Disciplina, respet, hermandad cu atencion na norma y balornan ta e puntonan di e fundeshi cu e crecemento di Aaron ta ancla na dje. Lanta c’un famia den scouting y cu ta atende festivalnan cultural of eventonan local, como mucha caba, e ritmonan cultural aki a bira parti di su ser. Y ta e ritmonan ‘ki hunto cu su balor y normanan halto, ta loke awe ta haci cu su disponibilidad na traha pa promove, cuida y crece nos cultura den diferente forma ta hacie un perfecto BOS DI NOS TERA.
Aaron Arenas (22) ta un studiante di International Business na Den Haag, bibando na Rotterdam pero naci y cria na Aruba. Su infancia den e bario di Tanki Leendert y su participacion activo den deporte y Grupo Scout Ora Ubao a forma e fundeshi di su desaroyo personal y profesional. "Mi a siña aprecia e balor di mi cultura y e importancia di contribui na mi comunidad," Aaron ta bisa. Cria den un ambiente multicultural, cu su mama Arubiano y tata Colombiano, Aaron a crece apreciando e diversidad cultural. "Mi famia y e experiencianan cu mi a biba como hoben a inspirami pa sigui soñonan grandi, no solamente aki na Aruba pero tambe internacionalmente." Aaron su lema di bida, inspira pa Robert Baden-Powell, "No laga e mundo mane bo a hay'e, lage miho cu bo a hay'e," ta su guia tras di su aspiracionnan y logronan.
Desde su 11 aña caba, Aaron a demostra un pasion profundo pa servicio voluntario, un trayectoria cu a hib’e na ricibi reconocimento significante den su comunidad y mas leu. Su envolvimiento extenso cu Grupo Scout Ora Ubao y su participacion activo den varios proyecto comunitario manera Aruba Doet y Fiesta Rotaria, ta demostra su compromiso pa mehora su isla natal. "Mi a cuminsa cu trabounan voluntario desde chikito, y cada experencia a yuda forma e persona cu mi ta awe," Aaron a refleha. Su dedicacion a ser reconoci cu nominacion pa Poder di Hubentud y mas despues, Volunteer of the Year, un logro cu a solidifica su lugar den e Comision Promove Cultura, unda cu e ta yuda organisa Festival Un Canto pa Aruba. E apoyo incondicional di su famia y mentornan a inspir'e pa acepta retonan nobo, yuda lidera e festival, y contribui na e enrikecimiento cultural di Aruba.
“Na 2017 mi a keda acerca pa Ray-anne Hernandez y Jo-anne Croes pa forma parti di CPC. Ami semper a keda bay e festival pa apoya amigo y amiganan cu tabata participa sea musicalmente of cantante den e festival. E oportunidadnan pa liderazgo y desaroyo personal cu mi a haya te awor, a traha e fundeshi pa mi sigui pusha mi mes y inspira otro hobennan." Su contribucion nan a habri porta pa mas oportunidad nan, incluyendo su papel den e Royal Carnival Group y su reconocemento cu e "Premio Estimulo Gobernador Felipe B. Tromp 2022." Aaron su mensahe ta cla: e potencial di hobennan na Aruba ta inmenso, y e ta dedica pa demostra e mundo exactamente esaki.
Un capitulo significativo den su carera profesional ta sigur fungi como funcionario den protocol pa Gobierno di Aruba bou guia di John John Flemming. "E oportunidad pa traha cerca di e Minister President y contribui na e Bishita Real 2023 a habri mi wowonan riba e importancia di cooperacion y dedicacion den sector publico," Aaron refleha. “Mi ta kere politica na Aruba poco poco ta cambiando y ta innovando, solamente ainda e no ta suficiente “aantrekkelijk” pa e hobennan na Aruba involucra nan mes. Politica ta keda algo hopi sushi na Aruba y pa e motibo hopi hoben no ta interesa. Y si politica ta algo pa mi den futuro, mi ta kere cu postula mi mes riba un lista politico, e contesta ta un ‘NO’. Pero, si mi lo desea di semper ta involucra den politica na Aruba.”
Durante e celebracion di Carnaval 70, por a mira Aaron hopi activo durante henter e temporada, pero realidad ta cu ta desde 2020, el a bira caba parti di SMAC trahando e tempo aki caba cu Jason Brown y awor cu Darren van Ommeren. “Locual mas mi gusta ta di por implementa ideanan innovativo, reuni cu personanan encarga cu gruponan di carnaval, e stakeholders, organisa e eventonan, cumpli cu tur cos y haci e carnavalistanan contento, paso ta nan ta haci carnaval. E parti mas desafiante ta cu lomba mester ta hancho pa ricibi tur critica sea malo of constructivo, hasta esunnan sin base y cu ta purba kibra ‘bo. Pero ora bo ta traha den ekipo, y traha cu un consenshi limpi, sin ningun malicia, tur cos lo bay bon. Pa e ultimo dos periodonan di carnaval cu ta 69 y 70, hunto cu Darren, Edelysse y Cherryldine a sa di pone carnaval riba pia. Mi ta semper agradecido na nan pa por a laga mi experiencia e banda aki di carnaval.”
Kico abo mes ta pensa cu ta e desafionan mas grandi di nos carnaval?
Carnaval tin varios reto cu tiki tiki nos ta drechando y cu por crea structura p’asina tur hende por sa cua liña pa cana. SMAC ta un board di 11 miembro y un ekipo di voluntario di 30 hoben y hoben adulto. Mi ta kere cu mas voluntario, mas hoben, mas ideanan nobo, mas innovacion nos por mehora tur e retonan cu SMAC tin. Solucionnan ta facil pa presenta pero na final di dia bo lo mester e sosten y e apoyo di e gruponan cu ta participa den carnaval. Nos tin cu corda cu Carnaval ta bida, carnaval ta celebracion y nos mester semper mantene e spirito aki bibo!”
E posicion di presidente di SMAC ta algo cu bo ta ambiciona?
“Un presidente den 2 aña no por haci mucho pa drecha tur e retonan. Si statuto por keda cambia c’un presidente por bay 5 aña, mi tin durf di bisa cu e lo ta un trabou cu mi no lo wak un pakico no tum’e.”
Aaron awor ta den un etapa excitante di su bida como studiante di International Business na The Hague University of Applied Sciences. E ta encanta cu e sofisticacion, modernisacion, y innovacion cu e ta topa na Hulanda, aspectonan cu ta contribui profundamente na su desaroyo personal y profesional. E ta probecha cada oportunidad pa amplia su red di contacto y integra su mes den e mundo di entretenimento y organisacion di evento. “Mester por convence mas hobennan pa no tene miedo. Ora bo pone un meta, haci tur cos pa por logra esaki. Tur loke mi a logra te awor, ta danki na e fundeshi solido cu mi famia y mi comunidad a pone."
“No tene miedo y semper yama danki. Nos mester demonstra cu hobennan tambe por haci e diferencia y asina poco poco e hobennan lo tuma over. Nos ta futuro di mayan!
Built with Shorthand