No tur caminda ta straight y Diego Valentin Zapata (27) sa esey miho cu hopi hende. Naci na Aruba y lanta den bario di Seroe Biento cu recuerdonan inolvidabel. “Mi tabatin un infancia hopi bunita hunto cu mi famia y amigonan banda di cas, core bais y rond den bario, haciendo cosnan leuk cu semper lo mi keda corda”, e ta cuminsa conta. Su temporada di scol tabata yena di retonan, y aunke e no a termina su Mavo ni tampoco EPB, esey no a stroba su deseo pa logra. El a traha na un hardware store y despues c’un compania di pool.. Manera hopi hende, durante e temporada di pandemia, ideanan nobo a cuminsa domin’e pa cuminsa cu su mesun negoshi. Como un persona naturalmente orienta riba limpieza, Diego a haya inspiracion pa cuminsa su propio negoshi. E tabatin un brommer cu e tabata core como sport, pero el a dicidi pa bende esaki y e fondonan aki a bira su inversion propio. Asina, Excellent Pool Cleaning Services a nace.
Diego Valentin Mira Zapata
Diego Valentin Mira Zapata
E cuminsamento no tabata facil. Mirando cu su trabou anterior tabata c’un otro compania di pool, pa 6 luna, e no por a haci nada cu tabata trata cu e trabou aki sino mester a paga un multa. Finalmente, el a persisti y e clientanan a cuminsa drenta. “Mi a cuminsa cu 1 pool mientras mi tabata trahando na otro lugar como driver.” Diego tabata lanta tur dia 5’or di madruga, sali haci algun pool limpi t’e cu 8’or di mainta bay cas bek prepara bay traha na su otro trabou t’e 5or di atardi. Yega cas, cambia paña y bolbe sali pa duna servicio na mas pool te cu 7’or di anochi. “Mi prome cliente mi a haye via un amigo kende recomendami na un contratista kende a caba di construi un pool. E mesun cliente ey ta cumi te dia di awe y ta nifica hopi p’ami. T’e dia di awe, e ta sigui recomendami cu hopi di su conocirnan kendenan a ‘switch’ y dunami e oportunidad pa cuminsa e limpiesa di nan pool ". Awendia, e 1 pool, a crece te yega na 26 pool cu Diego ta encarga cune diariamente.
Cu hopi esfuerso, Diego a logra crea un base di clientenan fiel. Su regla ta cla: duna e mesun bon servicio tur dia, trata cliente como rey, comunica y ta honesto, sigui actualisa su conocemento den e industria, y lo mas importante, semper e mes tey pa haci e trabou. “Mi gusta siña y mira e hendenan keda satisfecho. E ta duna mi energia pa sigui.”
Diego Valentin Mira Zapata
Diego Valentin Mira Zapata
Claro cu no tur cos a bay manera planea semper. Diego ta honesto riba foutnan cu el a comete. “Como hoben y cuminsando un negoshi, e fout di mas grandi cu mi a haci tabata sali di mas, malgasta placa, bira iresponsabel cu e negoshi. Mi no tabata scucha di mi mayornan. Te ora cu mi a perde mi unico auto cu tabata mi auto pa trabou. Esaki a ponemi mira e realidad y con mi por a perde tur cos, den un sera di wowo.”
Pero awe, Diego ta traha su dia pa mantene tur su clientenan contento. E balor cu e tin pa su negoshi ta profundo. Excellent Pool Cleaning Services ta un refleho di su caracter: constantemente trahando, sin perde su esencia.
Aunke e stima traha su so, hopi biaha e tin e ayudo di su tata cu ta traha banda di dje. “Mi tata ta yuda mi. E ta crea otro tipo di coneccion y amistad entre nos dos. Nos ta siña compronde otro laboralmente. E ta pusha mi hopi pa sigui. Mescos cu mi mama, cu ta yuda mi mentalmente y ta motivami.”
Su meta ta cla: sigui crece cu Excellent Pool Cleaning Services y yega leu. “Mi deseo ta pa por disfruta y cu esnan cu a yuda mi te dia di awe, specialmente mi mama y mi tata. Mi ta sigur cu nan lo sigui guiami y yudami te caminda nan por.”
“No tene miedo. No worry kico hende lo bisa. Kere den bo mes. Na cuminsamento e lo no ta fasil, pero nada ta imposibel. Pusha bo mes pa yega caminda cu bo mes kier yega.”
Built with Shorthand