E decision di Emily y su casa Jose Angel Perez, di muda for di Venezuela pa Aruba ta un historia di pasenshi, innovacion y resiliencia. Como un ingeniero industrial y su casa como un arkitecto di profesion na nan pais, ambos a traha hunto uzando nan abilidadnan y perspectivanan unico pa crea un negoshi unico pa Aruba. Nan tabatin un vision pa crea un solucion di transportacion sostenibel y innovativo pa tanto e turista como local. Loke cu a cuminsa manera un soño, hopi liher a bira un negoshi prospero awe conoci como Greenbike, e prome compania di micro-mobilidad di Aruba. Awendia, Greenbike ta un sinonimo di determinacion, pasenshi y compromiso cu sostenibilidad y comunidad, man den man.
“Greenbike a cuminsa 8 aña pasa y ta un negoshi familiar unda hunto cu mi casa, nos ta dedica na esaki completamente". E concepto tabata inspira pa e tendencia global di sistema di bike-sharing, un idea nobo e momento ey. Pero, pa por a haci esaki realidad, el a tuma hopi esfuerso; djis pa saca e permisonan necesario a tuma tres aña. Pero pa cada desafio, persistencia tabata loke a haci e proyecto finalmente un realidad.
Greenbike a cuminsa modestamente, pero el a crece grandemente durante e ultimo añanan. Concepto a keda crea na Aruba ‘from scratch’ unda te hasta e aplicacion a keda traha bou guia di Emily y su casa. Inicialmente, nan a introduci un sistema di bike-sharing cu 'bike stands' strategicamente poni rond di districto di hotelnan rond Aruba. “Nos tin stacionnan na RIU Hotel, na La Cabana, na e terminalnan crucero, na Marriott, dilanti di Hyatt, na Palm Beach, Holiday Inn y dilanti di Divi Hotels.”
Emily tabata encarga tambe pa purba haya sosten di sponsernan pa pone nan aviso na e stacionnan rond Aruba, loke a resulta den un esfuerso mas dificil cu el a pensa na cuminsamento. “Negoshinan kier a mira Greenbike operacional prome y tabata t’e despues di esaki, cu nan a mira e potencial y a cuminsa duna nos e sosten cu publicidad. Mi ta hopi agradecido na tur e companianan cu ta cu nos desde e prome dia,” Emily ta bisa, expresando su gratitud. Aunke inicialmente e Greenbikes tabata mas dirigi pa e turista, e bicicletanan hopi liher a bira popular entre localnan cu a cuminsa huurnan den fin di siman pa entretene nan mes cu amigonan of famia.
Awendia na 2024, banda di e bicicletanan tradicional cu Greenbikes a cuminsa cune, nan tin scooter electronico y pronto lo trece tambe bicicletanan electronico, cu ta satisfase un lista amplio di clientenan. “Bo mester tin diferente producto pasobra tin diferente clientenan cu diferente necesidad,” Emily ta splica. E diversificacion aki ta refleha e compromiso di Greenbike cu innovacion y sostenibilidad, reflehando e reputacion di Aruba como lider na iniciativanan ecologico. “Nos kier pa e comunidad di Aruba sa cu e tecnologia ta desaroya aki na Aruba y cu esaki no ta un 'franchise' cu nos a cumpra. Nos tin ocho aña sirbiendo Aruba y e turista cu ta parti di nos economia tambe, cu hopi gana y esfuerzo.”
E introduccion di scooter electronico tabata un decision importante pa Greenbike. “Aña pasa, nos a logra haya nos prome 50 scooter electronico. Na Februari ultimo, 100 di nan a yega,” Emily ta bisa cu orguyo. E scooternan aki no ta manera cualkier scooter pasobra nan tin caracteristicanan avansa manera ‘hydraulic system’ pa un careda mas suave, holder pa telefon pa agrega mas conveniencia como tambe capacidad di geo-cercamiento pa yuda na seguridad. “Pa nos, seguridad ta prome. E sistema di geo-cercamiento ta limita uzo di e scooter den sierto area destina, cu trafico mas trankil, manera rond di hotelnan y beach." “Si un hende drenta un area restringi, un alarma ta zona y e scooter ta brake,” Emily ta splica. E enfoke riba seguridad aki ta un factor crucial di Greenbike su operacionnan, reflehando e compromiso di e compania pa bienestar di comunidad.
Mirando pa futuro, Emily y su casa ta explorando posibildadnan pa expande Greenbike na otro islanan, pero mesora ta reconnoce e condicionnan unico cu ta haci cu Aruba ta ideal pa nan negoshi. “Haya un isla cu ta cumpli cu e condicionnan cu Aruba tin, no ta facil. Nos a biaha y nos no a logra haya un densidad na un punto hunto.” Adema, Emily ta splica cu e combinacion di seguridad, infrastructura y un ambiente amistoso na Aruba ta duna un fundeshi cu no replica facilmente na un otro lugar.
E inicio di Greenbike no tabata sin desafionan. For di pasa door di e ‘red tapes’ te logra haya Aruba su prome licencia de innovacion, cada paso y logro tabata un experiencia di aprendisahe. “Nos tabata kier un idea di negoshi cu tabata innovativo y sostenibel,” Emily ta bisa. E filosofia aki a guia Greenbike for di e cuminsamento y ta sigui agrega awe na su evolucion. “Greenbike ta haci su parti na reduci CO2. Nos a gusta e impacto ambiental aki desde prome dia caba.”
Loke a cuminsa manera un soño a crece den un servicio di micro-mobilidad cu no solamente ta mehora e experencia di biaha na Aruba, sino tambe ta contribui na e meta di sostenibilidad di e isla.
Built with Shorthand