E tabata un idea cu pa hopi tempo. Specificamente, desde 2009, tanto Edjean como Arthur tabata cana cu e idea pa bin c’un forma structura y transparente pa compronde y promove e cultura di Aruba y tur su artistanan. Edjean, un artista/cantante su mes, tabata compronde kico e sentimiento di hopi artista na Aruba ta di no sinti nan arte balora ni reconoci ni tampoco tin un plataforma real pa promove nan talento. Esmas, por bisa cu hopi hende den nos comunidad no ta mira e talento di artistanan como nan trabou.
Consecuencia di esaki ta cu hopi biaha ta mira hopi artistanan ta haya nan mes ta haci varios otro trabou cu no tin nada di haber cu nan talento mes, pa sobrevivi. Ora ta papia di artista, ta referi di e cantante pa e escultor, pa e bailarin, e comediante como tambe e cosedor, diseñador, pintor, e desaroyador di un programa di computer y mas. Cu e meta grandi aki, na 2017 finalmente, Edjean y Athur a funda GO CULTURA, e prome paso pa halsa cultura como un industria riba su mes.
“E meta di GO CULTURA ta pa crea mas plataforma y oportunidad pa e industria creativo di Aruba. Nos ta sinti cu e sector aki mester keda comprendi y mester di e sosten di comunidad, comercio y e mesun gobierno pa logra esaki”. Eventonan grandi manera reconocemento di Etty Toppenberg, Maybeline Arends-Croes, Jossy Brokke y e mas recien di Robert J’eandor cu e reconocemento Crioyo di Oro, tur ta proyectonan pensa, organisa y ehecuta pa GO CULTURA.
GO CULTURA ta logra ehecuta e evento den un forma asina bunita, cu e spectador lo no pensa e dificultadnan cu nan ta topa cune hopi biaha, manera e falta di fondo y /of sosten pa logra haci cada un di e eventonan aki. Esaki ta loke precisamente mas y mas, Edjean y Arthur kier logra cu nan fundacion, pues pa tur instancia cuminsa compronde y mira e potencial cu nos cultura ta ofrece. E modelo aki ta uno exitosamente ehecuta na paisnan manera Colombia y Barbados, unda Edjean y Arthur a bay pa mira con nan a logra haci esaki.
“Un ehempel simpel, ora tin un concierto, e persona ta cumpra carchi pa asisti, ta bay cumpra un vestuario, ta bay haci su cabey/huña, ta pone gasolin, ta bay e evento, ta cumpra algo di bebe na evento of ta bay come despues. Di otro banda, ta print poster, crea avisonan digital, tuma personal pa traha na e evento sea den servicio y/of seguridad, ta sende airconan etc etc, pues e impacto positivo y fructifero di eventonan ta riba ‘touch’ diferente sector den nos comunidad.
Na Aruba, nos tin por ehempel nos sector turistico, unda Aruba Tourism Authority, no ta haci nada sin data pa sa ki impacto cada plan of campaña por tin. Esaki ta loke nos mester tambe pa e sector di cultura di Aruba. Cu data nos lo por haya evidencia cla pa splica con importante e industria creativo aki por ta di berdad y asina desaroya y formalisa esaki pa diversifica nos economia. Adicional, e rikesa humano cu esaki lo trece ta hopi grandi y lo pone atencion na e balor pa cultura di Aruba como un destinacion.
Un di e factornan cu Edjean y Arthur ta enoka tambe riba dje ta e necesidad di mas ‘empowerment’ y inversion pa yuda construi y expande e capacidad artistico pa siña nos artistanan con nan por crea negoshi di nan talento tambe. “Kizas hopi artista no sa, pero ta existi posibilidad pa pidi fondo disponibel pa proyectonan specifico na manera na UNOCA, Vertegenwoordigen van Nederland in Oranjestad, na Prins Bernhard Cultuurfonds Caribisch Gebied como tambe na Hulanda RijksCultuurFondsen etc. Bo ta skirbi un ‘grand petition’ y bo ta haya un suma pa bo proyecto. Bo mester skirbi e carta na un nivel halto pa por haya prome, e atencion y yega na e sosten financiero. Esaki a haci cu GO CULTURA a crea workshops pa nos artistanan pa mehora nos forma pa skirbi proyecto y asina tambe logra haya acceso na e fondonan disponibel aki.
“Nos kier yuda nos artistanan desaroya, crece y ta parti di e posibilidad nan aki. Tin biaha e ta sinti ‘overwhelming’ paso e no ta manera cu nos por traha pensando cu e sosten y fondo t’ey pa tur loke nos ta y kier haci. E realidad ta cu nos tin cu busca fondo y crea proyectonan na mes momento.”
Built with Shorthand