Awe para dilanti klas, of sinta riba vloer cu su muchanan ta representa nada mas cu un di e soñonan di mas desea di Neiffi Kock-Sierra ( 53). Na 2014, el a tuma un paso sin mira tras pa yega na su peuterschool cu el a duna e nomber 'Pasa Dushi Pasa Pret Peuterschool.'
Awe 9 aña despues, e ta mas cu feliz, pasobra su intuicion pa tuma e paso tabata esun corecto. E no a laga su soño muri. Awe e kier simplemente inspira otro pa no laga bo soño muri y kere cu semper tin un forma, pa haci esaki un realidad.
Desde cu mi tabata un mucha mi mes, mi tabata hunga scol unda ami tabata e juffrouw. Semper mi tabata gusta mucha,” Neiffi ta conta. E tabata su pasion latente pa enseñansa caba di e tempo aki. "Semper mi tabata bisa c’un dia lo mi tin mi crèche.” El a crece, caba su scol na Aruba pero su caminda profesional a hib’e leu for di su soño, trahando como cahera principal pa un compania local. Realidad ta cu e no tabata completamente feliz, paso e amor profundo pa muchanan chikito nunca a laga su mente ni su curason.
Despues di 15 aña trahando como cachera, Neiffi a dicidi pa tuma e paso di cambio porfin. El a kita for di trabou y a bay traha na un crèche pa sigura cu di berdad, esaki ta loke e kier haci. El a wak cosnan bon y cosnan malo, pero tur esaki a pone tuma su decision den forma firme. El a inscribi su mes den cursonan pa prepara su mes academicamente y cu e ayudo di su esposo, nan a transforma nan garashi den un ambiente escolar. Sin busca ayuda financiero di banco, nan a pone tur nan amor y speransa den creacion di e peuterschool chikito aki, cambiando esaki den un espacio acogedor y agradabel.
Di e forma aki, "Pasa Dushi pasa Pret" a habri su portanan dia prome di augustus 2014, cu solamente seis mucha y Neiffi y un colega cu tabata traha cune na e crèche cu el a traha na dje, como e leidsternan. Pero no a tuma hopi tempo prome cu e cantidad di muchanan a crece. Un boca a bisa otro y den apenas 4 luna el a yega te na 25 mucha. “ Mi a crea un facebook page y tabata pone un poco di loke mi tabata haci.” Asina Neiffi a sigui mehora su mes, participando den varios curso nan mas, incluyendo uno di Fundacion pa Nos Muchanan y FEPA, y hasta a saca diploma den Leider Sportieve Recreatie (LSR) pa entretene su muchanan. Ainda awe, e ta sigui cursonan paso su meta ta pa keda semper duna e mihor servicio y experiencia na su muchanan.
Su momento faborito? E ta bisa cu esakinan ta varios pero : “nada ta iguala ora cu mi ta sinta riba vloer cu mi muchanan y mi ta disfruta di nan alegria inocente cu tur ta bula riba mi. Mi a siña cu hopi muchanan mester y kier amor y cariño. Nan kier bo haci actividad cu nan y asina nan ta conecta cu nos.” Neiffi ta bisa cu su trabou tin hopi momentonan gratificante manera e.o. unda te awe, e por ta un caminda riba caya y e ta topa cu su antiguo studiantenan - awor adolecentenan - yamand’e cariñosamente "juffrouw Neiffi". “Ainda mi tin muchanan, awor ya grandi, ta bin bishitami. Mi ta kere esaki ta danki na e amor y cariño cu mi a duna nan.”
Pasa Dushi Pasa Pret ta cuida mucha te cu nan 6 aña. “Mi ta tene e cantidad na un forma balansa unda tur leidster ta traha hunto. Mi tin 55 mucha awor cu 5 leidster total cu ta duna nan cuido y cariño. Mi ta cuminsa cu baby di 6 luna caba. Durante tempo, Neiffi a siña hopi cos y t’ey pa mayornan sinti nan mes trankil cu nan creacion di mas precioso, ta bon cuida. “Sigur tin mayornan cu tin reserva ki ora of si nan tin cu hiba nan yiu chikito un peuterschool, pero hopi mayor ta acercami despues di toch a tuma e bon decision ora nan mira con contento nan (yiunan) ta, cu resultadonan positivo den comportacion.
“No laga bo soñonan muri. Kere den bo mes y tuma paso pa paso pa haci bo soño bira realidad. Keda pone amor den tur loke bo ta haci." Neiffi Kock-Sierra no solamente a realisa su soño, pero tambe a inspira un comunidad completo cu su dedicacion y amor pa enseñansa.
Built with Shorthand