Carnaval di Aruba 71 a trece un aire fresco cu cuatro cara nobo na e rol di MC. Cu un pasion pa farandula, un entrega sin limite, y un energia dinamico, e cuater MC nan aki a trece un ambiente unico na e historia di nos Carnaval 2025.
Cu su 18 aña, Lucas Geerman ta un hoben talentoso c’un gran amor pa cultura, radio, y entretenimento. Di chikito, e tabata desea di forma parti di e mundo di farandula, inspira pa su famia. Lucas ta e unico yiu homber di Lizaira y Hubert y ta yama su mes orguyosamente’ un Indian di Macuarima, unda su lombrishi ta dera.
Su educacion na School Cacique Aterima, sigui pa Cacique Macuarima School, y despues Colegio San Antonio - Mavo na Santa Cruz, a duna su formacion un balor pa ta un persona DUSHI (Disciplina, Uni, Spiritual, Humilde y Innovativo).
LUCAS GEERMAN
LUCAS GEERMAN
E pasion pa Carnaval a cende durante su examenklas na Colegio San Antonio, ora un idea cu no kier a sali di su mente. “Un mainta mi a lanta cu e idea pa representa mi scol den eleccion di Prins y Pancho. Mi a acerca Shaqion van der Biezen y splik’e mi idea. Su contesta tabata inmediatamente “let’s do it!” Bou di guia di mi wela Shi Preke hunto cu apoyo di mi mayornan y mi scol, nos a logra conkista e corona di Prins Wiskunde y Pancho Algebra di Carnaval 69, cual tabata un soño cu a bira realidad.
Su amor pa entretenimiento no a stop ei. Na 2024, Lucas a launch "Before Monday Comes Radio Show" na PowerFM hunto cu Shaqion y Ro Endry Bryson, pa trece energia positivo pa e hobennan di Aruba. Un idea cu rapidamente a crusa frontera, recibiendo un invitacion di Radio Flamingo na Bonaire pa transmiti e show na e isla vecina.
Tabata un diabierna den luna di November 2024, cu Lucas a haya un mensahe inespera di Julio Andrews.
"Bo ta interesa pa para MC di Eleccion di Reina Infantil y Hubenil?"
Su prome reaccion? "What?" E no por a kere e mensahe cu su wowo tabata lesando. Despues di a tuma un rato pa pensa riba e propuesta, mi a dicidi pa accepta e reto aki. Di chikito mi a lanta ta mira mi wela Shi Preke y mi tata Hubert den e mundo di farandula, kiermen e no tabata algo desconoci pa mi. E ora mi a papia cu mi mes y mi di "why not? Let's see how it goes."
E preparacion tabata intenso. Lucas a traha riba su uzo di stem, entonacion y energia riba stage, ricibiendo training profesional di Tarrick Ras, un mentor cu a inspira y motiva su presentacion. E resultado tabata espectacular. Su ‘chemistry’ cu Jorienne Angela tabata unico, unda nan a complementa otro y duna un presentacion vibrante y dinamico. "Nos tabata compronde otro hopi bon y laga otro briya mutuamente."
Lucas a disfruta cada momento, pero su evento favorito tabata e Eleccion di Reina Infantil y Hubenil mes.
Locual mas el a gusta tabata su habilidad pa trece ambiente den Entertainment Center, duna un presentacion cu zjeito pa e publico y carnavalistanan online. "E interaccion cu publico tabata hopi pret, nan tabata comunica cu mi, haci wega, y duna mi KIPPENVEL! Esaki a motiva mi mas pa entretene y entrega mi riba stage."
Lucas ta kere cu hobennan tin e poder pa trece un era nobo na Carnaval sin kita respet pa e pioneronan.
"Nos ta bin cu energia dinamico y moderno pa sigui engrandece nos dushi tradicion."
Su deseo ta fortalece e Eleccion di Prins y Pancho, pa mustra cu hoben y hende homber tambe sa trece energia positivo den comunidad.
"Disfruta di Carnaval na un forma consciente y responsabel. Nos ta e futuro di Carnaval! Aporta, trece bo talento y asegura cu nos tradicion ta sigui briya!"
Si e haya un otro oportunidad pa para MC, Lucas no lo pensa dos biaha!
Si mester describi Carnaval den un palabra?
"INOLVIDABEL!"
Built with Shorthand