Pakico Politica?
Di tur skina mi tin e oido cu situacion ta dificil y cu e pueblo di Aruba ta bayendo atras, tanto economicamente como socialmente. Cu mi experiencia di bida y como comerciante mi kier por haci un cambio pa trece alivio pa pueblo. P’e motibo ey mi a drenta politica.
Kico ta haci ABO e persona corecto pa politica?
Den mi 30 aña di experiencia como comerciante, mi a mira y siña hopi cos. Na diferente ocasion den mi bida, mi a cay y lanta bek riba mi pia. Mi a siña di biba cu y sin e comodidadnan den bida. Esey a haci mi un persona humilde, consciente di e dolor di esun cu no tin. Mi no ta cay den e grupo di esnan cu a lanta cu e cuchara di oro den nan boca.
Con bo ta mantene e contacto humano den un era di Social Media?
Eye to eye contact p’ami ta e forma mas humano pa comunica. Hende por expresa nan mes mihor, y asina mi por compronde nan situation personal. Di e forma ‘ki, mi sa kico ta biba den pueblo. Medianan social ta un bon plataforma pa informa pueblo locual tambe ta importante. Tur 2 mester haci bon uzo di dje.
Desafionan mas urgente?
- Baha costo di bida of mihor bisa, hisa e calidad di bida di cada ciudadano.
- Mas cas di pueblo of bibienda subsidia.
- Combati corupcion.
Areanan crucial pa actua riba dje?
Turismo. Pa cuminsa, Pone un ‘hold’ riba hotel, condominio y airbnb.
Con ABO ta mantene bo mes como un Politico Honesto?
Un politico mester para responsabel pa su actonan. Mescos c’un ciudadano tin cu paga su castigo den prison, un politico tambe mester paga su castigo pa un acto ilegal. Sea transparente.
Termino ideal pa un carera politico?
Maximo 8 aña como minister.
Vision p’e siguiente 4 añanan?
- Reforza nos calidad di Turismo y trece un balance harmonioso entre turismo como comercio y nos sociedad.
- Modernisa nos sistema di agricultura y haci’e mas accesibel y economico.
- Soluciona e problema di adictonan.
- Cuido di nos grandinan. Crea actividadnan cu ta promove un salud mental sano pa nan.
Con bo ta pensa pa logra e cambio cu bo ta busca?
Un bon team work, hopi esfuerso y pone plataformanan di idea di nos hobennan adulto. Mundo a cambia. Y nos tin cu cambia cu ne.
“Mi ta un sanger nobo, mi no ta un politico, mi ta bin di un bario humilde. Semper mi a logra riba mi mes.. Pueblo a pidi un cambio. P’esey mi t’ey.”
Built with Shorthand