Pa Natasha Rachel DeWindt (34), e caminda no a cuminsa c’un plan ni c’un inversion grandi. El a cuminsa simpel, c’un hemchi, algun producto y un pasion cu ya tabata presente desde un edad hopi hoben. “Mi a cuminsa laba auto di ora mi tabatin 12 aña y semper mi a gusta wak un auto limpi, ta shine cu su tirenan limpi. Mi ta gusta wak un auto luci pa su doño.”
Natasha Rachel DeWindt
Natasha Rachel DeWindt
Prome cu Gloss Squad Carwash Aruba bira un negoshi oficial, Natasha tabata bay na cas di conocinan, laba auto na man, uzando awa y corriente di cliente mes. Sin machine, sin structura, solamente esfuerso, disciplina y amor pa e trabou. Pa por pone su mes mas serca di su meta, el a traha como security, cumpliendo wardanan hopi dificil. Pero ainda den e circumstancianan ey, e vision di tin algo propio, su mesu negoshi, nunca a sali di su mente y curason.
Un dia, el a mira e compania Gloss Squad Carwash y a haci un cita pa laba su propio auto. El a gusta e concepto mesora. Poco despues, el a haci un paso cu a cambia su direccion: el a puntra si nan mester di hende pa traha. Na april 2019, el a cuminsa traha pa e compania. Y no pasa hopi tempo ora cu e oportunidad a presenta su mes.
Pa Natasha, e decision pa cuminsa algo propio no tabata dificil. E deseo ey ya tabata t’ey. “Semper mi tabatin e deseo di tin mi mesun compania, trahando pa mi mes, mi ta sinti liber y por planea mi dianan.” Traha pa otro, manera e mes ta describi’e, por bira rutinario. Pero trahando pa su mes, el a haya un sentido diferente di libertad y control riba su futuro.
Dia 15 februari 2021,Gloss Squad Carwash Aruba a habri oficialmente como su negoshi. E caminda no tabata facil. E reto mas grandi tabata monetario. “Mi a cuminsa sin nada, cumprando mi productonan tiki tiki, p’asina mi por haci mi trabou y mi no tabatin salario.” Pero apesar di e limitacionnan, el a sigui. Semper, cu e creencia firme cu su soño tabata posibel.
Actualmente, Natasha ta traha su mes riba caya. Aunke e tin un team tras di e cortina cu ta sosten’e, e operacion diario ta cay riba dje. “Mi ta traha den solo tur dia y no ta facil, pero esey no ta kita e pasion pa laba auto y wak un auto briya.” Hopi hende ta mira solamente e resultado: un auto limpi y briyante. Pero loke no ta visibel ta e esfuerso, e calor di solo, y e disciplina constante cu e trabou aki ta exigi.
Riba nos pregunta kico ta loke ta haci su servicio diferente e ta bisa; “E calidad cu mi ta ofrece y e satisfaccion cu e cliente ta haya ora e wak su auto limpi.”
Ademas, Natasha ta trahando den un ambiente unda mayoria ta homber, y lo ta haci esey su storia ainda mas fuerte, un muher cu ta move su mes, independientemente, cu consistencia.
Ora ta trata di balansa bida personal cu negoshi, Natasha ta responde cu honestidad: “Balansa?? Hahaha… no ta echt den balans pero nos ta purba.” E ta un realidad cu hopi emprendedornan ta reconoce, e proceso di crece no semper ta bin cu ekilibrio perfecto. Pero apesar di esey, su vision pa futuro ta cla.
“Mi ta wak mi negoshi ta draai bon unda cu ami mes no mester ta riba caya mas y mi ta cuida di mi famia y mi salud.”
Pa otro hende cu tin miedo pa dal e prome paso, Natasha tin un mensahe directo: “Bay pe!” E caminda no lo ta facil. Lo tin desafionan, momento dificil y duda. Pero cu e hende corecto rond di bo y fe den bo mes, progreso ta sigur.
Built with Shorthand