Cu su 23 aña, Ricardo Enrique Arends Cardona ta un fuente di inspiracion, demostrando cu e generacion nobo ta cla y comprometi na promove y preserva e identidad, cultura y historia di Aruba.

Naci na Colombia pero lanta na Aruba, Ricardo a comproba cu pasion y dedicacion por ta e chispa pa cambio real. Despues di completa su educacion basico na Aruba, el a sigui su estudio na Hulanda, unda su pasion pa storytelling y diseño di experiencia a haya forma. Awor, como e Director di Operations y Marketing pa "Aruba Downtown Walking Tours" y Lighthouse, Ricardo ta liderando e caminda den ofrece experiencianan cultural unico, tanto na residentenan como turistanan. Sin duda, e ta un baluarte den su esfuerso pa mantene y celebra ken nos ta como Arubiano: Ricardo ta un berdadero BOS DI NOS TERA.

"Mi a lanta na Cunucu Abao, cerca di Bubali, unda mi tabata biba den un trailer cu mi famia. Serca di cas tabatin masha hopi mondi y despues di scol mi tabata gusta bay hunga den mondi, core bais of busca cualkier cos di haci pafo paso mi no tabatin playstation," Ricardo ta comparti cu nos, dunando un bista intimo di su origen humilde y su conexion profundo cu e isla di Aruba.

Desde chikito, Ricardo su curiosidad tabata sin limite. E tabata haci varios deporte, di baseball, futbol, zwemmen, basket. tennis, tae-kwondo y tambe a bay les di pinta, di drum y tabata den scouting. Pero su fascinacion cu historia a manifesta te mas laat. Semper el a haye historia interesante pero no por a pensa, cu awor su carera lo ta rond di esaki. “Na HAVO, mi tabatin Geschiedenis como un vak y eynan bo por bisa mi tabata obliga di gust’e paso mi mester slaag. Pero p’esey mi semper ta bisa, spera e inespera, awo mi trabou tin di haber cu historia y cultura y tambe mi proyecto cu monumenten fonds completamente enfoca riba historia.”

“Mi ta studiante di HBO finalisando ultimo aña como Leisure and Events Manager - Storytelling in Experience Design, tambe mi ta Co-owner di
Island Inspirations by VL  y Operations and Marketing Director di Bookaruba, conoci como Aruba Downtown Walking Tours y tambe Lighthouse. Mi ta encarga di percura pa un bon maneho di e compania door di entre otro prepara schedule pa e trahadonan, comunicacion cu barco, hotelnan y tambe turista. Maneha reservacion etc. Tambe mi ta mantene un presencia activo riba medianan social pa e compania.” Tur esaki mientras cu mi ta tata tambe, mi tin un yiu di 1 aña cu yama Leilani. Den su trabou actual, Ricardo ta poniendo su educacion y pasion na practica, creando tours cu ta ilustra e beyesa y profundidad di e historia y cultura Arubiano. "E exito di e walking tours ta basa riba e hecho cu nos ta unico y ta celebra e rikesa di historia y cultura di Oranjestad.”

“Tur hende ta bisa esaki y tur hende sa esaki pero nan no kier profundisa nan mes pa sa mas y/of pa educa mas hende. Pero, nos no por culpa nan tampoco paso mi ta haya cu falta un enfasis riba nos historia y cultura y hopi importante un manera mas moderno pa trece esaki dilanti, principalmente pa nos hobennan. Esaki e ta referi pa logra haya nan atencion pa esaki indicando e esfuerso cu mester hinca pa crea materialnan educativo y experiencianan interactivo cu ta dirigi specificamente na e generacion nobo. “Pa casualidad algun siman atras nos tabatin un grupo di alrededor di 60 mucha di Schakel College cu a tuma parti na e tour. Nan ta e unico scol cu a participa den nos tour Historico y Cultural durante henter un aña largo. Nos semper ta habri pa tuma studiantenan, muchanan of famianan local pa participa den nos tour.”

Dia 21 di februari 2024, tabatin e desvelo di un proyecto cultural e 'Ruta Historico di Eagle'. Un proyecto iniciativa di Stichting Monumentenfonds Aruba hunto cu studiantenan di Hogeschool van Rotterdam y Ricardo Arends, cu ta conta e historia di e di dos refineria di Aruba, Arend Petroleum Company conoci como Eagle Refinery, e bario di Eagle y Aruba su rol importante pa aliadonan den di dos Guera Mundial. Ricardo su rol den e proyecto aki, tabata crucial.