E ta conoci como un trahador social di 43 aña , awendia trahando como e Hefe di Gabinete na Ministerio di Husticia y Asuntonan Social. Pero Irina no ta un trahador social cu ta sigui e patron comun. E ta un muher di hopi talento y pasion, conoci pa su dedicacion pa yuda otro, su amor pa Halloween y su coneccion profundo cu e herencia cultural di Aruba, specialmente cu carnaval. Den e entrevista XCLUSIVO aki, Irina ta comparti su pensamentonan riba su trabou como trahador social, su personalidad cu ta combina trabou duro y diversion, su papel como organisadora di e fiesta di Halloween mas grandi na Aruba y su amor solido pa carnaval.

Mi meta principal for di cuminsamento di mi estudio ta pa yuda un persona den problema y busca un solucion adecua. Tin hopi persona den problema cu ta warda mucho largo pa haya un solucion cual ta causa mas problema a lo largo. Esaki pasobra nan no sa na cual instancia nan por haya ayudo. Y nan mester di un guia pa cana e caminda corecto. Ami semper para cla pa duna un man, p’esey e estudio como trahado social.

Ora bo mes ta confrontando situacion dificil den bida, e ta importante pa bo mes hala atras tuma tempo pa bo mes. Paso si bo mes no ta sinti bon, dificilmente bo por yuda y of guia un
otro.

Como ex Miss Aruba y modelo bo ta cera conoci cu hopi hende y bo ta haya netwerk amplio. Como Miss Aruba mi tabatin e oportunidad di bishita diferente pais unda cu mi por a cera conoci cu diferente cultura. Ora cu bo cera conoci cu diferente cultura bo ta realisa cu no tur hende mester ta mesun cos. Y bo ta duna tur hende espacio pa por ta nan mes aunke bo mes ta pensa y actua diferente. No tin bon ni malo, solamente diferente.

Di por tuma parti na proyectonan cu ta haci un diferencia y cu tin un impacto grandi den nos comunidad. Pero principalmente di por wak con personanan ta haya algo den mi guia y conseho. Di wak con awendia nan ta forma nan mes y ta sastisfecho cu tur nan logronan. Esaki ta duna mi estimulo pa sigui crece den en ramo aki.

Mi ta purba balansa mi trabou y mi bida personal door di tene nan separa for di otro. Mi ta stima mi trabou. Pero mi ta stima mi famia y amigonan tambe. Mi ta dedica tempo na mi famia y amigonan. Na mi opinion un balanse adecua ta haci bo un persona feliz. Un persona feliz tin menos stress y ta mas productivo. P’ami personalmente, e ta combinacion perfecto pa por haci tur locual mi ta gusta cu dedicacion completo.

Sinceramente mi ta di pensamento cu awe bo t'ey, mayan no ta sigur. Tur hende por dicidi pa nan mes na ki edad nan ta pone un limite. P'ami ta importante di por relaha mi mes cu mi famia y amigonan.

Mi famia y amigonan a inspirami haci esaki. Nos a organisa un surprise party pa mi ruman homber. Tabata nos prome evento. E comentarionan despues tabata asina positivo cu nos a dicidi pa sigui cu e tradicion. Asina Halloween/Hallowow a wordo organisa pa prome biaha na aña 2011.

E disfrasnan fantastico traha cu dedicacion. E tempo cu mi ta pasa cu hendenan creativo. E preparacion y decoracion. Persona nan cu ta bin nos evento semper ta ‘excited’ y nan feedback semper ta positivo.

E aña aki por ehempel nos a cuminsa trempan. Pero e 3 añanan den COVID nos no por a cuminsa asina trempan. Tur cos ta depende. E tema ta wordo dicidi hunto cu mi “partners in crime” y tambe cu e sponsorship. Mi tin un team cu hopi hende creativo cual den un evento asina ta bal mas!

13 aña pasa nos a cuminsa c’un crowd di apenas 100 hende. Nos ta awendia atende c’un publico di 600 hende. Mi outfit mi ta purba di keda semper den e tema di e evento. Por ehempel e aña aki e tema tabata “Calavera” y mi outfit a refleha esaki. Esaki tambe ta algo cu ta wordo dicidi hunto cu e team.

Tin hopi cu ta memorabel. Pero esun mas apart y memorabel lo ta esun di aña 2021. Nos a logra organisa un evento di 400 hende durante di COVID. Esaki nos a ‘make it happen thinking outside the box’. Nos a logra test 400 hende pa COVID, incluyendo tur hende cu a traha na e evento. Asina aki nos por a prueba cu tur hende ta negativo y nos evento por a bay door sin ningun preocupacion. E dia aki mi por a sinti con contento tur hende tabata di porfin por disfruta libremente despues di pasa un temporada cera na cas.

Ami ta hopi orguyoso di mi identidad y mi cultura. Celebra Halloween no ta afecta ami den ningun manera. E no ta cambia mi norma y balornan. P’ami e ta djis un fiesta mas unda cu nos por laga nos creatividad los. Tur hende mester por dicidi pa nan mes si nan kier celebr’e of no. Mi no ta kere cu e ta afecta nos identidad cultural mientras cu bo ta respeta bo mesun cultura. Semper mester tin espacio pa disfruta otro cultura tambe sin lubida esun di bo mesun.

Bo ta kere cu Halloween ta gradualmente integrando den cultura di Aruba y esaki ta algo bon of malo?

Definitivamente e ta integra den nos cultura caba. Ami no ta experenci'e como algo malo. Contrario, muchanan na scol semper ta super leuk bezig trahando kunstwerk pa Halloween. Famianan y amistad nan ta bin serca otro pa 'trick or treat' hunto. E ta un celebracion cu ta trece hende hunto. Ami ta kies pa wak solamente e banda positivo di e celebracion. Y mi ta ripara cu hopi hende actualmente na Aruba tambe te kies pa wak e banda positivo.

Con bo ta reacciona riba un otro punto di bista di algun persona cu tin e percepcion cu e celebracion di Halloween ta mas bien algo ‘diabolico’? Como un trahador social, bo ta sinti cu bo tin un responsabilidad pa trata cu nan preocupacionnan?

Como trahador social mi semper lo sinti e responsabilidad pa trata tur preocupacion di tur hende. Mi lo semper trata di scucha, atende y conseha sin husga.

Hobennan ta pasando den hopi stress pa tur sorto di motibonan, nan ta haya nan confronta cu hopi desafio. Sin ayudo of guia nan futuro por ta na peliger. Comunicacion ta e base principal. Purba semper di tene un mente habri cu bo yiunan. Teniendo un combersacion trankilo, atento y sin husga. Asina bo yiu por sintie scucha y ta su mes. Aunke no ta tur ora bo lo por ta di acuerdo cu bo yiunan, demostra nan si cu den cualkier circunstancia nan por conta cu bo! Abo ta e prome persona cu nan por yama!

Carnaval ta mi cultura! Mi a nace y crece den dje. Carnaval 70 mi lo participa atrobe despues di no a participa den Carnaval 69. Y mi ta looking forward to it. Carnaval ta un momento pa nos celebra nos cultura. Ta e momento cu nos artistanan local ta laga nan creatividad los den forma di musica , baile, trahenan y carosanan luhoso. Ta un momento pa nos laga los y disfruta. Naturalmente semper sano. E balance nos mester hay’e pa nos mes. Carnaval 70 mi lo ta forma parti di un grupo como organisado pero tambe como participante.

ENGLISH
TopBuilt with Shorthand