Desde un edad hopi hoben, ya Kailen Wouters a demostra cu su pasion y dedicacion pa BMX ta sin limite. Awe cu apenas 10 aña, e ta ya un figura reconoci internacionalmente, cu su mirada firme riba e titulo mundial, representando Aruba riba e nivel mas halto. Un soño cu por pre anticipa caba cu pronto, lo bira un realidad. Esaki ta su storia…
Kailen su introduccion na BMX a bini na un edad sorprendentemente hoben. E experiencia a inicial na un careda di Strider cu a marca su caminda den e mundo di BMX, unda e rapidamente a avanza pa competencia mas serio y logra reconocimiento.
Ora e tabatin 7 luna, ya e tabata cana pues pa ora cu el a yega 1 aña, e tabata tur caminda su mayornan ta conta. Cu su 2 aña, e tabatin su prome experiencia den un careda di ‘Strider’. “Nos a bay wak un primo core na un careda di BMX di e team di Rough Riders. Ora nos a yega eynan cu e strider, algun mayor a convence nos pa presta un helm (casca di pinda nan ta yam’e) y laga Kailen djis purba y tuma parti na e careda di balance bike. Cu edad di 3 aña el a cambia pa un Mini BMX y di eynan, e no a para mas. El a siña pedal cune rond di cas,” su mayornan, kende a yuda forma su caminda como atleta, ta conta yena di orguyo.
Su cambio pa un Mini BMX na edad di 3 aña a wordo motiva pa su prome victoria den un carera di strider na Sarasota, Florida. E victoria aki tabata e punto di lansamento pa su carera den BMX. "Gana na Sarasota a mustra nos cu Kailen tin un talento real," su famia ta bisa. Desde e momento ey, el a bira un miembro prominente di ekiponan prestigioso manera Rough Riders na Aruba, su prome team cu el a cuminsa cune prome cu el a cumpli 2 aña y J&R Bicycles na Merca. “Kailen tabata ser mira door di J&R pa un tempo caba. Mirando cu e tabata core pa un otro team duro di Merca y mirando cu e ta un World Ranked Rider, esaki tabata net loke J&R tabata buscando. Hunto cu su actitud positivo y su humildad, esaki a haci cu ora cu aña a bolter, J&R a tuma contacto cu nos, ofreciendo Kailen un spot riba nan team pa 2023. Nan meta tabata pa bay pa e di 10 biaha Campeon Nacional. Nos a tume oferta aki y na 2023 J&R a sali e team Campeon Nacional di Merca, un biaha mas.”
Cu su edad hoben caba, el a conoce hopi pais caba manera Corsow, Colombia, Hulanda, Alemania, Francia, Scotland y diferente estado na Merca. E ta biahando pa un minimo di 6 careda pa aña. Su logronan cu ta inclui 4x Campeon Nacional di Aruba, multiple top 20 na Merca, y posicionnan destaca den campeonatonan mundial cu ta demostra su poder como competidor. Su abilidad pa domina su categoria di edad ta basa riba "disciplina cu su entrenamento, amor y pasion pa e deporte," segun e mes ta bisa. Actualmente e ta e Sub-Campeon di Mundo (#2) den boys di categoria di 9 aña.
“ Nos como mayornan cu tambe a practica deporte sa e importancia y kico un deporte ta haci den crecemento di un mucha pues nos semper a stimula Kailen pa train duro pe logra su soñonan.” Financieramente tambe ta mayornan y famia ta yud’e actualmente.
Apesar di su logronan den BMX, Kailen ta mantene un balans entre su estudio na EDU Campus y su dedicacion na deporte. Su scol ta stimula muchanan den nan deporte cu e posibilidad pa haci lesnan online. "E reto mas grandi ta pa e keda bij cu su lesnan. Hopi biaha e mester haci les na cas tambe pa por logra caba cu tur cos. E ta yega for di scol cambia paña pe come y mesora e mester haci su les pa no tin nada atrasa.
E sa cu si su scol no ta na ordo, e lo mester tuma un pauze den su deporte pues e ta hasi su lesnan na cas e ora pa e por bay train atardi. Ora e caba cu esaki e mag di hunga. Atardi pa 5’or e ta prepara pa bay practica su deporte. E ta yega cas bek pa 8’or pa baña, come y prepara pa drumi. “Nos ta purba cu pa 9’or eta drumi.
Aparte di BMX, Kailen ta landra pa Aruba Dolphins. Apesar cu e no ta logra train mucho, e ta competi toch. E ta participa den triathlon tambe. E ta gusta bay lama, bodyboard of snorkel.
Kailen no solamente ta aspira pa ta e mihor den BMX; e kier tin un impacto positivo riba su comunidad na Aruba y den e mundo di deporte local y internacional. "Mi kier cu mi logronan ta inspira otro muchanan pa sigui nan soñonan," Kailen ta mira. Cu su edad hoben, e ta mira cada competencia como un oportunidad pa representa su isla y motiva otronan.
Built with Shorthand