Un mucha cu curason di un emprendedor; un forma natural pa cuminsa describi Derwin Ruiz, kende cu solamente 19 aña, ya a haci di su banda pa cambia e mundo di negoshi na Aruba. Desde chikito, Derwin tabata inkieto, semper cu gana pa traha y pa yega na cualkier meta cu su dilanti. "Mi tabata e prome compania cu tabata bende shakes cu proteina pa solamente 4 florin. Pa nos por a haci un ganashi, nos mester a bende mas cu 20-cups pa dia. Wel, semper nos tabata bende sea 100 of mas," el a bisa. E deseo pa haci un impacto ta bay mas leu cu gana un bon bida.
Desde hoben, Derwin tabata fascina cu tecnologia. "Mi a cuminsa coding ora mi tabata den basis, atendiendo PIUS X SCHOOL," el a bisa. Durante su temporada na scol, e tabata ya un experto den traha apps y busca solucionnan innovador pa tur tipo di problema. Awor, como e Director di SmartCards, e ta duna tur su dedicacion pa impresiona su clientenan. "Mi ta pone mi mes tur dia pa impresiona nos clientenan, cu dedicacion y dunando e mihor resultadonan cu mas impacto posibel," Derwin a bisa. E ta crece di dia pa dia den su rol y ta continua pa traha duro pa construi un futuro briyante pa su mes y pa su comunidad.
Pa Derwin, e lidernan cu mas ta sobresali tin algun caracteristica cu nan ta comparti. "E mihor caracteristica di un lider ta un vision y creatividad," el a bisa. Un lider mester por bin cu ideanan nobo y soluciona e problemannan cu nan ta enfrenta. Pero mas cu nada, un lider mester tin pasion y dedicacion. "Si bo ta haci algo pa solamente placa, e chens ta hopi grandi cu bo dedicacion nunca lo yega su capacidad maximo... Haci algo cu bo gusta, y haci algo cu por soluciona un problema den comunidad, no djis 'pa placa'," Derwin a bisa cu pasion.
Durante su trayectoria como emprendedor, Derwin a enfrenta varios obstaculo. Un di e mayor desafionan tabata envy y engaño. "Ora cu bo ta logrando exito, hendenan ta bay cuminsa asercabo, tin cu bon intencion, y hopi cu mal intencion," Derwin a bisa. Den e mundo di negoshi, el a siña cu ta crucial pa separa negoshi di amistad. "Den negoshi no tin amigo," el a bisa, enfatisando cu mester ta prepara pa defende su mes contra tur hende.
SmartCards ta un idea cu Derwin a desaroya pa haci un impacto positivo den e sistema educativo na Aruba. "Mi kier mehora educacion," Derwin a bisa. Door di su trabou cu SmartCards, e ta busca pa subi e seguridad di scolnan y p’asina subi e calidad di educacion pa tur studiante. Cu su enfoke riba innovacion y su deseo pa sirbi su comunidad, e ta spera cu SmartCards lo bira un go-to company pa tur software inquiries na Aruba.
Den futuro, Derwin ta mira su mes como un pionero den software-development na Aruba y cu SmartCards ta impacta scolnan local y tambe internacional. "Den 10 aña, mi ta spera cu mi nomber, DERWIN RUIZ, lo ta reconoci pa software-development na Aruba," e ta bisa cu confiansa. Su obhetivo ta pa continua sirbi su comunidad y pa haci un impacto positivo den bida di tur hende cu e ta alcansa.
Built with Shorthand