"Desde prome cu mi tin tino caba, mi famia a hincami den carnaval, pues mi a siña baila prome cu mi por a cana," Rossini van Wijk ta cuminsa conta na harimento. E ta e descripcion perfecto di un Arubiano cu carnaval profundamente ancla den su curason.
Apesar di ta bibando pa 21 aña leu di su isla natal Aruba, no tin un momento cu e no ta keda sin promove, alaba y comparti momentonan special di e historia di Aruba su carnaval. Sea e ta prepara reinanan pa tuma parti na competencianan internacional, diseña trahenan di carnaval of comparti post riba medianan social cu ta hiba nos bek den tempo cu momentonan special di nos carnaval. E ta constantemente demostrando Aruba su amor pa carnaval y ta recorda nos riba un parti importante di nos cultura y identidad. Pues, den su forma unico, Rossini ta representa un perfecto BOS DI NOS TERA.
“Tempo cu mi a bay Hulanda, mi a studia na Amsterdamse ToneelSchool, tambe mi a studia diseño, makiyahe, photography, pasarela, dressman, Art & Fashion History, Materials & Choreography.” Asina por bisa, cu e amor pa diseño a keda agrega na e amor pa carnaval y hunto, a crea un abilidad perfecto pa Rossini. Cu e abilildad ideal aki, el a diseña un sin fin di trahenan pa Aruba su Carnaval. Di gruponan completo pa personanan individual, cantantenan y reinanan di Carnaval. “Te cu awe ainda mi ta design pa Aruba su dushi Carnaval. Desde Hulanda mi a design pa algun persona y seccion nan pa Carnaval 70.” E crecemento di diseñador nan talentoso den añanan reciente cu e ta mira awor, ta algo cu ta dune hopi alegria mirando un generacion nobo aportando cu nan talento na Aruba su Carnaval.
Tur e trabounan cu Rossini a bin ta haci, apesar di ta leu di Aruba, ta demostra cu ni distancia ni tempo a disminui su fervor pa Carnaval di Aruba; mas bien, el a bira un estilo di bida p’e. Su diseñonan a capta atencion na Hulanda, resultando den colaboracionnan cu agencianan di moda y directornan di certamen nan di beyesa pa diseña y crea trahenan Nacional. Rossini a manda trahenan nacional no solamente pa Hulanda pero tambe pa Aruba, Corsou, Belgica, Luxemburgo, y hasta Francia, logrando victoria den e categoria di Mihor Trahe Nacional pa Hulanda, no menos cu nuebe biaha caba. E ultimo tabata na Juli 2023 durante e Certamen di Mrs. Netherlands Universe unda a dun’e credito.
Pa mas di 23 aña, Rossini ta lidera e grupo puramente Arubano di Carnaval, Kingdoms Under The Sun, na Hulanda, alcanzando reconocemento y top puestonan den competencia nan teni. “Nos grupo casi semper tabata sali na promer, di dos of di tres lugar,: e ta bisa c’un orguyo grandi. Mescos cu e reinanan cu e ta manda pa carnaval na Hulanda, semper sea nan ta gana of clasifica, representando asina Carnaval di Aruba internacionalmente den forma excepcional. Semper e reinanan ta of naci na Aruba of ta di descendencia Arubiano. “Mi ta demasiado orguyoso di nos isla ta stima.’
Via di Organisacion Internacional di Carnaval (FECC), introduci pa su prima Marcia Stamper na 2006, Rossini a biaha henter Europa, mustrando e energia di Carnaval di Aruba. Su esfuerso nan a eleva Aruba como un destinacion desea pa hopi den paisnan manera Montenegro, Serbia, North Macedonia, y mas leu ainda, halsando Aruba. “Mi reina Imara Thomas a sali Reina di Carnaval di Hulanda y despues Reina Internacional di Carnaval na Francia. E aña despues tabata Marcie de Jongh kende a haci mescos, na Montenegro y e siguiente aña Gishlaine Paula a gana Mihor Costume na Serbia. Claro cu nos ta presente tambe na Spaña, Inglatera, Francia, Belgica y Alemania. Na tur e paisnan aki awor, Aruba su bandera ta conoci.”
Rossini ta bisa cu promer cu 2009, e bandera di Aruba no tabata conoci na Inglatera, London, ciudad conoci di tin e carnaval mas grandi di Europa, cu mas di 4 miyon hende. “Hunto cu mi reina Emily Burkley nos a introduci nos bunita bandera entre tur e otro nan di Caribe.” Su trabou a ser reconoci cu e Medaya di Merito di Carnaval y e Medaya di Jubileo for di FECC (Federation of European Carnival Cities), entre otro, resaltando su dedicacion pa promove Carnaval di Aruba globalmente. Tambe el a ser honra na Spaña y a ricibi reconocimento for di Minister di Cultura y Finanza di Aruba, Xiomara Maduro, pa su contribucionnan.
Awendia, Rossini ta continua na promove Carnaval di Aruba unda cu e ta bay.
E aña ‘ki, el hasta el a manda Señora Carnaval Aruba, Zahair Marin, pa competi internacionalmente, cu e meta pa amplia presencia di Carnaval di Aruba ainda mas. Entre su trabou ta diseña trahenan Nacional pa reinanan y duna les di etiqueta den henter Europa na reina y mister nan, e ta mustra consistencia y balor na comparti su conocemento y talentonan. Su compromiso ta uno; mantene su mes ocupa pa semper, tanten cu e tin bida, na promove e carnaval di Aruba cu ta den su curason. "Despues di Nos, ta Nos mes," e ta conclui, resaltando su amor eterno pa e rikeza cultural di Aruba.
Built with Shorthand