Skirbi pa: Jacqueline
Gian Hodgson (35), a cuminsa hunga tennis entre e edad di 3 pa 5. Durante e añanan, el a pasa tur e highs & lows di un carera exitoso di tennis, representando Aruba riba e escenarionan internacional y logra haya un beca danki na tennis.
Awor, e ta dedica su mes pa contribui na e crecemento y desaroyo di tennis na Aruba.
E amor di Gian pa tennis a cuminsa ora su mayornan a inscribi’e den les di tennis cu 3 aña. "Mi tata despues a cuminsa dunami les di tennis ora mi tabata mas grandi. Mi no sa pakico mi a gusta esaki na prome instante, mi djis simplemente a gusta e deporte."
Hopi liher, Gian a desaroya un pasion pa e deporte y a cuminsa hunga den torneonan na un edad hoben. "Ora mi a cuminsa hunga torneonan den U10 y U12, tabata e momento cu e deporte a bira mas serio p’ami. E hecho di perde y despues kier mehora pa gana e persona cu bo recien a perde contra dje, a duna mi lesnan di tennis, un proposito."
Representando Aruba na Aruba su prome Davis Cup.
Representando Aruba na Aruba su prome Davis Cup.
“Representando Aruba den Davis Cup ta definitivamente un di e momento nan mas sobresaliente. Tin hopi otro experiencia nan memorabel tambe, pero e mihor parti pa mi ta cu mi a logra experiencia hopi di nan cu mi amigonan di mas cerca y mi famia.”
Na Davis Cup Bolivia cu su ruman Ibian
Na Davis Cup Bolivia cu su ruman Ibian
Inspira pa Marat Safin, Gian a desaroya un estilo di hunga agresivo na e base y a siña e importancia di traha duro durante momentonan di presion.
"Mi a purba serve duro y marca puntonan cu mi forehand. Esaki ta mas tanto con mi kier a hunga, pero eventualmente bo ta realisa tambe cu durante momentonan di presion ora bo ta un tiki nervioso y por lubida con pa dal e bala, e cos mas importante ta simplemente hunga duro y pone e bala bek den wega."
Cu su 15 aña recien cumpli
Cu su 15 aña recien cumpli
Como un hungador di tennis, Gian a laga Aruba y su famia cu 15 aña pa bay un academia di tennis na Merca, ora cu el a haya un beca pa sigui studia. "Sinceramente, mi no ta considera e cosnan aki como sacrificio realmente. Mi tabata gusta practica y ora mi a bay e academia di tennis, mi a bay na un lugar unda mi tabata rondona pa hendenan mescos cu mi y por a hunga tennis henter dia."
Na College
Na College
Gian a logra bay studia na University of Wisconsin, cu tabata un logro grandi p’e. “Mi tabata sumamente feliz y tambe alivia. E tabata hopi trabou p'ami y mi famia pa tuma contacto cu tur e diferente scolnan y puntra si nan tabata interesa pa mi forma parti di nan programa. Hopi a bisa no, pero pa suerte ,algun a bisa si tambe. E simpel hecho di por a hunga tennis y studia na University of Wisconsin tabata un experiencia grandioso. Mi a conoce amigonan eynan cu pa semper lo mi ta den contacto cu nan.
Pa haya un programa pa duna bo un beca ta hopi similar na aplica pa un trabou. Bo tin cu manda bo aplicacion na diferente programanan, pero na final, si bo ta suficientemente bon, un coach lo kier bo den su team.
TENNIS ARUBA - E FUTURO
E motivacion di Gian pa bolbe Aruba y contribui na e desaroyo di tennis ta bin for di su amor pa e deporte y e deseo di sigura cu muchanan na Aruba por disfruta di tennis. Como un miembro di Aruba Tennis Bond, e tin como meta pa yuda e comunidad di tennis na Aruba crece mas y pa organisa mas torneo, evento y guia hungadornan hoben.
Gian ta kere cu tennis ta un deporte popular rond di mundo y ta e responsabilidad di organisacionnan manera Aruba Tennis Bond, pa sigura cu hungadornan hoben ta disfruta di e deporte, por y kier mehora. E ta pone enfasis riba e necesidad pa organisa mas torneo pa duna hungador nan un proposito y pa practica mas intensivamente.
Despues di a experimenta e beneficio nan di un beca di tennis, Gian tin plan pa sostene y anima hungadornan hoben na Aruba pa sigui oportunidadnan similar. E ta conseha nan pa traha duro, tin pasenshi y perseverancia den nan proceso pa logra haya un beca.
Empoderando Hungadornan Hoben di Tennis
E biaha di tennis di Gian Hodgson ta mustra e aspectonan unico di e deporte, for di enseñansa di resistencia mental y disciplina pa ofrece oportunidadnan cu ta cambia bida. Ora cu e ta dedica su mes na forma e siguiente generacion di hungadornan di tennis na Aruba, su pasion y compromiso sin duda lo laga un herencia duradero den e comunidad.
Built with Shorthand