Ronchi De Cuba, Aruba su diseñador stima. E ta un nomber y figura special y sin duda, Ronchi ta sinonimo cu Creatividad y Innovacion den industria di moda na Aruba. Cu mas di tres decada di experiencia, Ronchi a consolida su reputacion como un pionero den moda di Caribe, influenciando Aruba su mercado local den con pa mira, experencia y tribi na agrega moda den nan bida diario, sea den forma personalisa y hasta atrevido, sin lubida e conexion profundo cu Aruba su herencia cultural.
Ronchi De Cuba
Ronchi De Cuba
Como e mente creativo tras di TRASH BY RONCHI, SOLO BY RONCHI, y RONCHI DE CUBA, Ronchi a transforma e paisahe di moda na Aruba. Na 1989, Ronchi a drenta e mundo cu a marca su nomber awe, pa semper. Despues di a studia Fashion Design na Merca el a cuminsa cu su prome trabounan. Durante fin decadanan ‘80 y cuminsamento 90 caba, Ronchi a cuminsa duna contenido na su estudio den moda y trece esaki pa Aruba creando un movecion nobo. Di su buskeda pa modelonan local como seleccion y entrenamento di esakinan pa showman cu a brota di creatividad, Ronchi a cuminsa crea su legado como e pionero di moda na Aruba. Conoci pa su coleccionnan di un mescla di diseño avant-garde y estilo versatil, Ronchi semper a traha moda pa tur hende; di e figuranan mas esbelto pa esnan cu curva. Na 2004, cu su boutique, TRASH BY RONCHI, cual mas c’un tienda; el a crea un hub pa expresion artistico y colaboracion. “Moda pa tur hende” ta con e semper a referi na esaki. Cu TRASH BY RONCHI, el a duna plataforma pa talentonan nobo, organisando evento cu ta uni artista, diseñador, y comunidad. Su compromiso pa inclusividad ta evidente den su diseño, cu ta inclui tur tipo di curpa, genero y estilo personal.
" Mi a cuminsa cu #RONCHIABISA pa duna un seyo riba locual mi kier expresa y comenta. E ta mi forma di duna autenticidad na mi bos den un mundo cu social media a revoluciona casi tur aspecto di bida."
"Mi a logra permanece relevante den e industria aki door di no worry en lo absoluto locual otronan pensa dimi" - Ronchi De Cuba"
Hende ta cambia den bida. Esey ta ok. Laga nan. Abo zorg pa semper bo sa ken ta ken y kico ta kico" - Ronchi De Cuba
"Amargura ta perhudica esun cu ta amarga, mescos cu felicidad di engrandece esun cu ta felis" - Ronchi De Cuba
You will nevertheless find me a rock that bends to no wind." - Queen Elizabeth I
Durante su carera, Ronchi a participa na hopi desfile di moda internacional, representando Aruba cu orguyo. Su metodo innovativo a gana reconocimiento y a expande su alcance mas leu di Aruba. Como mentor, el a guia siguiente generacion di diseñadornan, compartiendo su conocemento y inspirando nan pa sigui nan soño creativo.
Pafor di moda, Ronchi ta profundamente envolvi den esfuersonan positivo, usando su plataforma pa apoya iniciativanan di comunidad. Su contribucionnan na identidad cultural y creativo di Aruba ta haci di dje un icono real, inspirando otro pa explora nan potencial y reconoce y pusha nan individualidad.
Den e recien evento di Aruba Fashion Week 2024, Na November 2024, Ronchi a sobresali durante e 5-aniversario di Aruba Fashion Week cu su coleccion di haute couture mas reciente, "Aruba Alegria." E linea vibrante y energetico aki, celebra Aruba, presenta cu telanan increibelmente special y diseñonan inspira pa e sentimiento di alegria y e bunitesa natural di Aruba. Dedica na e muhernan special den su bida, "Aruba Alegria" ta un homenahe cu a refleha nan influencia den cada pieza cuidadosamente elabora. Conoci pa su mensahenan positivo riba social media, Ronchi a usa e coleccion aki pa reforsa su status como un diseñador local stima cu ta combina arte cu emocion. Y e sentimiento aki a keda entrega bek na dje , unda e publico a lanta para pa duna aplauso den forma di aprobacion y gradicimento na Ronchi de Cuba. Un gran ‘standing ovation’ pa un gran figura y pionero di Moda di Aruba.
"You will nevertheless find me a rock that bends to no wind."
- Queen Elizabeth I"
Built with Shorthand