No ta tur storia di bida profesional ta cuminsa na un universidad. Algun ta cuminsa den luganan y na momentonan completamente diferente y hasta kizas den chaos. Thaina a nace y lanta na Aruba, den un mundo unda camara, video, luz, produccion y creatividad tabata ingreso y trabou di full un famia. Su mayornan, doñonan di Pro-Video, un di e prome companianan di produccion di video na Aruba, tabata pionero den proyectonan pa hopi companianan priva, banco, hotel y gobierno. Nan tabata tambe entre e fundadornan di ATV 15. Pues, el a crece den un estudio, rodona pa script y e “buzz” di produccion, natural cu el a pensa cu television y noticia tabata su futuro. Pero su caminda no tabata lineal cu esaki. E tabata un mucha cu curason rebelde y un mente cu no tabata gusta regla. El a drop-out di scol cuater biaha y cada vez e tabata bisa su mes: “Lo mi resolve esey despues.” El a cuminsa traha na Telearuba, editando noticia tape-to-tape, pensando cu esey tabata suficiente. Pero durante un bishita na graduacion di un amiga na Orlando, e momento di su ‘awakening’ a yega: mientras cu su amiga tabata subiendo escenario pa su graduacion, Thaina a sinti cu e sinembargo, tabata ainda, na e mesun lugar den su bida. Eynan, algo grandi a move y cambia den su ser.
THAINA MADURO
THAINA MADURO
“Mi a bolbe Aruba y enfrenta tur mi miedonan.” Cu 23 aña, Thaina a logra su diploma di high school y dos aña despues, el a opta pa muda pa Orlando, Florida, pa bay studia. Durante 10 aña cu a sigui, Thaina a traha, studia y forma su futuro. El a logra su Associate Degree na Seminole State College y despues su Bachelor of Science den Radio & Television na University of Central Florida, cu minors den Hospitality, Digital Media, Film & Cinema Studies, y Marketing. Durante e tempo aki, el a conoce su compañero di bida (awor 16 año hunto), y a bira mama di un yiu muher, y dos aña pasa tambe di un yiu homber.
Na su regreso Aruba, el a aplica pa docena di trabou, pero hopi biaha e tabata tende e mesun frase: “Bo ta over qualified.” Eventualmente, el a drenta Stellaris Casino como Marketing Supervisor, caminda el a descubri su pasion pa hospitality marketing. Dos aña despues, un conversacion simpel cu e docente di su yiu a cambia tur cos. “Bo yiu a bisa cu e ta wak bo mainta solamente.” Esey tabata e momento cu Thaina a haya un otro ‘awakening’. El a haci un promesa na su mes; “Mi no lo sacrifica mi presencia cu mi famia pa un paycheck.” E promesa aki a habri portanan pa un otro capitulo den su bida. El a tuma un posicion na Digicel Aruba como Marketing Executive, cual el a haci pa casi pa 3 aña, liderando campañanan, strategia y lansamento di marca. Despues, el a sigui crece den su experiencianan y a bira parti di e opening team di Embassy Suites by Hilton Aruba Resort como Marketing Manager. Pero mientras cu esakinan tabata tumando lugar, e nacemento di su yiu homber a hiba soño y propositonan den un direccion mas specifico “Mi a realisa cu mi no kier a sigui traha pa e soñonan di otro, sino pa esun nan di mi mes.”
C’un baby den brasa y den un temporada cu Thaina ta cualifica como su ‘meltdown’ di mas grandi, el a funda Lumin8 Marketing Agency, un agency remoto, dirigi pa muhernan y diseña pa yuda negoshinan briya cu autenticidad. El a cuminsa c’un solo diseñador, paga di su mesun salario. Awendia, Lumin8 tin seis muhernan di diferente edad y background, cada un aportando cu nan mesun toke y magia.
Lumin8 a cuminsa como un idea chikito, pero e vision a crea su mesun vuelo. Awor, Thaina ta dirigi workshopnan sold-out tanto na Aruba como na exterior riba Canva, branding y creatividad den negoshi. “Mi ta gusta loke mi ta haci. Mi no ta sinti mi ta traha, mi ta diberti mi mes,” e ta conta c’un sonrisa di gratitud. P’e, educa otro ta un forma di coneccion y di recorda su mes pakico el a cuminsa.
Durante su carera, el a mira lider nan cu ta dirigi cu miedo y ego. El a priminti su mes: “Mi no lo lidera asina.” E ta lidera cu empatia, emocion y energia.Thaina ta splica cu e no ta busca balance, e ta busca armonia. “Como mama y empresaria cu a traha den tres gran industria, mi a compronde cu e famoso “work-life balance” no ta realidad, e ta un mito cu nos a aplica. Pa hopi aña mi a trata di tene tur cos perfectamente pareu; e muher cu ta duna 100 porciento di su mes na su famia, trabou, salud y bida social pero semper algo tabata sufri, y hopi biaha esey tabata mi mes. Mi tabata presente pa tur hende, menos mi mes.” P’e awor, armonia ta e realidad. “Mi a siña cu ta bon pa pausa pa ta presente cu mi yiu, y ta bon tambe pa hinca mi mes den trabou ora creatividad ta yamami. Balansa real no ta perfeccion, e ta aliniacion.” Thaina ta kere den energia y autenticidad: si un proyecto no ta briya natural, e no ta fors’e. “Mi a haya e balentia pa bisa ‘masha danki’ y sigui dilanti, no pa arrogancia, sino pa respet pa mi paz.”
Cu ayudo di su business coach, el a enfrenta e miedonan di faya, visibilidad y hasta di exito cu tabata tene atras. Awor e ta guia sin miedo, sin filtro, y c’un meta: lidera pa inspira, no pa controla. E mentor aki a yud’e bira e lider cu e tabata destina pa ta, un guia creativo sin miedo di ta diferente. E no ta competi cu ningun hende, pues e ta colabora cu dos otro agencia di marketing riba isla, creando hunto, paso asina por logra mas.
Thaina a traha cu Go Cultura Foundation, dirigiendo tur marketing pa e CreActivo Conference 2025. El a lidera un tayer di seis siman pa Parlamento Hubenil, siñando politiconan hoben riba social media, comunicacion, branding y storytelling. El a crea un ola di inspiracion tanto na Aruba como afor, workshopnan sold-out den Canva, branding y creatividad. Ora e ta siña, e ta ribe su element.
Thaina ta mira hopi hende, specialmente muhernan y studiante, cu ta sigui e caminda cu sociedad ta spera, mientras e voz p’aden ta grita “mi kier mas.” E ta kere cu nos a siña pa conforma, pa tene nos soño chikito y pa no tuma riesgo. “Pero tuma riesgo no ta un locura, e ta balentia.” E mes a cay cuater biaha, a bolbe skol cu su 23, y mas laat den bida el a crea un empresa cu awor ta yuda otro briya. “E no ta imposibel, e ta simplemente incomodo.”
E crecemento real ta yega ora bo enfrenta bo miedo nan y bo para di biba pa expectativa di otro.
Built with Shorthand