Pakico bo a scoge pa drenta politica y dicon bo a scoge pa join Partido AVP?

Semper mi a pensa cu un dia den bida, mi lo haci mi entrada den politica, vocifera pa pueblo y esunnan cu tin mester defensa, pero mi frustracion a bira mas grandi ora mi a bolbe bek Aruba y mi tabata wak cu hopi cos por wordo cambia y cu pueblo merece un miho representacion. Na 2017 Partido AVP a acercami y e tempo ey ainda mi por a reconoce mi mes den e pensamentonan di e partido, aunke ya mi tabatin algun preocupacion, pero cu e promesa cu e partido lo haci un cambio drastico di rehubenece e partido y cu e amor pa mi pais, mi a tuma e stap hopi mas trempan cu mi a pensa, pa drenta den politica.

Ki tipo di politico bo a imagina cu bo lo bira y con bo ta traha pa yega na e meta ey?

Mi semper a imagina cu mi lo hiba un politica diferente, un acercamento mas educativo p’asina nos hendenan por ta mas participativo den e proceso. Constantemente mi ta purba di trece mi puntonan dilanti na un manera cu tur hende por compronde. Mi ta hiba un politica di contenido y mi no ta bay den atakenan personal. Mi ta tuma mi tempo pa studia y analisa nos situacion riba nos isla, studia desaroyonan internacional y tendencia p'asina por anticipa riba posibel desaroyonan mundial. Mi ta tuma mi tempo pa scucha y interactua cu nos pueblo, pa mi por comprende nos situacion local for di diferente perspectiva y angulo. Di e forma aki mi ta purba pensa riba posibel solucion pa diferente problematica riba nos isla, pero tambe studia e posibilidad y oportunidadnan cu cada situacion por trece cune. Mi ta opta hopi biaha pa reframe situacionnan p’asina por bin cu solucion cu ta mas innovativo. Interactua cu nos hendenan, scucha nan perspectiva y di nos muchanan y mi yiunan sigur ta inspira mi pa mi sigui dilanti. Y ta hustamente e inspiracion aki ta duna mi forsa pa mi sigui sirbi pueblo y yega mas cerca di husticia social y e futuro cu nos tur merece.

Hopi hende ta sinti cu bo a tarda pa anuncia bo kiebro cu Partido AVP, pakico e tardansa cu bo decision y con bo relacion ta cu bo ex coleganan?

Mi a tuma mas o menos 1 luna pa anuncia mi decision paso realmente mi a kere AINDA e momento di e incidente riba e caso di ex minister Briesen cu a trece asina hopi consternacion den e partido, por tawata un momento di haci cambio necesario. Pero esaki no tawata e caso y cu e realisacion aki mi a dicidi di para riba mi mes, retira for di e partido y sigui representa pueblo debidamente manera nan a scoge mi p’e.

Splica nos con e proceso a bay pa conceptualiza bo mesun Partido, for di e pensamento te na ehecucion, kico ta e desafionan mas grandi?

Despues di mi salida di partido AVP mi a tuma tempo pa pensa kico lo bira e next stap den mi carera. Na mesun momento mi famia y sostenedonan tawata comparti cu nan no kier, pa ningun motibo, pa mi no ta participe na e siguiente eleccion. Consecuentemente a dicidi conhunto cu lo tuma un siguiente stap di inicia un organisacion nobo, por lo menos cu e siguransa cu lo tin un plataforma pa e siguiente eleccion, pero alabes toch keda habri pa sigui analisa e desaroyo y panorama politico. A inicia na organisa algun brainstorming sesion riba varios topico importante pa Aruba y na mei 2024 nos a tuma e stap pa cuminsa formalisa lo necesario y haci preparacionnan necesario pa duna contenido na e partido. Desafio mas grandi ta cu un dia tin solamente 24 ora, y esey no ta suficiente pa tur loke bo ta desea di haci, pero asina mes nos ta logra.

Kico ta haci bo Partido diferente na tur e partidonan existente y con bo lo kier convence e generacion nobo cu bo ta realmente cla pa dirigi Aruba na un forma diferente?

Si bo wak rond realmente no a resta mucho partido cu mester inverti mas tempo defendiendo nan actonan di pasado y atake baho na contrincantenan, en bes di ta trahando realmente pa e Futuro di Aruba. Nos ta kere den comparti e realidad di nos pais cu nos pueblo y sigur nos hobennan. Nos ta balora e bos, perspectiva y ideanan di tur generacion. Solucionnan lo mester acapara e necesidad y perspectiva di tur generacion, pero semper teniendo cuenta kico un solucion kiermen realmente na termino largo. Pa por cumpli cu esaki, nos mester por scucha e generacionnan nobo y compronde kico ta e futuro cu nan ta premira y ta considera deseabel.

Kico ta e ideologia mas diferente y progresivo cu abo como lider politico hoben ta para p’e?

Transparencia, integridad y representacion digno.

Segun bo, cual ta e temanan mas importante pa e eleccion aki?

Finanzas (Reino), Costo di bida, Labor, Educacion Vivienda, Adulto Mayor, Participacion Social, Infrastructura e Innovacion Social.

Cu cual partidonan bo ta dispuesto pa forma gobierno si e oportunidad presenta su mes?

Ta prematuro pa bisa esaki como cu ta solamente pueblo tin e contesta aki den su man y no mi persona. Ta pueblo lo bay dicidi kico lo ta e posibilidad pa goberna nos pais. Loke ta sigur ta cu nos balornan y e dignidad di nos pueblo no por wordo comprometi den e proceso. Un di e balornan di Futuro ta union y otro ta transparencia. Esaki ta encera cu pa partido Futuro, un presente y futuro inclusivo ta e punto di salida caminda e derecho y dignidad di TUR hende ta suma importancia. Discusionnan encuanto posibilidadnan lo mester tuma luga cu transparencia di intencion, madurez y profesionalismo cu nos pais merece. E contesta riba e pregunta aki pueblo tin e honor di contesta basa riba con nan lo eherce nan derecho di voto dia 6 december proximo.

Na diferente pais rond mundo ta existi e regla cu un persona no por bira mandatario mas di tanto biaha. Por ehempel, na USA un persona no por core pa un “third term”. Bo ta kere cu esaki ta algo cu lo mester introduci na Aruba tambe? Pakico si of no?

Esaki lo por ta un stap grandi pa crea espacio pa idea y perspectivanan nobo den politica. Ami sigur ta habri pa considera esaki. E concretisacion di esaki ta na parlamento di Aruba cu lo mester vota pa e cambio aki.

Kico ta locual bo lo kier logra como politico?

Conscientisa nos pueblo cu tur dia nan tin e poder di cambio den nan man. Sea riba nivel personal, profesional of colectivo. Y empodera e inspira nos pueblo pa tuma e pasonan pa innovacion personal y asina hunto trece transformacion den e capital humano riba nos isla. Nos isla ta consisti di hendenan sumamente capaz den diferente sector y riba diferente area cu sigur por desaroya nos pais den un forma sostenibel. Ta nos meta pa pueblo recobra confiansa bek den nos estado di derecho y cu nan por wordo dignamente representa y cu esaki por crea bek un stabilidad y felicidad pa cada un ciudadano.

Ademas di estudio y experiencia, kico segun abo ta haci un persona un profesional exitoso?

Caracter y principio!

Kico ta bo mensahe como politico pa e hobennan cu ta bay vota pa prome biaha durante e eleccion aki?

Realisa cu bo voto ta bo stem, derecho y herment pa diseña e Aruba cu bo kier wak. Bo voto awe ta crea e realidad di nos Aruba pa awe, aki 10 aña y pa diferente generacion di bo. E Aruba di awe ta e voto di decadanan eherce pa diferente generacionnan prome cu bo. Realisa cu eherce bo derecho di voto lo tin impacto pa decada y generacionnan nos dilanti. E poder di cambio den bo Futuro ta den bo man.