Kico ta haci abo e persona corecto pa politica?

Manera mi slogan di campaña ta bisa; Determina cu Firmesa. Mi ta un persona determina pa lucha pa igualdad riba nos Isla pero mas aun determina pa duna tur hende e calidad di bida cu nan merece y den cada cos cu mi haci, mi ta haci’e cu firmesa. Mi areanan di enfoke ta Turismo y Enseñansa, cual ta dos area cu mi lo sa di traha duro y yega na solucion pa cada problematica den e areanan aki.

Con bo ta keda ‘Updated’?

Mi ta sigui hopi instancianan relevante den nos comunidad y purba na keda up to date cu varios rapport y noticianan al caso. Den e era cu nos ta bibando, eta indispensabel pa no ta updated cu noticianan tanto local como international.

Desafionan mas urgente?

Un problema hopi grandi cu tin actualmente ta problema social economico. Famianan (mayornan) no ta resta suficiente pa por haci un compras digno pa por cria nan famia. Otro problema grandi cu tin ta cu studiantenan ta perde motivacion liher den nan estudio, esaki ta bini door di un sistema di educacion anticua cu poco recurso pa duna les pero tambe falta di dedicacion na nos educadornan pa dunanan un trato husto. Por ultimo, nos sector di turismo mester di atencion, no e destinacion pero mas bien e trahador den e sector aki caminda cu nan ta laborando hopi ora pa dia sin por wak esaki bek den nan cartera, nos mester por yega na un acuerdo pa duna e trahadornan den e sector di turismo un alternativa positivo.

Areanan crucial pa actua riba dje?

Aruba mester un direccion nobo di Turismo. Como nos unico pilar economico, turismo ta afectando e isla. Nos mester por atrae e turismo di calidad cu poco impacto riba nos medio ambiente. Un turismo cu mas sostenibilidad posibel. Uno cu e trahador ta beneficia for di dje. Lo mi traha riba un plan pa conserva locual cu nos tin actualmente, y percura cu esaki dura pa futuro generacion. Lo sinta man den man cu Oficina di Turismo como tambe AHATA y otro stakeholders pa nos yega na e mihor plan sostenibel posibel.

Kico ta un Politico Honesto?

Un politico ta keda honesto for di momento cu eta scoge pa ta transparente, no solamente cu parlamento pero tambe cu su votadornan cual ta esnan cu a vota pa nan cadidato por ta den gobierno.

Con abo ta mantene bo mes honesto den politica?

For di mi entrada den politica, mi a bin ta traha cu honestidad y transparencia. Mi a percura semper pa no priminti promesanan cu mi no por cumpli sino scucha mi votadornan y purba yega na e solucion. Pa ta semper honesto y transparente mi a logra varios presente varios amienda pa trece algun cambio den nos leynan.

Termino ideal pa un carera politico?

E largura di un carera politico ta keda subhetivo. Un hende por haya e yamada na jong, y otronan na un edad mas halto. Locual mester permanece semper ta cu e politico mester por traha na un manera husto, transparente, integro y cu respet.
Politica no ta wega, eta algo serio y cada politico mester por tin e responsabilidad pa hiba un politica di nivel. Eta un mandato cu pueblo ta dunabo y scoge abo pa ta nan representante den parlamento.

Vision p’e siguiente 4 añanan?

Trece un cambio den sector di Turismo como tambe Enseñansa aki na Aruba.
Nos clase trahador den e sector di Turismo mester por wak e crecemento di bishitante den nan cartera como tambe purba na trece un cambio den orario di trabou p’asina por pasa mas tempo cu famia y yiunan. Nos maestronan merece mihor pa sigui guia y educa nos muchanan. A yega tempo pa duna atencion na nos sistema di enseñansa y purba na modernisa esaki completo.

Con bo ta pensa logra e cambio cu bo ta busca?

Di sinta na mesa cu stakeholdersnan y dialoga riba puntonan pa mehoracion. Cu dialogo nos ta yega leu. A yega ora pa lora manga di camisa y traha. Tin decadencia den tur area, un mas cu otro, pero no por sinta y laga mas tempo pasa. E momento pa traha ta awor, duna oido na nos comunidad, nan no por carga e peso mas. Pues mi compromiso ta cu mi dushi isla.

Mi ta un profesional di educacion cu ta kere den capacitacion continuo, ta traha cu gran devocion y ta gosa di un carera admirabel. Den e ambito personal, mi ta bendiciona pa harmonia familiar hunto cu mi casa y yiu.
Gratitud pa tur loke Dios ta duna mi ta loke ta inspirami pa lucha pa bienestar di grandi y chikito. Sea ta na scol of den sala di Parlamento, mi ta duna un 100% di mi mes pa percura cu e interes di e studiante of ciudadano ta bin na prome luga.
Mi tin amplio experiencia como miembro di Parlamento, lider interino di fraccion di AVP y Presidente di comision di turismo. Mi a destaca como un digno representante di pueblo, bon prepara y cu respet pa colega y e institucion.
Mi enfoke semper ta riba e temanan di Enseñansa, Turismo y Economia, ademas di hubentud y bienestar social. Entre e logronan cu mi ta mas orguyoso di dje, ta e ley pa regula calidad di servicio y siguridad na creche y centro di cuido pa mucha.
Pero mi no ta cla, tin hopi mas cu mi ta desea di haci; mas awo cu Enseñansa tin mester di tanto atencion. Por ehempel, reforma e curriculum pa inclui mas cu djis les y scol por ta un centro cu ta promove practica di deporte y arte.
Tur esaki ta posibel solamente cu bo apoyo. Vota #6 pa nos bolter cos y sigui cu e bon trabou na fabor di e bon comun.