Tin biaha berdad e ta importante pa scucha e voz ey cu ta bisabo pa ‘think big’ y no tene miedo pa habri bo hala nan y bay tras di bo soño nan di mas grandi. Rawy a scucha e voz interno ey cu awe a trece un cambio unico den su bida. Cu su 28 aña, el a crea su mesun negoshi exitoso na Hulanda, ta su mesun hefe, viahando constantemente rond mundo, por traha unda cu e ta rond mundo cu e marca nan di mas grandi mundialmente, y por domina varios aspecto den e mundo di e-commerce. Y, esaki ta djis e cuminsamento. Rawy ta cla pa mas…
El a lanta den un famia humilde na Aruba den bario di Dakota. Mirando bek, e ta realisa cu semper e tabatin ambicion pa ‘exito’. El a saborea e prome pruebanan di haci negoshi cu su 14 aña como DJ. Musica tabata su pasion y el a transforma esaki den su mesun negoshi hunto cu su bon amigo nan cu su miniteca yama “Youth Star’.
Di eventonan manera matrimonio, fiesta nan publico, priva, Rawy y su amigo nan tabata presente tur caminda. Nan popularidad tabata na top. E tempo aki tambe nos revista a entrevista y skirbi un segmento di e grupo y nan exitoso miniteca ‘Youth Star’. Esaki tabata pa Rawy, e cuminsamento di algo mas grandi, pero pa yega eynan, e mester a desvia su wowo nan pafor di Aruba.
Mas o menos 10 aña pasa, el a tuma e decision pa bay biba na Hulanda buscando oportunidad nan nobo. Eynan, el a cuminsa su estudio den tecnologia di audio explorando tambe videografia trahando video nan musical y di evento nan su mes.
Na 2017 sinembargo, un oportunidad nobo a yega na su porta. Tur cos a cuminsa ora el a topa c’un aviso riba instagram motivando riba e posibilidad pa traha placa online. E tabata sa cu esaki ta algo cu mester a siña y ‘master’.
Rawy su gana pa siña tur loke ta come y bebe di e-commerce a pone hinca su atencion completo den e practica aki di haci negoshi. El a siña con pa maneha avisonan riba instagram, facebook y asina a cuminsa haci su servicionan disponibel. Entre avisonan di productonan pa cacho y otro mercancianan manera bril, tur a sirbi como un forma pa el a siña con pa crea webshop, bira un experto den social media marketing y refina y ehecuta su abilidad nan di copywriting.
Como co-fundador di e compania NASENTIA, Rawy a pone su experticio den accion. Un compania di inhaler basa riba ingrediente nan natural a duna Rawy e prome sabor di exito. Aki e por a mira claramente, cu tur cos ta posibel. E hoben cu tabata DJ na eventonan na Aruba, awor tabata co-fundador di un negoshi unico na Hulanda, bendiendo un producto hopi unico pa tur caminda di mundo cu varios shen mil Euro den ganashi ya caba den e prome luna nan di su existencia. No a dura mucho cu e negoshi a expande di Hulanda pa Alemania y awe, ta un compania stabil y exitoso.
Expandiendo su conocemento den e mundo di e-commerce mas a inda a haci cu Rawy a explora y busca pa haya sa mas di e mundo di influencer marketing agregando esaki tambe asina na su portofolio. El a aplica e conocemento tambe den su negoshi di NASENTIA y aki ta unda un cos a hibe na otro. El a bin haya su mes cu oportunidadnan nobo den e ramo aki na London cu e compania 'ThisThat'. Cu nan enfoke riba midi campañanan di mercadeo di influencer, 'ThisThat' a drenta den partnership cu agencianan global manera Uber, KFC, Amazon, Meta, Starbucks, and Walmart, cual a bira e marcanan cu Rawy a haya su mes ta traha cu nan.
Esaki a bira naturalmente, un oportunidad unico pa Rawy, cu a completa mas ainda su conocemento den e lenguahe di e-commerce y marketing cu ta importante awendia.
Awe Rawy di Aruba ta Rawy di mundo. E ta viaha y por haci su trabou for di cualkier lugar na unda e por ta e momento ey. E ta un Paid Media Manager pa ThisThat mientras na mes momento, e ta na encargo di e presencia online di su compania NASENTIA. Den tur esaki, e no a lubida di unda e ta bin. Aunke e ta na Europa, su mente y curason ta cu Aruba tambe p’esey e tin plannan pa Aruba, algo nobo cu e ta formando y lo ta cla pa presenta na su momento corecto.
Pa Rawy, ainda esaki ta e cuminsamento. Su portanan ta keda habri pa sigui explora, siña y ehecuta.
“Si bo kier algo, bay pe no give up. Awor, tur informacion ta online dus no tin nada pa stop bo. Rondona bo mes cu hende nan cu mesun mentalidad y ambishon cu bo. Letterlijk casi tur informacion di business bo por haña online riba youtube y tambe tende hopi podcast di e hende nan storia cu e letterlijk a ‘make it’ caba y aplica esey. Nunca stop di siña! Tur aña mi ta cumpra curso nan nobo pasobra tur cos ta keda cambia den e industria, manera aworaki mes cu AI. Mi tin paar di software/tools nan cu mi ta usando awo di AI cu ta lagami caba mi trabou den 40% di tempo mas liher, djis door di adapta hopi liher den e industria.
Built with Shorthand