Su bida ta un canvas vibrante, pinta cu e colornan di tradicion, pasion pa baile, y un dedicacion sin igual pa preserva e cultura Arubiano. Rene (35) su viahe, acentua pa influencia di su famia, specialmente su wela Fernilia y e legado cultural di su bisabuela Mimi Kock, a defini e caminda p’e como un guardian di e tradicionnan cultural di Aruba y un perfecto BOS DI NOS TERA.
E ta orguyoso di su herencia, combinando e tradicionnan di famia Kock Peasch di San Nicolaas y Christiaans-Geerman di Savaneta. "Mi wela tabata mi inspiracion," Rene ta recorda cu cariño. Cu solamente 6 aña, ya e tabata presentando su talento, y no mucho despues, el a drenta Sunrise Dancers y Grupo Scouting Aruba, unda cu su amor pa baile a sigui crece. “Cu 14 aña mi a cuminsa mi mesun grupo di baile yama: Gucci Baby cu diferente bailadornan cu tabata bay mesun scol cu mi na Filomena College Mavo. Scol mes a dunami e oportunidad pa lidera algun añanan mas, 2005/ 2006 e actividad di aña multicultural na nos scol.” Cu show en alles. E decision pa forma su propio grupo di baile, Gucci Baby, a marca e cuminsamento di un caminda yena di exito y reconocemento, incluyendo e liderazgo di evento multicultural na su scol.
Drentando den e mundo di baile como fundador y lider di Gucci Baby y posteriormente Gucci Dancers Aruba, Rene a establece su mes como un figura clave den promocion di baile y cultura Arubiano. Su contribucion na e mundo di cultura na Aruba no a limita na baile so; como e prome Minister Hubenil di Cultura di Aruba, Rene a representa Aruba internacionalmente, promoviendo e cultura y folklore Arubiano. E impacto di su liderazgo ta extendi mas leu di su isla, cu presentacionnan tanto na New York como na Nacion Uni di hoben na Honduras y su esfuersonan pa lanta un Parlamento Hubenil na Ecuador. Rene su pasion pa baile y cultura a hib’e na duna charla y workshop na scolnan, promoviendo e rikesa di e folklore Arubiano. “Bou mi propio iniciativa, na 2010 mi a bishita varios scol pa siña nan tocante Aruba su folklore y Cultura. Mi preparacion tabata den man di Mo Mimi Kock y nos Mama di Cultura Sra Bernadina Growell Kock (Q.E.P.D). Tambe mi a haña les directamente di Sr. Atan Lee (Q.E.P.D) pa les di etiquete como un role model pa hubentud. Di 2010 te cu awe presente, mi ta bishita varios scolnan tur aña dunando presentacion y splicacion di nos cultura voluntariamente.”
Rene Kock ta un baluarte den e promocion y preservacion di e cultura Arubiano. "Pa mi cultura y folklore, nunca mi ta cobra," e ta afirma cu orguyo, demostrando su compromiso profundo pa duna balor y celebra e rikesa cultural di su isla. Como consehero di Student Body council na EPI, Rene a lidera y contribui na un cantidad di actividadnan, variando desde beach clean ups te actividadnan di salud y cultura, reafirmando su dedicacion pa engrandece e comunidad Arubano. Rene a innova den e mundo di baile local cu e creacion di Gucci Dancers Aruba, introduciendo categorianan diverso cu ta span e rango di edad completo, desde chikito te adultonan mayor. E exito di e reinanan cultural bou su direccion ta prueba di su abilidad pa captura y promove e esencia di e cultura di Aruba.
- 2012 mi a prepara un representante di Mosa Cultural di Aruba na Centro di Bario Brazil cu a gana e prome titulo di Mosa Cultural 2012, na honor di nos Mama di Cultura Bernadina Growell Kock. Esaki mi a continua na 2013 cu tambe a gana.
- 2013 mi a dicidi di expande mi grupo di baile y introduci mas categoria unda Gucci Baby a bira e nomber di 1 categoria (2 pa 4 aña). Mi a introduci Gucci Minis (5 pa 8 aña) - Pre Teens (9 pa 12 aña) . Gucci Teens (13 pa 18 aña) - Gucci Girls (19 pa 30 aña) - Gucci Fabulous di 30 pa 50 aña.
- 2014 mi a manda reina pa damita cultural y a logra bay cu e titulo tambe di Reina Cultural.
- 2015 mi a manda un damita atrobe y atrobe e la gana e titulo di Damita Cultural. Representando pa prome biaha Gucci Dancers Aruba su nomber.
- 2016 mi a manda 7 reina Cultural na unda tur 6 a logra bay cu e titulo maximo di Reina di Cultura y e 1 a sali reina Folklorico di Aruba
- 2017 mi a manda 3 Reina y tur 3 a gana.
- 2018 3 reina y tur 3 a gana.
- 2022 a manda 1 reina y e la gana.
- 2023 a manda 2 y tur 2 a gana e titulo maximo.
"Mi ta bishita scolnan mas cu 3 bes pa aña pa splica nos folklore y cultura.” Su labor voluntario na scolnan ta mas c’un tarea; e ta un mision pa sembra amor pa cultura Arubiano den e curason di e proximo generacion "Pa cultura semper mi tin un SI como contesta. Hunto nos por." P’ami e importancia ta pa Engrandece nos Folklore y Aruba. Cada un di nos tin nos talentonan y mi specialidad y amor ta Cultura. Mi ta wak mi mes aki paar di aña pa ta e Minister di Cultura di Aruba. Mientras tanto mi ta sigui yuda mi comunidad organisando actividadnan pa nos pueblo y bishitando scol y sin laga afor yuda na unda cu mi por.’
Built with Shorthand