Daniela Perla Crafton a cuminsa un biahe cu a cambia su bida pa semper. Esaki ta un storia berdadero di resiliensia, famia y traha duro. Su storia, uno di acceptacion di cambio y traha un caminda unico haciendo Vacation Rentals un parti crucial di su bida, no solamente pa su stabilidad financiero, sino tambe pa momentonan valioso cu su famia.
"Mi tabata desespera," e ta confesa. Esaki tabata den un momento cu e no tabata sa con pa cumpli cu su gastonan y mantene su yiunnan.
Dado momento crucial, un amigo cu tabata cerca dje a hacie un pregunta cu a cambia e rumbo di su bida pa semper: "Pakico bo no ta pone bo apartamento riba Airbnb?" Aki, recuerdo nan di su tempo na Hulanda, caminda cu pa prome biaha el a conoce Airbnb door di e grupo ‘Amsterdam Mamas’ a bin bek na su mente. No obstante, Daniela a compronde e necesidad urgente pa stabilidad financiero y a tuma e paso aki, yena di fe. “Pero, mi tabata sinti cu mi tabata keda cortico pasobra mi lugar no tabata luhoso y mi tabatin mester placa pa cuminsa." El a cumpra algun muebles, transforma su apartamento y asina el a cuminsa den mundo di Vacation Rentals.
Como mama soltera, Daniela a topa c’un cantidad di desafionan den su esfuerso pa mescla su responsabilidad como superhost cu su debernan como mama. Mantene trabou, cria su yiunan, y maneha e Vacation Rental a resulta un tarea exigente, hopi biaha resulta den hasta busca su yiunan laat for di scol. Sinembargo, Daniela ta purba trece balansa na esaki door di comunica den forma transparentemente cu su yiunan riba nan necesidadnan financiero di famia, siñando nan e balor di resistencia y adaptashon. “Mi ta bisa mi yiunan cu mi lo busca nan laat y pa corda cu nos mester e placa.
Nan ta compronde y ta aprecia cu mi djis tin e oportunidad caba pa busca nan y hiba nan scol tur dia.”
Un di e regalonan di maneha un vacation rental, segun Daniela, ta e tempo valioso cu awor si e tin. “Mi por ta un mama y mira mi yiunan tur dia despues di scol, busca nan, y keda cas durante e vakantie di scol, cual ta un privilegio mi ta haya. Si, berdad mi no tin e placa pa bay di vakantie ni pa por cumpra cosnan manera mi lo kier, pero tur cos den bida tin un tempo y su lugar. Esaki ta e prijs cu mi ta paga pa mira mi yiunan crece banda di mi.
Awendia, tur anochi, mi ta cas, y nos ta papia riba diferente tema! Tur dialuna, nos ta haci “Nochi di Famia” y ta comparti un mensahe di motivacion ora e siman nobo ta cuminsa. Tambe nos por hunga wega hunto como famia. Algun biaha, nos ta sinta den patio of canta cu ukulele, no semper cu exito, pero nos ta purba tur biaha! Pakico?! Wel, tempo ta pasa lihe, y un dia nan lo bay y sigui nan caminda, y nos lo tin solamente e recuerdonan cu nos a crea awe. Mi respet na e mamanan cu ta traha pafo di cas, pasobra mi sa kico esaki ta sinti traha oranan largo y bo no por traha for di cas. Boso ta guerero nan!
Atende huespednan den su cas ta duna Daniela un oportunidad unico pa conecta cu hende for di tur parti di mundo. Su 'day to day' den vacation Rentals ta permiti cu e por mustra e cosnan unico di Aruba,
"Mi ta mustra mi guest nan con nos ta biba y esaki ta loke mi Vacation Rental tin como meta paso e ta situa den un bario local. Mi tin e bendishon di mustra mi huesped nan cu mi bisiñanan ta nativo y mi por comparti cu nan cu mi a crece den e mesun bario aki. MI ta contanan y mustranan diferente cosnan cu ta haci nons unico manera nos cuminda tipico manera; Keshi Yena, funchi cu jambo, y con nos ta celebra Aña Nobo cu Dande. Mi ta conta cu nos, Arubiano nan ta hende nan cariñoso cu ta saluda semper ora nos drenta un lugar nobo y cu Arubiano ta creyente. Mi ta orguyoso pa mustra tur esaki nan cu nan! Mi ta bisa mi turista nan cu pa ora nan ta un siman na Aruba nan lo mira con hende lo cuminsa saluda nan ora topa cu nan riba caya, sin conoce nan mes”
Pa esnan cu ta duda pa drenta den e mundo di Vacation Rentals, Daniela ta duna un mensahe di speransa y empoderashon. E kier anima persona nan pa tuma un paso di fe, pa scucha nan bos interno, y pa mustra e cualidadnan unico di nos comunidad. Den su palabranan, "Nos ta un famia, y loke bo ta ofrece na e comunidad ta unico! No tin ningun hende manera 'bo, asina ta bay p’e!
Nos tin mester di bo; bo ta pertenece na e mercado aki!"
Memei di e resistencia cu tin tocante e industria di Vacation rentals, Daniela ta defende su balor pa Aruba:
1- Tempo cu Aruba no tabatin hotelnan, esaki tabata e manera cu nos tabata haci’e: nos tabata duna bonbini na huespednan den nos cas.
2- E huesped cu ta keda den Vacation Rentals no ta un huesped cu no ta keda den hotel. Nan ta dos publico y caracternan diferente.
3- Accepta diversidad door di acepta hendenan di tur ambito di bida.
4- E ta diversifica negoshinan local y restaurantnan. Esakinan ta move e economia!
5- E ta yuda hopi famia, manera esun di mi, pone cuminda riba mesa.
Daniela ta soña riba un futuro mas briyante pa su comunidad, visualisando e re-activacion bek di sutan stima Caya Grandi. E ta anticipa un caya yena di harimento y combersacion, impulsa pa e.o., e huespednan di Vacation Rentals cu ta explora nos restaurant- y tiendanan local. Daniela su aspiracion ta refleha su compromiso solido, no solamente na su famia, pero tambe na e rikesa cultural di Aruba.
Resistencia ta e yabi! Tene na cuenta, tur hende ta wordo traha delicadamente; honra y celebra otro manera nan ta.
Built with Shorthand