Naci y cria den e bario conoci pa su calor, Santa Cruz, Chantal Quant a hereda no solamente e amor profundo pa musica, pero tambe e talento natural pa canto y baile for di su tata, e conocido cantante Richard "Tatoo" Quant.
Desde su hubentud, Chantal su dia dia tabata domina pa ritmo y melodia cu a forma e idioma cu el a sa di acepta, desaroya y awe comparti cu su comunidad di Aruba. Su trayecto formando un carera musical unda nunca el a bira lomba pa su origen y cultura. Un clasico cu a wordo interpreta, esta “Cunucu di Seid" den un forma asina excepcional a pone wowo riba dje y ta haci cu nos ta mir’e como un perfecto BOS DI NOS TERA.
Esaki ta un cancion aki cu tin ya caba 42 aña desde cu el a keda skirbi. El a keda componi pa Don Ramon Krozendijk y tabata pa Ferdinand Carrion canta den e competencia di Voz-i-Landia na 1982, cu cual cancion el a gana tambe e festival cune. Desde e tempo ey, e cancion a keda reproduci y canta pa varios artistanan, c’un di esunnan mas memorabel sigur di Edjean Semeleer, na 2005. “Mi tabata anhela pa cant’e caba di basta tempo pasa y e deseo aki a bira un realidad, na e momento corecto,” Chantal ta bisa. Mi a tuma esaki como un di mi prome proyecto y paso como cantante solista. Di e forma ‘ki mi a yega na e produccion hunto cu su videoclip. E proyecto aki ta mas special ainda p’ami, pasobra mi a envolvi mi ‘Oma’ y ‘Opa’ hunto cu mi subrino aden. Esey tabata un ‘extra touch’ special p’ami. Mi a cante cu mi alma y curason.”
Como mucha Chantal a haya su formacion den Grupo Pierewietje. Mirando bek e ta realisa cu esaki a marca e inicio di un biahe yena di pasion pa canto y baile, poniendo e fundeshi pa loke eventualmente lo bira su carera musical. Competiendo den e prestigioso festivalnan di Aruba su himno y bandera y den e competencia di Caiso y Soca Monarch, a duna luz na e persona artistico conoci como Queen Chanty. El a cuminsa gana su coronanan riba nivel infantil den e competencianan aki y a sigui pa e nivel hubenil tambe. Asina el a demostra no unicamente su abilidad vocal durante su crecemento, pero tambe su abilidad pa conecta cu e publico y hala atencion cu su presentacionnan unico yena di smaak.
E caminda cu tabata sper’e riba nivel musical, casi por a anticipa. Chanty no tabata para keto pa demostra su talento como cantante. Tur esaki a habri portanan p’e unda su experiencia den e agrupacion nan musical durante carnaval a sigui mehora su talento di canta mas y mas, y asina preparando e pa e siguiente fase den su carera; Solista.
Recientemente, Chanty a lansa "Un bon muhe", canta den Papiamento. Esaki ta su prome single como solista - un paso significante den su desaroyo como artista. E cancion no solamente ta un himno pa independencia y fortaleza femenino, pero tambe ta sirbi como un mensahe di su talento musical. Awor, como un miembro clave den e frontline di e grupo musical DLS, Chanty ta sigui cu su mision pa enrikece e panorama musical di Aruba cu su voz unico, cantando den su idioma Papiamento. “E ta hopi importante p’ami, pa tin produccionnan den Papiamento. Esey ta e idioma cu mi ta canta papia y a crece cune. Papiamento ta e idioma cu mi ta stima.
Como cantante, mi ta kere cu e ta hopi importante pa continuamente keda produci y skirbi cantica na Papiamento. Berdad cu nos ta biba riba un isla multicultural y no por forsa ningun hende pa gusta algo. Pero si nos duna amor na produccionnan di calidad den nos idioma, den e forma corecto y bunita, nos lo atrae nos mesun hendenan pa scucha mas y mas, cancionnan na Papiamento.”
Built with Shorthand