Na Aruba, un idea por bira realidad cu e apoyo corecto. Desde su fundacion, Qredits Aruba a proba cu negoshinan chikito por keda crece, y cu pasenshi, dedicacion, guia, sosten y e financiamento ideal, bo por logra mas. Cu tur e detayenan ganador aki, awe Qredits ta celebrando un logro historico yegando na su di 500 prestamo, otorga na un empresario local NU-Wave Entertainment, un compania den e industria di entretenimento. “Nos ta honra di a bira e di 500 recipiente di prestamo di Qredits Aruba,” Lee Croes ta cuminsa na bisa.
LEE CROES
LEE CROES
Lee Croes su trayecto pa yega awe na su negoshi, ta cuminsa cu e ingrediente principal, un amor pa musica y entretenimento den radio y cu eventonan local. “Mi tabata host di radio y MC pa un show radial mainta y esaki a habri porta pa mi cuminsa toca como DJ na eventonan rond di isla,” e ta conta. “Musica semper tabata mi pasion y berdad ta cu mi no pensa cu eventualmente lo mi tin mi propio empresa den e industria aki, un dia.”
Pa sobresali den un mercado competitivo, e ekipo a dedica su mes na calidad y presentacion exclusivo, creando un mescla di elegancia tradicional cu innovacion moderno. “Nos no ta solamente toca musica; nos ta crea un experiencia, un ambiente,” e ta bisa. “Nos ta traha c’un standard mas halto, loke a haci nos un preferencia pa weddings y eventonan corporativo.”
Pero e caminda no tabata semper facil. E empresario ta revela cu un di e retonan di mas grandi tabata logra visibilidad y credibilidad den un sector cu hopi competencia. “Como compania nobo, nos a sobresali dor di entrega calidad constantemente, ta responsabel y maneha tempo y detaye cu precision. Un otro obstaculo tabata crea nos inventario di ekipo, ya cu e empresa a cuminsa sin ningun material propio.“ Nos a reinverti, a traha duro, y poco a poco nos a logra expande nos inventario.
“Un di e momento mas gratificante den nos carera tabata ora nos a sigura nos prome prestamo empresarial despues di añanan di trabou duro. Un otro logro tabata logra establece nos mes como un proveedor di entretenimento di nivel halto na Aruba, confia tanto pa negoshinan local como internacional. Adicionalmente, creando oportunidad di trabou pa otro hende a resulta den un experiencia hopi satisfactorio, permitiendo nos sigui crece y maneha mas cu 160 weddings solamente den e ultimo aña.
Lee Croes
Lee Croes
E exito di e negoshi ta solamente un cuminsamento. Pa e proximo 2 – 4 aña, e plan ta cla: expande pa Corsow y Boneiro y fortalece e relacion nan den e mundo di entretenimento. “Nos ta traha riba e AV division, nos studio di grabacion y produccion, y nos ta introduci nos propio fundacion nonprofit pa yuda talento local.”
Lee ta enfatisa cu industria di entretenimento na Aruba mester subi di nivel y merece mas respet. “Nos no mester sigui ta un sector den cual talento no ta keda balora. Arte y entretenimento ta un trabou di pasion y entrega, no solamente un presentacion di tres ora.”
Segun e empresario, e cambio den mentalidad ta esencial. "Nos ta pidi menos competencia riba prijs y mas enfoke riba calidad y experiencia. Esaki lo duna mas sostenibilidad pa tur profesional den e campo aki.”
Pa esnan cu ta soñando cu un propio negoshi, e empresario tin un conseho:
1. Mantene bo finansanan den orden.
2. Busca mentor cu tin exito y siña di nan.
3. Enfoka riba realisa bo meta y no solamente riba "show" den social media.
4. Tene pasenshi y confia den bo mes
E prestamo di Qredits no solamente a duna e negoshi e oportunidad pa fortalece su inventario y amplia su servicionan, pero tambe a reforsa su confiansa den crecemento sostenibel. Nos experiencia cu Qredits Aruba ta simplemente excepcional. Nan guia y apoyo tabata balioso den tur e proceso, for di desaroya nos plan di negoshi te na nabega e aspectonan legal.
Lee: "Nos ta recomenda Qredits sin duda na tur empresario cu ta busca un base solido pa crece. Nan flexibilidad ta mas amplio cu otro institucion nan financiero tradicional, loke ta haci nan un opcion ideal pa esnan cu ta soña grandi."
"Busca guia, planifica bon, y traha riba un base financiero fuerte y realista. No semper lo bo por haya tur cos di un solo biaha, pero un fundacion solido lo yudabo crece den futuro."
Built with Shorthand