E cambio di Ronald pa traha den cushina di otro restaurantnan y bira un ‘Private Chef’ no tabata solamente un cambio di carera, pero un contesta di curason na e pasion duradero di su yiu Stan pa hospitalidad. "E pasion di Stan tabata grandi," Ronald ta bisa cordando su yiu cu na 2021 a fayece di cancer.
"Stan a briya hasta den e momentonan mas dificil, y su alma a guiami pa e ruta aki. El a cuminsa studia hospitality entre su tratamento contra cancer. Hopi liher el a bira un di e mihor studiantenan hayando e ‘pineapple award’ na su scol. Despues cu el a fayece, un dia na mi trabou na un compania den horeca, mi a haya un mensahe cu a drenta den mi. Mi tabata sa cu tabata di Stan, bisando mi pa mi kita di e trabou ey y bira un ‘Private chef’. Esaki nunca a pasa den mi mente antes. Mi a scucha y e mensahe aki y a kita for di trabou y asina mi viahe pa traha pa mi mes como un ‘private Chef’ a cuminsa.
Pa duro cu e por zona, lagando un trabou stabil y cuminsa algo sin garantia, e certesa di Ronald cu tabata trata di un mensahe di Stan, tabata mas cu suficiente pa e hinca tur su fe den e paso nobo aki di su bida. “Mi a cuminsa ta djis bende sopi for di mi cas. No a dura mucho cu mi a cuminsa cushina pa un turista na un cas na Savaneta ( ainda mi tin contacto cu nan y mi a keda invita pa bay cushina nan cena di pasco pa nan na new York.) Awendia su compania yama BITE OF HEAVEN ARUBA a bira uno pidi pa hopi turista, unda Ronald ta e protagonista principal, cushinando pa hendenan di tur parti di mundo cu ta bishita Aruba.
E manera unico di Ronald pa crea experencianan culinario ta pa inclui su clientenan den e proceso. "Nan ta parti di e creacion," e ta splica. “Mi ta semper den contacto directo cu cada cliente. Di e menu, pa restriccionnan manera gluten of alergia cu por tin. Manera cu e menu ta acorda, mi ta cuminsa na busca e ingredientenan di mas fresco pa crea e platonan, manera priminti. Mientras mi ta cushina,mi guestnan ta semper parti di e experiencia aki tambe; nan por semper bin den cushina, hacimi pregunta y tin biaha hasta ta yudami. Gruponan te cu 10 persona mi ta haci mi so p’asina mi por ta mas serca di mi guestnan.”
Guia pa e lema di Stan di "haci loke ta haci bo feliz," Ronald su servicio ta un mescla di autenticidad y comprension. "E ta hopi importante pa ta fiel na bo mes," e ta enfatisa. “ Pa duna e mihor servicio posibel, bo mester djis ta e persona cu bo ta y compronde e necesidad di bo guest nan. Den su bio di introduccion cu guestnan ta topa cune, nan ta haya un splicacion cu ta contesta e pregunta; "Pakiko bit of heaven?", invitando su clientenan mesora den su mundo culinario.
E abilidadnan culinario di Ronald como un “private Chef" oficialmente registra, ta uno cu ta den constante evolucion. E ta constantemente adaptando su mes na e variacion di cushina- y ekiponan. "Cada cushina ta trece un aventura nobo.”
Ronald ta sinti presencia di Stan den su trabou na tur momento, di e barbuletnan constante cu e ta topa cune ora e yega un cas pa cuminsa cushina te na e tattoo cu e wowonan di Stan cu ta cune tur momento. E ta manera un guia constante den su aventuranan culinario; coneccion spiritual entre tata y yiu cu ta alimenta su pasion pa e trabou tur dia.
Un di parti mas gratificante sigur pa Ronald den su trabou ta invitacionnan cu e ta haya di su guestnan pa bay cushina pa nan na nan pais. Na februari awor e tin cu haci un viahe pa bay cushina na Chicago pa un guest. E gestonan aki di confiansa y aprecio ta di un balor inmenso. Pero mas cu tur cos ta cu despues di 5 aña hopi duro cu ta inclui e enfermedad y perdida di su yiu, nunca el a entrega y a keda lucha, manera e ta sigui haci awe.
"Pa aspirantenan pa chef, registra bo mes como un chef profesional. Keda fiel na bo pasion y bo mes,"
Ainda mi ta pensa riba e mensahe cu mi a haya di shelo y mi lo kier bisa tur hende; Si bo haya un señal di un hende cu ya no t’ey mas, tum’e cu man habri.
Mi yiu ya ta 2 aña y mey cu bo a bay laga nos pero mi sa cu bo ta cu nos, djis den un otro forma. Bo ruman ta bayendo hopi bon na scol na Hulanda y Claudia a duna mi tur sosten den e viahe nobo aki. Danki pa bo mensahe y mi lo percura pa tur mi guestnan keda feliz cu nan experiencia culinario di A Bite Of Heaven. Papa ta stimabo - te amo.
Built with Shorthand