Tita Peña ta habri su curason pa conta nos con el a sobrepasa perdida di su gran amor, su mama y na mes momento, a haya consuelo bek cu yegada di 2 amor nobo den su bida, su cachonan Coco y Pacheco.

"E fayecimiento di mi mami a cambia mi bida por completo. Un di e momentonan di mas duro di mi bida y di cualkier ser humano ta ora e palabra Cancer ta bati na e porta di bo bida mas ainda, si ta trata di bo mama,” Tita ta bisa. "E ser cu mas mi a stima a keda diagnostica c’un Brain Cancer cu despues a bira un Metastasis den apenas 6 luna. E idea di perde mi mama a cuminsa horta mi paz, mi soño. Un miedo a cuminsa domina, miyon di pregunta sin contesta ta cuminsa bombardea cada minuut di bo dia. Ningun hende ta prepara pa algo asina. Mi mester a dispidi di mami cu apenas 54 aña di edad.”

Sinembargo, den e momento di scuridad y dolor aki, Coco y Pacheco, su dos Jack Russellnan, a drenta den su bida y a cambia tur cos. "Nunca antes Cacho tabata atraemi," Tita ta confesa, pero despues di e yegada di Coco, un regalo di su tata durante e enfermedad di su mama, tur cos a cambia. E ta corda e momento ey. “Mi a bira wak mi tata y bise, serio? Un cacho aworaki? Pero hopi liher Tita a realisa e impacto den su bida di e regalo aki. “Sigur nada por reemplasa e bida y e presencia di un mama, pero Dios semper lo percura pa keda mustra su amor di mil forma y mi cachonan a nifica esey den mi bida. No mucho despues, despues Coco a haya un yiu “Pacheco”, y asina e perspectiva di Tita a cambia completamente.

E presencia di su cachonan a dun’e un motibo pa hari bek y a yud’e enfrenta su tristesa. “Nan ta bira un miembro mas di bo famia, nan no ta papia pero nan tin sentimento. Si 50 biaha bo drenta bo cas, 50 biaha nan ta bira feliz di wak bo. Nan no ta spera nada di bo, nan amor ta incondicional. Mirando esaki awor mi ta puntra mi mes dicon mi no a haya uno mas prome?.”

“Ora mi Mama a fayece hopi cos ta bay cu bo ser keri y gana di bida no tabat’ey mas manera antes. Bo ta cuminsa sinti bo so di un manera constante y mi no tabata ripara cu mi tabatin dos “stickers” bandi mi", e ta bisa cu referencia na Coco y Pacheco.

“Nan tabata distraimi y sacami un poco di e realidad. Nan tabatin mester di mi. Nan tabata yudami drumi un poco mas trankil pasobra ora morto ta mustra su cara, bo anochinan por ta mas largo. Mi mester a sali cana cu nan y esey a yudami conecta cu naturalesa y tabata calma mi ansiedad. Hopi biaha den e lugarnan di mas bunita di mi isla canando cu mi cachonan mi mestera a sinta yora mami su partida y Coco y Pacheco tabata eynan cu mi, sin por a papia un palabra mes, sin por a brasami, pero cu nan mirada, tabata mas cu suficiente.”

"E ta loke cu nos tin awor, ayera a pasa caba, no tin nada cu nos por haci cu loke a keda atras y mayan no ta garantia pa ningun hende. Pues locual nos tin ta un gran regalo y e ta nos presente! Hari mas, complica menos, ta gradicido tur dia, stima di tur forma cu bo por y porfavor pordona liher… Mami Lily su perdida (My Angel In Heaven) y mi dos Doggies Coco y Pacheco a siñami esey!