Potret: Petit
Potret: Petit
Despues di cinco aña cu Mayra a habri Adara Aesthetic Medical Center, su lema cu ta guia su trabou diario ta "Empodera pa Transforma." Su vision pa Adara ta bay mas leu di loke ta estetica; "e ta pa aumenta auto-estima y confiansa di nos pashentnan." Como un muher den un puesto di liderazgo, mama di dos yiu, esposa y migrante, Mayra a enfrenta hopi desafionan unico cu ta pone su determinacion y abilidadnan na prueba constantemente.
Adara Aesthetic Medical Center tabata un soño cu Mayra inicialmente, a laga un banda pa dedica su tempo na su famia y maternidad, pero tambe durante e ultimo cinco aña, el a hinca su curason y alma pa haci e soño bira un realidad y exitoso. Den e mes tempo, el a haña un otro yiu y apesar di tur e desafionan, e no por ta mas orguyoso di loke el a logra te awor. Cu determinacion, positivismo, balentia y resiliencia, el a logra exito pa su mes y ta un inspiracion pa otro muhernan den nos comunidad.
Potret: Van Gassant
Potret: Van Gassant
E diferencia cu 5 aña di exito por haci ta inigualabel. Desde su apertura na 2019, Adara Aesthetic Medical Center, a experimenta un crecemento tremendo cu ta refleha e profesionalismo y nivel halto di Dr. Mayra Croes, posicionando Adara como e centro lider riba e tereno di medicina estetico na Aruba. “Nos a triplifica e cantidad di pashentnan y nos instalacionnan a keda expande y modernisa pa inclui e mihor tecnologia pa areanan special pa tratamentonan avansa haciendo inversion constante pa keda engrandece
Adara Aesthetic Medical Center . Cu esaki, nos ta garantisa e mihor calidad y cuido pa nos pashentnan.”
“Nos ta conoci pa introduci tratamentonan innovativo y tecnicanan no-invasivo pa rehuvenecemento di cara y curpa." E ofertanan popular di Adara Aesthetic Medical Center ta inclui Toxina Botulínica, fillers, bioestimuladornan, PRP y Hilos PDO. Ademas, recientemente a introduci dos ekipo nobo di Opatra® London, e Opatra® Dome Facial Skin Analyzer y e Opatra® Aqua Spectra, cu ta permiti pa ofrece evaluacion di piel mas detaya y tratamentonan mas personalisa. Sin duda algun, un di e desafionan mas grandi cu Mayra a enfrenta durante e cinco aña di Adara ta pa keda ‘al dia’ cu e desaroyonan constante y liher den e ramo di medicina estetica. Esaki mas tanto ta debi na e ubicacion di Aruba loke a presenta retonan pa importa y logra acceso na tecnologianan nobo. Pero cu su determinacion y vision, Mayra semper ta logra pa mantene Adara Aesthetic Medical Center na e vanguardia di industria, posicionando como un institucion reconoci, tanto pa hende local como esnan di afor.
Un di e storianan di exito cu ta recorda Mayra tur dia di e impacto cu su trabou tin riba un persona ta uno hopi special; "Tabata un persona cu a nace c’un problema congenital di boca y lip, kende despues di hopi operacion di reconstruccion, tabatin un asimetria cu tabata afecta su bida social." Mayra a yuda e persona aki cu aplicacion di accido hyaluronico pa crea simetria, resultando den un aumento di auto-estima y confiansa unico. Un otro storia di empoderamento y auto-estima aki tabata cu e poder di transformacion cu a yuda un otro hende cu tabata sufri di cicatriznan di acne pa sinti mas comodo cu su mes, sin tin necesidad pa tapa esaki cu make-up.
Potret: Van Gassant
Potret: Van Gassant
"E relacion cu mi ta crea cu cada pashent ta bay mas leu di un servicio; e ta un compromiso continuo cu etica profesional pa sigura nan bienestar y satisfaccion.
“Mi ta kere cu cada pashent ta unico y merece un tratamento adapta na su necesidadnan y expectativa. Personalmente, mi ta envolvi den tur paso di e proceso, di e prome consulta te despues di tratamento, pa mi por compronde mihor nan deseo y responde na tur duda cu nan por tin. Cada bos ta scucha y cada opinon ta balora. Nos ekipo ta entrena pa duna un experiencia di cuido humano y empatico, pa crea un ambiente sigur y comfortabel pa tur nos clientenan.”
E tendencia di e pashentnan local ta igual cu e tendencia global; cada dia mas hende ta scoge pa haci procedemento estetico cu no ta invasivo of cirurgico.
E procedemento mas busca ta esun cu inyeccion manera Botox y Fillers. Otro tendencia cu nos ta wak ta cu cada biaha tin menos hende cu ta biaha pa exterior pa haci e tiponan di procedimentonan aki.
Pa keda semper na e vanguardia den e campo di medicina estetico, e ta importante pa studia y keda innova. “Mi ta dedica pa mantene mi mes actualisa cu e ultimo tendencia y avancenan tecnologico pa mi por mehora nos servicio y duna nos pashentnan e mihor resultado. Mi ta asisti regularmente na conferencianan internacional pa siña y intercambia conocemento cu otro profesionalnan. Mi ta scucha nos pashentnan tambe pa compronde nan necesidadnan y si mester, adapta nos servicionan na nan deseo.”
“E red social y tecnologia ta esencial pa crecemento y exito di Adara. Via plataformanan manera Instagram y Facebook, nos no ta solamente promove nos servicionan, sino tambe nos ta educa y crea un comunidad cu nos pashentnan. Nos ta comparti informacion balioso, mustrando resultado y testimonio di pashentnan cu ta comproba e calidad di nos tratamentonan. Nos ta mantene un dialogo constantemente cu nos clientenan, sin importa unda nan ta.”
Mi conseho pa otro muhernan den negoshi ta basa riba tres pilar: Resiliencia, un Red di Apoyo Fuerte y Visibilidad. "Resiliencia ta importante, pasobra lo nos topa desafionan y fracasonan riba e caminda pa exito, pero siña di nan y sigui cu determinacion. Un red di apoyo por duna yudansa y conseho balioso, por habri porta pa oportunidadnan nobo, pues no tene miedo pa busca ayudo. Tambe, haci bo trabou y bo logronan bisto, esaki ta algo esencial den e mundo competitivo aki y no lubida di establece metanan fiho. Djis sigui bo pasion; asina lo bo keda motiva y lo logra tur soñonan proponi.”
Den e siguiente cinco añanan, e vision pa Adara Aesthetic Medical Center ta pa consolida su posicion como un lider den medicina estetica den e region. "Nos plan ta pa expande nos servicio cu tecnicanan avanza y tratamentonan pionero, colaborando cu expertonan internacional pa trece e ultimo avansenan estetico na nos clinica. Personalmente, mi ta dedica pa sigui crece profesionalmente, siñando abilidadnan nobo y mantene mi mes na e vanguardia di desaroyo den e bunita ramo aki.”
Built with Shorthand