Kelly ta conoci como un modelo exitoso na Aruba y internacional, cu siguidornan di tur parti di mundo. Pero loke hopi di su siguidornan no sa di e modelo, ta desde su 23 aña, e ta carga e deseo grandi pa bira mama un dia. E mes ta bin di un famia cu dos otro ruman mas. Finalmente, dos luna pasa, dia 6 di Maart 2023, su deseo a bira un realidad cu nacimento di Kenzo. Pa Kelly, ningun desafio ta riba e soño aki logra y e ta tuma e capitulo nobo aki den su bida, cu braza habri. Den un forma hopi emociona, cu su wowonan yena di lagrima, pero di alegria, Kelly ta comparti e experiencia nobo aki y con su perspectiva di bida, a conoce un buelta completo.

XM: Awor cu bo ta mama, con bo perspectiva riba maternidad a cambia?
Kelly: "El a cambia den tur sentido pasobra esey ta tambe e momento cu bo ta bay biba e periodo mas bunita di bo bida como mama. Bo ta ripara cu bo manera di pensa ta cambia te cu e responsabilidadnan cu tambe ta haya un balor diferente. Bo ta siña kico ta e amor berdadero y cariño pa e bida di bo yiu."


XM: Con bo a prepara bo mes pa bo embaraso y parto?
Kelly: "Pa ta sincero, no tabatin preparacion especifico. Mi a simplemente laga tur cos ‘flow’ y djis biba cada momento y experiencia completamente y laga tur cos den man di Dios. El a guia mi, stap pa stap, den tur momento."

XM: Bo a comparti e momento di bo parto cu bo siguidornan di ‘social media’ den forma LIVE. Con e reaccion tabata?
Kelly: "Ora mi a haci mi embarazo publico, mi tabata hopi emociona pa mira e reaccion y e comentarionan bunita cu bon deseonan di hopi di mi siguidornan. Mi tabata sinti mi contento ora mi a pone un storia y/of potret. Mi a haya hopi hende cu a manda pabien tanto p’ami y mi baby.”

XM: Hopi muher ta enfrenta e desafio pa yega na un balans entre nan aspiracionnan profesional cu maternidad. Con bo ta maneha e balans aki?
Kelly: "Mi ta kere cu bida tin hopi etapa y e hecho cu bo ta drenta den esun di maternidad no tin pakico pa kita oportunidadnan pa sigui otro soñonan. Mi ta kere cu maternidad mester yega na e momento cu bo kier y despues, tur cos cu bo a planea tambe pa bo bida, lo ‘fit’ aserca.

XM: Kico ta e inspiracion tras di e nomber di bo yiu?
Kelly: "E nomber Kenzo a inspira nos, pasobra e ta cuminsa cu e letter K (mescos cu mi nomber), pero mas cu tur, nos a gusta e nificacion di e nomber. Kenzo ta un nomber na Hapones y e ta nifica: virtuoso, bon, salud, fuerte y tambe sensato y prudente. Berdad ta cu e no ta un nomber hopi comun. Su nomber completo ta Kenzo Mathias Paesch. E nificacion di e nomber Mathias tambe ta bunita. E ta nifica ‘regalo di Dios’. P’ami, mi yiu ta un regalo bunita cu Dios a duna nos.
XM: Con bo relacion cu bo pareha a cambia, awor como mama y tata di un yiu?
Kelly: Berdad ta cu for di ora cu nos a haya sa cu nos ta bay bira mama y tata hunto, e noticia a yena nos cu alegria. Asina hopi cu nos a bira mihor amigo, pareha y casa di otro. Sigur, cada relashon tin su ‘highs & lows’, pero nos ta busca pa ta e mihor mayornan hunto, cada dia.

XM: Bo ta conoci pa bo trabou di modelahe pa DShop na Aruba. Bo tabatin miedo pa perde bo figura debi na e embaraso?
Kelly: No, mi nunca tabatin miedo di perde mi figura. Loke berdaderamente tabata preocupa mi tabata di no por a bira mama. Semper mi a soña pa tin mi yiu y ora cu mi a haya mi mes na estado, mi no a pensa mas tokante mi figura. Simplemente mi a disfruta di cada etapa di mi embarazo y di e criatura cu tabata creciendo den mi, cu ta mi bendicion y e regalo mas grandi y bunita cu mi a haya di Dios.

XM: Bo plannan pa futuro?
Kelly: Cuida y cria mi yiu, pero sigur mi ta pensa pa bolbe den modelahe den mi momento di ‘breaks’. Ya no mas como mi carera, sino mas como un hobby. Otro plan ta pa aki 1 aña, busca un ruman pa Kenzo, sea un mucha muher of homber, pa ta un compañero pa Kenzo.

KELLY PAESCH-GONZALEZ

KELLY PAESCH-GONZALEZ

Item 1 of 5

KELLY PAESCH-GONZALEZ

KELLY PAESCH-GONZALEZ

XM: Awor como mama bo mes, kico Dia di mama ta nifica p’abo?
Kelly: P’ami, dia di Mama ta un recordatorio di con afortuna y bendiciona mi ta di ta un mama cu e yegada di mi yiu den mi bida. Mi no tin mester di un dia special pa celebra mi maternidad, ya cu cada dia ta special y yena di amor. E aña ‘ki, mi lo celebra hunto cu mi famia, disfrutando di momentonan feliz hunto y creando recuerdonan nobo cu mi yiu.