Tabata 1997 tempo cu el a forma parti di e team na ATV como un master controller. “Di mucha mi kier a haci cine. E pelicula E.T. the Extra-Terrestrial di Steven Spielberg a inspirami. Mi tabata experimenta c’un VHS camera y tabata edit sketch nan uzando dos VHS player. Na 1997 mi tabatin un combersacion cu señora Belquis Moreu kende tabata mi bisiña y el a recomenda mi pa bay studia, pero tambe pa mi purba di traha den e campo audiovisual pa wak si realmente esey mi kier haci. Mi prome dia di trabou na ATV como master controller tabata na e parada di Carnaval grandi di Playa,” Juan Francisco ta conta.

Experencia di Juan Francisco na ATV tabata un confirmacion di loke e tabata kier a haci. “Mi tabata manera un mucha den un tienda di coy hunga. Mi a tuma tur e oportunidad nan cu mi a keda brinda y a traha den diferente departamento, for di master controller pa director tecnico, director di Noticia Awe Nochi y editor. Mi a acumula asina hopi experiencia cu el a haci mi gana di studia e ramo audiovisual ainda mas grandi.” Juan Francisco a scoge Spaña y Hulanda, unda el a studia Direccion Cinematografica y Realizacion Audiovisual.

Mientras cu tur e conocementonan cu el a haya na ATV a facilita su estudio na Spaña riba e tereno di Television, cine si tabata algo completamente nobo.

“Na 1992, cu dies cuater aña mi a skirbi ‘Ciudad Oraño’, mi prome script. Bay studia na Spaña tabata importante p’ami, p’asina mi por a produci mi script. Ora mi a keda cla na Spaña mi a dicidi di bin bek Aruba pa ehecuta Ciudad Oraño. E no a logra, en cambio mi a haci un otro version cortico cu mi a yam’e ‘E Secreto’. Mi a realisa cu ta miho pa sigui amplia mi conocemento. Mi a considera di bay Spaña bek, pero na final mi a dicidi pa bay Hulanda. Na 2003 mi a bay Hulanda y mi a bay studia diseño di media grafico y interactivo. Na 2007 ora cu mi a caba mi estudio. Mi a sinti cu e tempo a yega pa mi bolbe bek Aruba y cuminsa na crea un cultura di cine Arubiano.”

Serca mi, asina e ta cuminsa; c’un ‘pitch’ di e idea, cual hopi biaha mi ta conta e idea na esnan cu mi conoce of mi ta grab’e riba mi celular. Ami ta skirbi mi scriptnan segun e tres actonan cu ta: Formulacion, Confrontacion y Resolucion. Mi ta nota escena nan pa cada acto y mi ta crea un biografia pa mi personahe nan principal. Unabes mi tin tur esaki, mi ta cuminsa skirbi mi script. E preparacion pa cuminsa un produccion ta mas intensivo. Mi ta inicia cu ‘breakdown’ e script, sacando afor tur e escena-, personahe- y acesorio nan. Despues mi ta sigui pa planifica e produccion, describiendo e duracion di filmacion, orario, e escena, localidad, e actor y e accesorio. E duracion ta importante, paso esey lo yudami crea mi presupuesto. Asina tin un presupuesto, lo sigui cu e siguiente etapa cu ta busca fondo pa realisa e pelicula. Ora cu e fondo t’ey, e ora e casting lo cuminsa y lo sigui cu tur e otro necesidad nan.”

Juan Francisco Pardo ta un defensor ardiente di crea pelicula na Papiamento. Su pelicula nan a wordo presenta na festivalnan Internacional di cine skirbi na Papiamento cu subtitulonan na Ingles. E peliculanan aki ta introduci y promove e idioma di e isla na un tereno global, preservando y celebrando identidad linguistico y cultural di Aruba. "Peliculanan na Papiamento ta mantene nos idioma bibo"

“Nos falta recursonan; placa, material y conocemento. E manera pa yega na un parti di e recursonan aki ta door di crea incentivonan pa atrae produccionnan Internacional, cu lo uza Aruba como ‘background’ pa filma peliculanan Internacional. Na mes un momento ta promoviendo e producto Aruba, pa medio di e peliculanan.

Trinidad & Tobago ta un di e islanan cu ya ta bezig cu esaki y ta ofrece 35% ‘cash back’ plus 20% si contrata hende local pa traha. No solamente esaki ta crea trabou, pero local nan ta adkiri mas conocemento di e trabou. Cu tempo lo lanta companianan cu lo provee servicionan specifico na produccionnan di cine di cual lo yena e buraco na e necesidad di materialnan di produccion, pero tambe e necesidad pa personanan specialisa den diferente departamento di cine. Placa ta keda un topico delicado, paso haci cine ta costoso. E bon ta cu awor Aruba tambe por pidi subsidio for di Film Fonds di Hulanda. E miho manera pa sostene un produccion local ta door di bay wak e peliculanan local cu ta sali den teatronan di cine. Parti di e entrada di e ticket ta bay na e cineasta y esey por yuda den realisa un otro pelicula.”