Kico ta haci Mervin e persona corecto pa politica?

Mi gusta scucha experencia di otro hende y tin respet fundamental pa otro. Mi ta alabes un persona husto y sigur di mi mes. Di chikito ora tin inhusticia mi ta duna mi opinion al respecto y ta sali na vanguardia di esnan den desbentaha. Na momento cu mi mester para fuerte pa mi opinion mi ta haci esaki y carga tur consecuencia. Tur ta ingrediente pa e trabou di un politico den e era actual den cual derechonan di e ser humano ta central.

Con bo ta keda ‘Updated’?

Mi ta un persona positivo, alegre y “open minded” y gusta keda altanto di desaroyonan den mundo, tambe di “new technologies”. Nunca no ta laat pa siña. Ademas mi ta habri pa cambio, loke ta yudami conecta cu esnan cu tin diferente opinion cu ami. Mi ideanan ta “evolve over time”. Paso nunca bo ta stop di desaroya. Asina mi ta kere di por a keda relevante y tambe “updated”.

Desafionan mas urgente?

E promer ta pa mehora e poder di compra di nos ciudadanonan cu a baha drasticamente durante e ultimo añanan. Specialmente di nos grandinan y esnan cu tin un salario minimo. Mi ta topa ciudadanonan c’un par di aña tras tabatin bunita cas c’un bon calidad di bida y awor nan cas ta deteriora y nan no por cumpli cu nan gastonan basico di tur dia, manera awa, coriente, gas, huur y cuminda.
Un otro desafio ta esun di salubridad publico den cual ciudadanonan no tin acceso facil na cuido medico basico y na medicina cu nan tin cu paga mientras nan cartera ta bashi.
E di tres desafio ta esun di mayornan cu tin cu traha 2 pa 3 trabou y cu no por paga nan gastonan ni cuido pa nan yiu(nan) dor di cual tin cu laga nan yiu chikito cu otro yiunan so of hasta serca personanan cu nan no tin confiansa cu lo duna bon cuido.

Areanan crucial pa actua riba dje?

Mester actua urgente pa mehora e poder di compra di nos cuidadanonan, cual tin su efecto riba henter famia y comunidad. Aki lo atende na mesun momento cu su efectonan, cualnan ta pobresa, problema e.o. di salud (mental) y criminalidad. Si no actua awor, mayan lo ta hopi laat. Pues lo mester traha conhuntamente cu otro actornan/stakeholders pa ataca e areanan aki.

Con Mervin ta mantene su mes como un Politico Honesto?

Sinceridad, honestidad y integridad ta virtudnan esencial. Como politico bo mester por responde ora algo por of no por. Tambe bo no por depende di otronan. Transparencia ta di sumo importancia pa un politico, pa e por duna cuenta di kico e ta haci, special ora ta trata placa di pueblo. Ta necesario control y proceduranan cla. Mester tin ‘cheques and balances’. Mi ta actua na mi mes ta solo of pa tur hende por mira, sin dependensia di otro. Mi votacion den Parlamento ta sagrado y ta pa e bien di pueblo cu mi ta representa. Esey mes a trece mi den conflicto den partido, y dor di esey mi tabata for di partido Mep na december 2010.

Termino ideal pa un carera politico:


Un politico mester dura te ora e pueblo ta sosten’e y confia cu e por sigui represent’e. No ta e duracion ta conta, sino e contenido y calidad di su trabou. E versoberingswet a kita diferente pensioen c’un politico tabata por acumula dor di su duracion largo, cu tin su efecto riba e cantidad di añanan cu por yuda di representacion.

Vision p’e siguiente 4 añanan?

• Mehoracion di costo di bida pa un y tur y control di prijsnan di producto di prome necesidad.
• Husticia social pa esnan vulnerabel, manera hobennan, nos grandinan, y pensionadonan.
• Subsidio pa mayornan y sosten financiero pa yiunan chikito.
• Vivienda di calidad y pagabel pa tur.
• Cuido medico accesibel y promocion di salud mental.
• Guia den caso di abuso, adiccion y criminalidad.
• Uzo di energia renovabel y proteccion di naturalesa.

“Un voto p’ami, Melvin G. Wyatt-Ras, mihor conoci como Mervin, ta un voto pa honestidad y integridad politico. Un voto pa garantisa cu tin un representante cu ta sali na vanguardia di esnan vulnerable den nos comunidad, manera entre otro mucha, mamanan soltera, nos grandinan y esnan cu limitacion. Na mes momento e ta un voto pa garantisa cu tin un bon cuido medico pa chikito y grandi cu mihor acceso na mediconan y specialistanan, unda remedinan no ta ser cobra na esnan vulnerabel den nos comunidad y unda tin atencion pa prevencion. Un voto p’ami lo garantisa husticia social pa tur y mehoracion di e area social. E ta un voto cu lo garantisa centro di cuido cualitativo y pagabel pa mucha y nos grandinan. Un voto p’ami lo mehora proteccion di nos muchanan contra violencia y tur clase di abuso. Un voto pa preveni criminalidad. Un voto p’ami ta un voto pa garantisa mihor salud mental cu dialogo entre partners riba tereno social y di salubridad. Un voto p’ami lo garantisa cu nos por yama Aruba nos hogar y cu nos por ta orguyoso di nos pais Aruba. Un voto pa Mervin pues ta un voto pa derecho y oportunidad igual pa un y tur.”