Un colaboracion crucial ta loke a tuma lugar durante e di #17 conferencia di Routes Americas 2024 cu a tuma luga na Bogota, Colombia di 19 pa 22 di maart ultimo. Aeropuerto di Aruba (AAA) hunto cu Aruba Tourism Authority (ATA), pues aviacion y turismo di Aruba a uni forsa pa e magno evento aki. Di e forma aki, a duna Aruba un representacion clave, demostrando asina e compromiso pa crea asociacionnan crucial y na mes momento, eleva Aruba su imagen y presencia mas ainda den region di America.
E importancia di e union aki na e conferencia specifico aki ta debi cu eynan ta unda stakeholders den e industria di aviacion ta reuni y asina presenta un cantidad di oportunidad creando conexion y colaboracion di gran balor pa varios destinacionnan rond mundo. E participacion di Aeropuerto di Aruba conhuntamente cu colaboracion di ATA, a garantisa un representacion integral di oferta y e potencial di Aruba den e mercado mundial di aviacion y turismo.
AVIACION & TURISMO DEN UN SOLO STAND - MOMENTO HISTORICO
Durante e dianan di e conferencia, Aruba a beneficia grandemente di e union strategico aki di AAA y ATA unda ambos partido a crea un ‘stand’ comparti cu creativamente a visualisa e beyesa natural hunto cu tur atraccion turistico cu Aruba, como destinacion ta ofrece. E stand aki, cu a bira mesora un centro di informacion, a haya tur atencion y na mes momento, facilitando combersacionnan significativo cu e aerolineanan cu ya caba ta estableci pero tambe cu esunnan prominente
PARTNERNAN STRATEGICO
E beneficionan cu ta sali for di e evento aki ta di gran importancia pa Aruba, particularmente ora ya ta mira e formacion di asosacionnan cu e lidernan den e industria manera GOL, Flair Airlines, Breeze, Alaska Airlines y JetSMART. E colaboracionnan aki, no solamente ta mehora e conexion aereo di Aruba, pero tambe ta duna un aporte di balor na e sector creciente di aviacion di e isla. Ademas, e aerolineanan asocia manera JetBlue, British Airways y Wingo a ricibi un reconocemento special, reenforsando ainda mas e reputacion di Aruba como un di e destinacionnan principal. E dominion di JetBlue den e mercado, e crecemento notabel di Wingo y e prome aña di British Airways operando e ruta di London Gatwick Aruba, ta mustra e colaboracionnan fructifero cu ta impulsa e sector di aviacion di Aruba.
E delegacion di Aruba na Routes Americas 2024, representando Aeropuerto di Aruba, tabata encabesa pa Barbara Brown, conhuntamente cu Jo-Anne Meaux-Arends, Aviation Business Development Executive y Mary Joan Wardlaw, Customer Relationship Officer. E team di ATA tabata forma pa Sanju Luidens, Chief Marketing Officer, Sjeidy Feliciano, Area Director North America y Jordan Schlipken-Croes, Area Director Latin America. Hunto nan a añadi nan experiencia di mercadeo di destinacion na e colaboracion. Nan esfuersonan, incluyendo mas di 22 reunion productivo cu e aerolineanan y e aeropuertonan clave, a habri caminda pa diferente asociacion innovativo cu a duna forma na e panorama di aviacion di Aruba.
Built with Shorthand