(COPY)
Lizeth Uribe ta e dama hoben tras di e marca di accesorio den gran demanda yama BRIYA. Cu su raiz di Colombia, Lizeth a yega Aruba cu su famia cu apenas 8 aña. Un tanta na Colombia, kende tin su mesun liña di accesorio, tabata puntra Lizeth pa su inspiracion pa su diseñonan, cual semper e tabata gusta comparti. Esaki a dune mas su mesun ‘push’ pa tuma e paso di su banda tambe y crea finalmente, su mesun liña. Y asina tambe, den e temporada di mas incertidumbre na 2019-2020, durante pandemia, e marca di accesorio BRIYA a nace den formato di un online store cu su prome coleccion riba e tema di blachi y flor. Den su prome salida caba, BRIYA a keda ricibi cu man habri y asina Lizeth tabata mas sigur cu nunca, di e caminda cu el scoge.
Lizeth Uribe: FEMALE ENTREPRENEUR 2024
Lizeth Uribe: FEMALE ENTREPRENEUR 2024
“Mi trayecto como empresario a cuminsa 5 aña pasa, inspira pa mi pasion pa moda y accesorio". Semper mi a kere c’un accesorio, chikito of grandi, ta un pieza clave pa resalta un outfit di un hende muhe, dun’e toke special y elegancia unico. E nomber “BRIYA” ta refleha esey mes: luci c’un poder unico pa destaca cu gracia y estilo. Na Papiamento y Spaño, e palabra BRIYA ta nifica “luci,” y esey mes ta e proposito di nos marca: pa cada muher sinti su mes unico y briyando cu accesorionan traha na man cu hopi amor y inspiracion.
Lizeth Uribe
Lizeth Uribe
BRIYA su accesorionan ta traha na man cu piedra nan ta semi precioso y cu material nan di calidad halto. Cada pieza di BRIYA ta un liña unico y autentico cu diseñonan di inspiracion propio di Lizeth, cu cada vez temanan diferente.
E influencia di famia y amistadnan a duna BRIYA un impulso adicional. “Coneccion cu amigonan y famianan tabata clave pa introduci BRIYA na otro islanan manera Corsow y Bonaire,” Lizeth ta bisa.
Den mi trayectorio loke mas mi ta agradecido na dje ta e sosten di mi clientenan. Con nan ta contento y pendiente di mi coleccionnan nobo. Tambe e ta un satisfaccion di mira mi clientenan sinti nan mes bunita cu BRIYA. Esey ta yenami cu energia y inspiracion pa sigui p’adilanti.
Na 2024, Lizeth a tuma un paso importante pa expande BRIYA c’un tienda fisico. Cu sosten financiero y guia di Qredits, su soño di crecemento a bira un realidad. Esaki a dun’e e confiansa necesario pa subi awor na un otro nivel. “Mi a siña cu consistencia y innovacion ta fundamental pa logra un negoshi exitoso. Keda adapta y actualisa cu e tendencianan di moda sin perde e esensia y autenticidad di mi marca ta algo importante pa’mi.”
Pasion, sosten, y perseverancia ta e componentenan mas importante pa logra exito como entrepreneur. Mi ta kere cu keda humilde y semper bo mes ta e clave pa mantene bo enfok’e y logra bo meta. Semper mi ta lanta agradecido pa unda BRIYA a yega, danki na mi clientenan, amigonan, y amistadnan. Nan ta duna mi e forsa y motivacion pa sigui crea mas oportunidadnan y logra mi vision.
Mi meta ta pa expande BRIYA internacionalmente na paisnan manera Merca, Panama, y otro islanan den Caribe. Den December, mi ta planea pa lansa un coleccion di fiesta cu diseñonan elegante y exclusivo, perfecto como regalo of pa completa un look di fin di aña. BRIYA tambe ta contribui den comunidad dor di sponsor artistanan y modelonan, y haci colaboracion cu otro negoshinan chikito pa yuda uni na lugar di competi.
Mi aspiracion ta pa organisa workshops pa siña otro hende di e arte di traha acesorionan na man, inspirando y crea oportunidadnan pa comunidad hoben latino. "Mi soño ta pa sigui crece, tanto personal como profesional, y pa ta un role model pa otro muhernan cu aspiracionnan grandi, mustrando cu pasion y confiansa den bo mes ta e clave pa logra exito.”
Built with Shorthand