Francis Krosendijk

Skirbi pa: Jacqueline

Selecciona un empresario di e aña nunca ta facil, specialmente den un pais cu tanto talento y pasion manera Aruba. Francis Krosendijk, Male Entrepreneur di 2024 pa Qredits, a sobresali no solamente pa su exito empresarial, pero tambe pa su compromiso pa comunidad, su dedicacion na calidad, y e manera inspirador cu e ta uza su negoshi como un motor pa cambio positivo.
Cu humildad y determinacion, Francis a combina pasion y vision pa transforma Cluck Eggs & Poultry Supply den un modelo di excelencia den agricultura na Aruba. Su enfoke riba sostenibilidad y bienestar di su bestianan no solamente ta sigura un producto di calidad, pero tambe ta reforsa e base pa un Aruba mas resiliente.
Qredits ta orguyoso di por yuda Francis na su trayecto, y su storia ta inspiracion pa otro entrepreneurnan sigui nan pasion y pone nan soñonan den accion.

**Francis Krosendijk: un simbolo di progreso y Male Entrepreneur di 2024.**

**Francis Krosendijk: un simbolo di progreso y Male Entrepreneur di 2024.**

Cluck Eggs & Poultry Supply a cuminsa for di un necesidad basico: demanda pa webo fresco. Francis a wak un oportunidad den e sector aki y a tuma paso pa yena e falta ‘ki. “Como amante di bestia y naturalesa semper mi tabatin un deseo di haci un negoshi den sector di agricultura. " E deseo aki cu su pasion personal a bira e combinacion perfecto p'e nacemento y exito di Cluck Eggs & Poultry Supply . Un storia di entrepreneurship pa inspira.

**FRANCIS KROSENDIJK**

**FRANCIS KROSENDIJK**

Cluck Eggs & Poultry Supply ta mas cu simplemente un proveedor di webo. Francis ta enfoka riba crea un sistema organico y free range, caminda su galiñanan ta biba den e miho condicionnan posibel. “Nos prioridad ta pa duna nos pueblo un producto di calidad halto, mientras nos ta cuida nos bestianan cu respet y amor,” e ta conta. Su compromiso na e bienestar di su bestianan ta pone su negoshi na un nivel diferente, estableciendo un standard den e sector.

Francis tambe ta uza su pasion pa contribui na seguridad alimenticio di Aruba. “Mi plan ta engrandece agricultura na Aruba y envolve hubentud den e proceso pa nos por bira menos dependiente di importacionnan,” e ta bisa. Su vision no solamente ta pa expande su negoshi, pero tambe pa fortalece comunidadnan agricola na Aruba.

Manera tur empresario, Francis a topa su parti di retonan den su negoshi. Un di esakinan tabata haya apoyo y bende e vision na otro hende. “E reto di mas grandi tabata kere den mi mes y haya hendenan cu ta kere den mi idea tambe. Mi ta gradici mi mama, mi tata, mi ruman, mi yiunan y un tanta cu di prome instante a kere den mi y tabata sa di apoyami ora mi kier a give up,” e ta recorda cu gratitud.

Pero e momentonan mas gratificante pa Francis ta ora el a mira su esfuerso bira un realidad. E hecho di sa cu e ta dunando Aruba un producto 100% crioyo y di miho calidad posibel ta algo cu ta yena su curason di orguyo

Francis Krosendijk

Francis su trayecto no tabata un caminda solitario. Cu e ayudo di Qredits Aruba, Cluck Eggs & Poultry Supply a bay di un idea pa un realidad tangibel. “Mi experiencia cu Qredits tabata excepcional. Di e prome email cu mi a manda cu mi business plan te na momento di a sera contract tabata excepcional. Nan ayudo cu conseho y nan toolsnan online ta amazing. Cu nan ayudo, e empresa di ‘Cluck Eggs & Poultry Supply’ a bay for di mi mente pa un realidad. Mi conseho ta si bo tin un vision, cu ayudo di Qredits bo por haci’e realidad.” E colaboracion aki a bira un pilar den e crecemento di su negoshi.

Francis no solamente ta enfoka riba su exito personal, pero tambe riba inspira otro. Su meta ta pa redobla su negoshi den tres aña y pa introduci mas producto di calidad pa Aruba. Den e futuro, e ta aspira pa sirbi como un mentor pa otro hendenan/hobennan cu kier drenta e sector di agricultura. “Agricultura no ta un negoshi pa haya rikesa rapido, pero cu pasenshi y dedicacion, e lo duna su fruto,” Francis ta bisa.

Les di mas grandi? :

Research, planning y execution. Sin e 3 punto nan aki ta mane bo ta trahando 'als een kip zonder kop.'

Francis ta kere firmemente cu disciplina y vision ta e ingredientenan clave pa logra exito. “Perdi mes mi ta gana. Di tur situacion algo bon por sali; ta n'abo pa tuma e leccion y crece for di dje.”

Con bo ta sinti cu b'a wordo scogi como e "Male Entrepreneur di 2024" door di Qredits?

“Male entrepreneur of the year 2024 waw ken lo por a pensa c’un plan cu a cuminsa casi 1 aña pasa a bira realidad te cu mi ta wordo reconoci p’e.”

Francis ta mira un futuro caminda su negoshi lo contribui na un Aruba mas fuerte y autosuficiente. Cluck Eggs & Poultry Supply no solamente ta un proveedor di webo fresco; ta un simbolo di con un soño creativo por cambia no solamente bida di un persona, pero tambe di un comunidad entera.

Share on WhatsApp