Kico ta haci abo e persona corecto pa politica?

Mi tin preparacion/formacion academico y experiencia di trabou. Mi ta un persona pragmatico cu ta buska solucion, hopi determina, y amplio experiencia cu negociacion. Semper mi ta keda mi mes y no ta wordo influencia dor di otro, pero si mi ta open pa scucha conseho.

Con bo ta keda ‘Updated’?

Mi tin contacto estrecho cu comercio y otro stakeholders den nos comunidad. Ora di haci decision of ora mi mester input pa solucion pa cierto problemanan/retonan mi ta invita e stakeholders na mesa pa por yega hunto na un solucion of pa dunami e informacion necesario p’ami por tuma un decision responsabel cu ta conta cu un draagvlak amplio.

Desafionan mas urgente?

Percura pa vivienda pagabel pa tur ciudadano, percura pa mehora e poder di compra di tur ciudadano y finaliza e refinanciamento di nos debe nacional pa gobierno tin mas placa pa inverti den e ciudadano y Aruba.

Areanan crucial pa actua riba dje?

Aruba mester un modelo turistico sostenibel na beneficio di tur cuidadano y mester ta den balance cu naturaleza y mester percura cu e entrada di turismo yega serca tur ciudadano, pues un reparticion mas husto di e rikesa di Aruba.

Kico ta un Politico Honesto?

Na prome lugar semper actua conforme cu ley, duna semper cuenta na Parlamento di tur locual bo ta haci. Parlamento ta e organo cu ta controla gobierno, pero como minister mi semper a duna parlamento tur informacion sin cu nan ta puntra pe. Ora mi a haci algo, tuma decision of bay un biaha di trabou semper mi ta duna cuenta completo, incluso di mi gasto na di biaha y e balor agrega di e viahe di trabou.

Con abo ta mantene bo mes honesto den politica?

Mi lo keda publica tur decision y informa Parlamento cu documento over di mi decisionnan y semper ta transparente cu Parlamento di Aruba. Esaki ta e manera c’un Minister por wordo controla. Mi lo eherce mi funcion conforme leynan di Aruba na tur momento.

Termino ideal pa un carera politico?

Segun mi no tin un limite pa esaki, ta depende di e support di e votador cu ta determina con largo e carera di e politico ta. E votonan lo indica si un politico mester sigui traha pa pueblo.

Vision p’e siguiente 4 añanan?

Mi ambición ta pa sigui stimula e sector di agricultura comercial, sigui inverti den e revitalizacion di Oranjestad, enfoca riba e desaroyo di San Nicolas, entre otro desmantela e refineria y desaroya e terreno pa proposito comercial y vivienda, percura pa e refinanciamento cu Hulanda pa crea espacio financiero pa inverti den e ciudadano y nos pais, logra un reforma fiscal integral y husto pa tur ciudadano y empresario y aumenta e poder di compra.

Con bo ta pensa logra e cambio cu bo ta busca?

Futuro lo inclui tur nos metanan den e acuerdo di gobernacion y percura pa e acuerdo di gobernacion wordo prepara den forma di un contract caminda tur nos metanan ta claramente describi y unda ta palabra kiko cua Minister lo haci pa logra e metanan di Futuro, cuanto placa lo wordo aloca for di e begroting y den ki timeframe e metanan di Futuro mester ta cla.

"Mi trabou como abogado y consehero fiscal pa 15 aña y docente universitario ta un hopi bon preparacion pa tuma decision riba nivel di gobierno. E ultimo 3 aña mi a haya hopi experiencia y a haci hopi trabou preparatorio cu den un gobernacion nobo mi por sigui implementa, mi lo por “hit the ground running”. Mi ta hopi entusiasma y pasiona pa traha pa Aruba.

Mi no tin interes personal den un funcion manera ta un minister of un parlamentario ya cu den sector priva como abogado mi tabatin un entrada y trabou bon, pero mi KIER traha pa Aruba y pa tur hende y no solamente pa mi mes. Mi a percura pa keda down to earth den mi functie como minister cu mi mesun auto, biaha economy class y tin un team chikito na mi oficina p’asina manda un signal cu mi no ta den politica pa e beneficionan pero pa traha pa Aruba.

Mi a scoge pa keda semper riba nivel y nunca ataca mi contrincante politico y semper trata tur hende cu respet. Mi lo duna 200% durante e proximo 4 añanan pa yuda hiba tur ciudadano y Aruba dilanti y ta cla pa sigui traha!"