Angel Soto - Elevando Aruba den e mundo di cinematografico

Naci na Maracaibo, Venezuela, Angel Soto (52) a demostra cu pasion y dedicacion por yega leu. Como un director, productor, scriptwriter, editor, director di fotografia, colorista di imagen, cameraman y actor innovativo, Angel a marca su print den e industria cinematografico tanto na Aruba como internacionalmente. Via su obra, no solamente ta sigui su pasion, pero tambe ta pone Aruba su nomber na halto riba e mapa mundial. Pero e realidad ta cu Angel su pasion pa e arte aki a culminsa desde un edad hopi hoben.

“Mi ta corda como mucha, mi tabata forma parti na lesnan di musica, arte, actuacion , pintura y mas. Mi mama tabata hibami na tur. Cu 8 aña, mi a gana mi prome premio c’un storia di un macaco cu tabata hunga baseball”, Angel ta conta.
Despues di esey el a studia musica na un conservatorio na Venezuela, despues el a sigui cu marketing na Universidad den añanan ‘90. Eynan el a cuminsa traha comercial cu un canal di television. El a traha tambe cu radio te na 1994, ora el a yega Aruba, unda hopi liher el a cuminsa cu su prome trabou na radio local cu su mesun programa cu tabata yama “La Capsula de Alta Presion’.

Poco tempo despues, el a keda recluta como editor y audio na ATV unda tambe e tabata haci graphics. Ora el a sali di ATV, Angel a cuminsa cu su mesun cas di produccion cu tabata yama Soto Production y a sigui haci su trabounan independiente pa diferente compania, entre nan Tele-Aruba tambe cu su programa ‘Oxigeno’. “Mi ta corda cu ami a cuminsa cu e sistem digital den video na Aruba unda no tabatin e sistema aki ainda y pa Tele-Aruba por a pasa mi programanan, mi mester a bay eynan cu mi camara pa nan pase den un sistema analog, y asina nan por a pase na television.”

El a sigui traha y crea programanan manera Mente Sano, Curpa Sano y a produci varios otro programanan y comercial pa diferente hendenan. Semper, cu su amor pa su arte, como su ‘fuel’.

E viahe cinematografico di Angel Soto a cuminsa cu su prome short film na 2020: un pelicula di horror titula “The Last Survivor”. Di eynan, su carera a tuma vuelo cu produccionnan manera “Lockdown” (2021), y su largometrahe di exito “BlackOut” (2022), cual a conkista reconocimento internacional, incluyendo e premio prestigioso di BEST DIRECTOR na e Festival di Pelicula SHUNYATAM na Mumbay, India.

Su capacidad pa conta storia captivante a sigui evidente den “The Search” (2023), “The Legend of Captain Al” (2023), y “The Rich Pirate” (2023), cada uno revelando un aspecto diferente di su talento versatil.

Reconoci como un pionero den e era digital na Aruba, Angel a introduci un forma nobo y progresivo di creacion cinematografica den e isla.

Su uzo innovativo di tecnologia a habri porta pa otro talentonan local y a establece un fundeshi pa futuro cineastanan Arubano.

E no ta facil pa haya fondo na Aruba. E pelicula di Tierras Calientes ta un proyecto di casi 5 aña y ora mi a presenta pa Prins Bernhard Fonds incialmente, e no a keda aproba. Mi a keda informa cu nan no ta duna fondo pa e tipo di peliculanan aki. Nan ta sostene mas produccionnan cu tin di haber cu e.o. historia/cultura. E ora mi a pone e pelicula riba un ‘hold’ y a dicidi pa produci e pelicula di Black Out cu ta trata di e di dos guerra mundial unda Aruba su refineria a keda bombardea pa un submarino Aleman. Eynan mi a haya un poco sosten financiero pero asina mes, no suficiente pa cubri tur cos.

Pa mi por a logra baha e gasto y haci e pelicula realidad, mi mes mester a haci varios funcion den e pelicula manera e trabou di camara man, grafico, editor, audio etc pa por a baha e costonan. E no ta facil. Cada pelicula tin un costo na dje. E instancianan cu ta financia pelicula ta masha poco mes y esunnan cu si ta financia, tin un cantidad di burocracia mi ta yame y kizas ta opta pa traha semper cu e mesun grupo. Esey mi ta haya fastioso. Aparte di mi trabuu creando pelicula, mi ta duna les na EPI tambe, pa sigui motiva hobennan riba e arte unico aki. Na Aruba tin hopi talento pero pa logra reuni e placa pa haya tur e hendenanan aki ta dificil. Di berdad, ami no por biba di esaki, e ta p’ami mas bien, un amor na e arte aki cu ta djis parti di mi bida y mi lo sigui hacie, te na unda mi por.