocimento aki ta hopi special, paso e ta duna Aruba e derecho pa participa na no solamente na Weganan Olimpico sino tambe na otro Weganan manera Panamericano y mas. Un otro punto importante di esaki ta cu Aruba tin asina acceso na fondo financiero di Solidaridad Olimpico, cu ta e entrada principal di Comite Olimpico Arubano.
Aunke Aruba no a gana ningun medaya Olimpico ainda, Aruba ta sigui traha duro pa halsa e nivel deportivo y e bandera Arubano halto riba e podium mundial aki.

E Weganan Olimpico di 2024 ta tuma lugar na Paris for di 26 di Juli te 11 di Augustus 2024. E ceremonia di apertura lo tuma lugar riba 26 di Juli 2024, y lo ta e prome biaha cu lo tin un desfile di nacionanan riba boto pasando riba e river Seine. Aruba su delegacion lo bisti uniformnan den e ceremonia oficial cu lo tin e toke patriotico, resaltando e colornan di Aruba su bandera como tambe e color geel cu ta referi na e 'rising sun' cu ta e atletanan di nos generacion nobo. Pa loke ta e uniformnan deportivo, e tema cu lo resalta lo ta esun di ‘Fauna’ .

Mas cu 10,500 atleta di mas di 200 diferente Comite Olimpico Nacional lo ta competiendo den e weganan Olimpico aki. Pa Aruba, un nacion chikito pero c’un curason grandi, e oportunidad pa participa ta un evento di gran nificacion. E deporte no solamente ta un manera pa gana medaya, sino tambe pa mustra e herencia cultural y e dedicacion di nan pueblo.

Aruba su participacion den e weganan Olimpico di 2024 ta duna un oportunidad pa atletanan briya y inspira e futuro generacionnan.

Trahando duro y consistente Aruba por sigui eleva e standard di deporte na Aruba y yega na un medaya Olimpico.