Tabata su ultimo aña na Colegio San Antonio MAVO y tur cos tabata bayendo bon. Anticipando su aña escolar final, Jurvin Gonzalez nunca por a pensa cu lo tin retonan diferente ta sper’e. Manera tur studiante dedica, e tabata prepara pa enfrenta e retonan tipico di su estudio, pero destino tabatin un plan diferente p’e.
Un situacion di salud inespera a surgi, cambiando e rumbo di normalidad cu e tabata conoce. Na lugar di tabata sinta tras di un lessenaar pa haci su les y examen final di scol, Jurvin a hay’e riba un cama ta bataya pa su salud y su diploma. Esaki ta un entrevista di resiliencia di su ‘dobel lucha’.
“Mi a bira malo dia 2 di mei 2023, net 1 siman prome cu centraal examen. Dokternan a contasta cu tabata mi appendix y cu mi mester a keda opera mesora.” Sinembargo e situacion a bira mas serio ora a resulta cu Jurvin a haya un infeccion mas pisa debi cu su appendix a rementa durante e operacion, cu consecuencia cu e mester a haya un cuido mas intenso cu a anticipa. E tabata obvio caba pa Jurvin cu scol, e no tabata por a bay mas debi na e situacion di salud cu e tabata aden.
Esaki tabata un periodo emocionalmente turbulento y e peso di incertidumbre tabata masha grandi riba e hoben studiante. Sinembargo, apesar di e situacion fastioso ‘ki, Jurvin nunca a duda di su mes ni di su abilidadnan. Determina pa supera e obstaculo su dilanti, el a keda enfoka riba e chispa di speransa pa por logra su soño di graduacion. E por wel di tabata riba un cama di hospital, pero su examen nan lo keda haci, di un forma of otro.
E dicho union ta haci forsa a haya su nificacion ora cu mayornan di Jurvin hunto cu director di su sco,l meneer Gershwin Lee y su demas maestronan, a uni forsa pa haci’e posibel pa Jurvin por a pasa su examen, aunke si esaki tabata nifica for di su cama di hospital mes. “Meneer Lee a tuma contacto cu Inspectie y a bin logra pa nan pasa e dialuna mainta prome cu examen serca mi. E proceso no tabata sin su dificultad nan, pero e esfuersonan colectivo di e autoridad nan di scol y inspector nan a haci posibel pa Jurvin haci su examen nan cu curashi y determinacion. “Segun mi, e parti mas dificil tabata haya surveillance pa motibo cu p’ami so, mester a pone 2 surveillance y pa cada klas na scol tabata e mesun cantidad di surveillance.”
Cu aprobacion pa haci su examen via su cama di hospital, Jurvin tabata sa cu esaki tabata rekeri tambe cu e mester tabata prepara, pues e mester a studia tambe. Tabata un esfuerzo grandi pa haci e examen nan aki posibel, pero esaki tabat 50% di e trabou. E otro 50% tabata den su man. “Mi tabata studia atardi pasobra tabata mas rustig pa loke tabata e testnan di sanger y rosea cu mi mester a haci den oranan di mainta.” E apoyo di Jurvin su mayornan tabata crucial na tur momento. Nan tabata percura pa Jurvin por tabatin tur su materialnan di estudio pa e por pa prepara su mes bon prome cu cada examen. Aparte di esaki, Jurvin tabata haya hopi apoyo di e staff di hospital mes. Nan a hunga un papel vital den facilita e proceso di examen mas ainda. Enfermera nan a uni nan esfuerso pa sigura cu Jurvin tabata den un ambiente sin distraccion durante su examen nan poniendo bordji nan di aviso pa e por tabata trankil, sin keda stroba.
E palabranan aki ‘bo a slaag’ a haya un nificacion diferente pa Jurvin, paso aunke el a traha e aña prome, tabata riba su cama di hospital awor cu el a seya su graduacion final di scol. Un simbolo di determinacion solido.
Su mensahe na otro hobenan cu por ta para dilanti retonan di salud of otro situacion nan ta pa ‘keda kere den bo mes y no ‘give up’ pa obstaculonan cu por pasa den bo caminda.
Jurvin ta inmensamente gradicido na e apoyo di su mayornan, famia docente y amigonan durante e proceso completo aki cu ta yena di aprendisahe demostrando cu resiliencia ta e forsa pa logra tur cos cu bo propone pa bo mes.
P’awor, e ta cla pa e siguiente capitulo den su bida; continua su estudio na su scol nobo EPI.
Built with Shorthand