Kico ta haci Endy e persona corecto pa politica?

Mi compromiso pa cumpli cu locual ta wordo priminti alabes mi abilidad pa scucha deseo di nos conciudadanonan y e sentido fuerte di responsabilidad social combina cu e berdad y transparencia, ademas semper dispuesto pa busca solucionnan pa tur problema ta cualidadnan fundamental cu ta hacimi un politico adecuado pa e retonan di awe.
E pilarnan di competencianan di siglo 21 esta comunicacion-colaboracion-critical thinking problem solving y creatividad (4C’s) ta mi compas pa mi pasion pa mi pais Aruba.

Con bo ta keda ‘Updated’?

Pa mantene mi relevante y “updated”, mi ta sigui e desaroyonan al dia tanto tecnologico, economico y sociocultural cu ta impacta nos pais. Mi ta participa den foro, atende reunionan di diferente ministerionan riba topiconan hopi varia, atende simposionan y consutla frecuentemente cu expertonan pa asegura cu mi conocemento ta keda actualisa pa decisionnan cu mester wordo tuma ta basa riba informacionan di awe.

Desafionan mas urgente?

• Atende cu e Costo di bida y e poder di compra di nos conciudadanonan pa un alivio real. Awor cu a stabilisa nos situacion financiero y pa di 3 aña consecutivo tin Surplus den nos presupuesto tin un plan pa e proximo 4 añanan inverti den nos pueblo pa logra e obhetivo aki.

• Salubridad: Traha riba e aspecto di salud mental y e tema pa debolbe nos grandinan nan remedinan bek y reduci e listanan di espera. Awor tin espacio financiero y un plan pa logra esaki.

• Diversificacion di economia: mester pone pasonan concreto pa amplia nos economia y no keda depende riba turismo solamente. Esaki ta un trabou conhunto cu tur stakeholders mester logra e direcion aki.

Areanan crucial pa actua riba dje?

Aruba tin e riesgo di perde su beyesa natural y biodiversidad si nos no actua pa protege nos medioambiente. Mi plan ta pa traha di serca cu expertonan riba e area aki pa inclui reglanan mas stricto pero balansa pa cu proteccion di nos terenonan natural, introducion di proyectonan sostenibel y stimula mas aun energia renovabel pa preserva y fortifica nos isla pa generacionnan cu ta bini.

Kico ta un Politico Honesto?

Mi ta compromenti na transparencia completo den mi trabounan, raportando y splicando cada paso constantemente na pueblo. Mi ta busca accountability, evaluacion di mi trabounnan y ta propaga un cultura di integridad cu base di honestidad. Haci drechi hasta ora ningun hende ta wak!

Con abo ta mantene bo mes honesto den politica?

Riba un isla chikito, mi ta percura di traha habri cu tur transparencia pa evita cualkier malinterpretacion. Mester percura mas y mas pa tur esnan rond di bo cu ta trahando compronde y practica e halto grado di integridad. Mi ta kere cu e curason na e lugar corecto y keda traha incansablemente riba transparencia y integridad mester por logra.

Termino ideal pa un carera politico?

Un carera politico no mester dura enternamente. Cambio di Liderazgo ta importante pa renova y sigui innova asina evita stagnacion. Mi ta kere profundamente si cu un carera mester su tempo suficiente pa pa realisa cambionan positivo.

Vision p’e siguiente 4 añanan?

Tur cos ta depende ki cartera mi lo por haña dependiendo e resultado di eleccion.

• Termina e reformenan den enseñansa. Tin un doorlichting rapport cu 13 recomendacion cu ta den pleno desaroyo pa eleva nos enseñansa den su totalidad. Lifelong Learning y acceso pa TUR hende den enseñansa ta di vital importancia. Leaving no one behind! Enseñansa ta motornan di nos pais.

• Amplia y deversifica nos economia manteniendo como compas e desaroyonan rapido den mundo di tecnologia unda nos mester ta capaz pa adapta hopi liher. Energia sostenibel lo bira parti di e proceso.

• Continua cu e mesun compromiso y determinacion na inversionan grandi den entre otro infrastructura di nos deporte y inversionnan den nos atletanan directamente. Brindando tur atleta un oportunidad igual. Deporte ta e vehiculo cu ta UNI un nacion.

Bringa pa logra baha e Costo di bida y mehora e poder di compra di nos concuidadanonan di acuerdo cu nos Plan di partido unda esaki ta elabora.

Con bo ta pensa logra e cambio cu bo ta busca?

A travez di dialogo continuo, cual mi a bin ta haciendo caba, cu comunidad, colaboracion cu expertonan y plan di accion specifico cu ta basa riba data y investigacion, mi ta convenci di lo logra. Ademas a demostra esaki den ultimo 3 añanan.

"Como un politico c’un pasion enorme pa sirbi pueblo y determina pa logra proyectonan grandi y noble na bienestar general di henter comunidad, mi ta comprometi pa representa un voz husto cu respet pa henter Aruba. Mi ta propone pa traha pa diversifica economia, sigui mehora nos enseñansa, halsa nos deporte pa un otro nivel y contruibi riba infrastructura di henter pais Aruba. Nos motto ta pa combati e costo di bida y mehora poder di compra di nos concuidadanonan. Cu e reto di cambio climatico, economia global y tecnologia ta avanzando constantemente y hopi rapido, Aruba ta enfrenta desafionan grandi, pero nos lo vence y surpasa tur obstaculo si nos traha hunto y uza tur nos recursonan poniendo nanishinan den mesun direcion pa yuda cada miembro di nos comunidad. Brindando mi e oportunidad un biaha mas pa sigui traha mi lo percura pa demostra cu hechos e progreso pa nos cada un cual nos tur ta buscando. Mi ta orguyoso di ta forma parti di nos baranca tan stima Aruba Dushi tera!"