Si bo puntra un hende den Savaneta ken ta Sra. Lucia Rasmijn, e prome cos cu nan lo bisa ta: “Si claro, Lucia di Brisas del Mar, casa di Joe.” Esaki ta manera mayoria di hende ta conoce mi wela. Pero p’ami, Mama Lucia ta mas cu simplemente e cara di un restaurant di famia; e ta mi reina, e Reina di Savaneta.
Tur atardi, banda di 4’or, e holor di spray-net ta recordami cu e reina mes, ta preparando pa duna tur hende cu yega na e restaurant, un bon bini cu elegancia. Awe, mi ta conta e storia di e señora fuerte cu no solamente a crea Brisas del Mar, pero tambe a biba p’e, hunto cu su esposo.
Un storia di pasion y sacrificio.
Desde cu mi tin memoria mama Lucia semper tabata na cas den cushina trahando un dushi pan bati pa mi welo (q.e.p.d) come hunto cu su pisca of na Brisas ta prepara pa wak cuanto 'reservations' tin e anochi ey. Esaki pasobra e kier sigura cu tur cos ta na ordo. Como unico nieta, ami practicamente a crece den e ambiente di restaurant y a experiencia tur e sacrificionan y reto cu ta bin cune. Mi wela tabata biba pa su restaurant y su bandera y bo tabata wak e fruto di esaki.
Tur atardi rond di 4’or mi ta sinti e holor di spray-net den gang di cas paso mi wela semper tabata bisti manera un reina pa ‘welcome’ tur hende na e restaurant y c’un bon make-up na cara, glamour y elegancia antes que todo.
Te dia di awe e ta un señora elegante.
Mi wela tabata encanta sirbi tur cu bin Brisas y tabata pone tur hende sinti manera nan ta parti di nos famia. Mama Lucia no solamente tabata e cara di e restaurant hunto cu mi welo pa 31 aña largo, pero e tabata e ‘all around’ den e restaurant. Si tabata falta hende den cushina e mes ta bula tras di candela of pela berdura pero ‘the show must go on’.
Mi wela hunto cu mi welo a tuma e restaurant over for mi omo grandi Sr. Jacinto Rasmijn (q.e.p.d), como intencion di trece na local y turista, cumindanan di lama cu sabor unico cu mi wela so por a trece na mesa y hunto cu nan yiunan ( Evelyn, Lilith, Joseph,Margitta y Pierre) a crea un restaurant unico y familiar den Savaneta.
Te dia di awe, tin hopi hende cu ta corda e platonan di Brisas entre otro Arubian dish (keri keri), Brisas Special y Commandeur Special. Mi plato favorito te dia di awe ta su salmon den un homemade bechamel sauce. Mi ta mata pa e plato ey, of su curry chicken. Mi wela su curry chicken den un coconut sauce, ufff bless her hands! Pisca tempera durante temporada di pasco ta un clasico, esey mama Lucia sa cu no mag di falta na mesa mi por come henter dia di dushi cu e ta y pa dessert un bon upside down cake…‘delicioso’. Mi wela ta malcria nos cu e mihor cumindanan cu su mannan por a crea.
Mama Lucia ta corda su recetanan di Brisas for di cabes, pa un señora di 86 aña su memoria di kita sombre, y energia na miyon. E sa tur su recetanan y no mester di midi, tur plato e ta djis purba y sa kico exactamente falta. Tin biaha e ta intimidami pa mi cushina pa mi wela paso mi sa cu e lo bisami djis na e holor si mi a agrega tal sazon of falta algo aden. ‘Perfection at its finest’, pero mi ta siña di e mihor ora e permitimi bay tras di candela. Paso si tin algo di mi wela ta cu e cuminda mester sali excelente.
Mama Lucia gusta yuda unda cu e por, tin dia nos ta 'zeur' cune paso e ta birando hende grandi y lo ta mihor pa e bay mas trankil, pero c’un hende cu tin animo y gana pa arasa cu mundo ainda manera mi wela, bo no por bis’e “mama Lucia no haci’e” paso e lo haci”e toch.
‘It's her passion, we can’t dim her light that shines from within’.
Mama Lucia ta un inspiracion sigur di admira y e pilar di nos famia. Esun cu semper ta sigura pa tur diadomingo nos bay come serca dje p’asina nos sinta hunto den famia. Den su bon y den su malo, mi wela semper tabata t’ey pa tur su famia te ainda y mi ta gradici dios di por tin un wela manera esun di mi, un señora fuerte c’un curazon grandi. Mi Reina!
Built with Shorthand