"Jonathan Harms c’un estudio academico den biología y biotechnology, a sinti un ’calling’ pa crea algo unico y genuinamente Arubano. Inspira door di su ‘background’ familiar den importacion di alcohol (Romar Trading), Jonathan a duna inicio na su viahe empresarial. 'Su deseo pa honra su herencia y combina esaki cu su pasion cientifico a nace Pepe Margo Distillery. El a cuminsa e combersacion cu su tata Milton Harms. “Hunto cu mi tata nos a bay bishita algun destileria y asina e idea a cuminsa cushina. Nos a cuminsa werk esaki uit, ‘brainstorm’ y eventualmente, poco poco, mas hende a bin aden aserca pa contribui na e gran idea aki.”
C’un vision pa crea a destileria perfecto pa Aruba, e lugar perfecto pa construi esaki tabata importante pa Jonathan y aki e idea pa un cas special na su curason a bira e opcion logico. Situa den caya di Wilhelminastraat - conoci pa su edificionan antiguo y rico na historia di Aruba - e cas di Pepe Margo, un homenahe bibo di e raiznan cultural y familiar di Jonathan Harm a haya un meta nobo.
Den e cas historico aki, ta unda Catarina Margarita (Margo) Arends - conoci pa su talento culinario y cariño di e comunidad como "Tan Margo" of "Pepe Margo" - a biba y comparti su arte culinario, Jonathan a haya inspiracion. E ta e lugar unda su tata, Milton Harms, a crece y unda su antepasadonan a marca nan bida. E destileria, un proyecto di restauracion y amor, a bira e cuminsamento di algo nobo, transformando e cas historico aki den un destileria artesanal. “E proceso di restauracion y adaptacion a tuma nos dos aña y mey, un esfuerzo di amor y dedicacion.”
Pepe Margo Distillery ta specialisa den rum y gin artesanal, cu cada fase di produccion meticulosamente controla. 'Nos ta traha cu e mihor ekiponan di Alemania y cada batch ta wordo purba pa garantisa calidad superior,' Jonathan a menciona. “Nos proceso ta unico - desde e fermentacion te cu e destilacion y maduracion den barinan bourbon cu ta bin for di Kentucky na Merca.”
Ademas di produci alcohol, Pepe Margo Distillery ta un punto di atraccion tanto pa turistanan como pa localnan. Jonathan y su team ta ofrece tour den e destileria, permitiendo bishitantenan pa experencia e proceso di produccion y e rikeza cultural tras di dje. “Nos kier comparti e proceso aki, awor posibel na Aruba, cu mundo.”
Jonathan tin plan grandi pa Pepe Margo Distillery, cu aspiracion nan pa expande e linea di producto y sigui innova. “Nos lo sigui crece y desaroya, manteniendo siempre nos enfoke riba calidad y autenticidad,' el a destacá.”
Built with Shorthand