Su plan tabata pa bay Hulanda y continua cu su estudio y trabou riba e ramo di ley pero su destino a cambia ora el a haya un oferta di trabou pa bay traha cu Hugo Boss. Apesar di su edad hoben di 23 aña y motiva pa su atraccion pa ‘brands, Amit a accepta e reto. El a mira e propuesta aki como un oportunidad interesante cu awor a duna inicio na su propio compromiso den negoshi cu su tienda TILTED.
Amit a lanta den un famia cu ta sumamente activo den negoshi, pues no tin duda cu influencia y su formacion ta cuminsa eynan. “Semper a keda conecta cu mundo di moda, pa medio di mi famia pero tambe pa medio di mi experiencia di bida. Mi tata a inclui mi den negoshi for di un edad chikito, sea cu ta e simpel acto di saluda un persona te na reunion nan importante. El a laga mi observa tur cos cu e tabata haci y p'ami compronde tur cos cu e tabata haci y pakico e tabata haci nan. Disciplina ta hunga un papel importante, y si bo kier logra exito, sacrificio tambe ta parti di dje. Un les specifico cu a keda cu mi a keda graba cune ta haci negoshi honesto. Haci negoshi honesto y lo ser recompensa!
C’un aire di orguyo, Amit a splica e oiígen di e nomber 'Tilted' como un concepto naci for di humor y vision comparti cu su tata, creando un identidad di marca cu ta simbolisa un perspectiva unioa y un aspiracion pa excelencia.
“Mi tata cu mi, nos tin un manera di pensa un tiki diferente for di e resto. Cu tempo nos a afina e nificacion pa e ‘mindset’ di Tilted kiermen, un manera unico di mira bida y semper buscando lo mehor.” E logo - un letter 'T' diseña como un trapi - ta simbolisa e ascenso continuo y e ambicion di su marca. “Esaki ta indica cu nos semper lo subi!.”
E strategia pa mantene Tilted dilanti di e cambionan liher den moda ta basa riba un combinacion di vigilancia y colaboracion. “E marcanan cu nos ta scoge pa ofrece na Tilted mester pasa un prueba chikito prome cu nos considera traha cu nan. Prome nos kier sa ki impacto bo tin riba e mercado y kico ta e metanan largo plaso di e marca. Di dos ta e calidad, nos clientenan ta clientenan frecuente y semper contento cu loke nos ta bende nan, pa motibo di e productonan di calidad halto cu nos ta ofrece. Di tres ta e coleccion mes, ora bo wak den nos tienda por mira un variedad di color y diseño. Tur, bon coordina bon entre nan mes.”
Di otro banda, Amit su liderazgo y e input di su team hoben ta sigura cu e tienda ta semepr ‘on top’ cu e ultimo grito di moda.
“Ami ta funciona como cabes di Tilted Premium, sinembargo mi coleganan tambe ta hunga un papel importante den kico ta sosode den e tienda. Mi team ta consisti di hende hopi mas hoben cu mi, tur hende den mi team ta bou di 21 aña. Nan ta mantene nan mes actualisa riba kico ta sosode den mundo di moda y tambe e ultimo tendencianan. Mi lo ta un kens si mi no scucha di nan!
‘Nos enfoke ta mas riba e localnan, Nos ta orguyoso di ta un lugar local. Nos ta balora nos hendenan. Turistanan definitivamente por obtene un bon seleccion tambe ora nan bishita nos. Incluso e turistanan ta aprcsia e hecho cu nos por ofrece algo diferente compara cu e resto” Tilted ta un tienda cu ta refleha e rikesa cultural di Aruba, ofreciendo un experiencia de compra unico pa ambos publico.
Manera por pasa cu hopi comerciante, Amit no a scapa di retonan- el a enfrenta desafionan iípico di un mercado chikito y influencia fuertemente door di tendencianan externo. “ Tilted tabata un decision spontaneo. Asina cu tur cos tabata na e ultimo momento, sinembargo nos tin hopi suerte di tin hendenan maraviyoso cu a duna nos sosten durante henter e proceso. Un di e desafionan den e mercado di Aruba ta e influencia cu cultura Mericano tin riba e isla. Tambe den pañanan. Esaki ta motibo cu ta un curva diaprendisahe pa haci hende compronde e moda Europeo.
Si bo por cambia un aspecto di e panorama empresarial na Aruba pa beneficio di hende hoben cu kier cuminsa nan propio negoshi, kico e lo ta?
“Definitivamente ta pa haci mas facil pa prepara rekisitonan legal. Hopi hoben empresario no sa tocante tur papel nan legal cu ta necesario. Esaki por causa nan problemanan innecesario den futuro cu nan compania.”
Corda semper ta humilde y ta agradecido. Nunca asumi cu bo ta miho cu otro hende. Awe por ta bo dia, pero sin e sosten di bo hendenan por bo cai di un dia pa otro. Difundi amor y semper yuda si por, loke bo duna semper ta bolbe dobel como bendicion. Mi no ta perfecto como persona, pero semper mi ta haci un esfuerso pa logra e mihor version di mi mes.
Amit su mirada pa futuro ta uno yen di esperanza y ambicion; Tilted pronto lo expande den e area di moda pa hende muhe tambe. Keda pendiente! Pa largo plaso mi kier haci Tilted un tienda franchise den henter Caribe unda hende ta sigur di yega y haya calidad!
“Bida ta cambia di manera inespera. Den mi caso, mi a termina scol di ley y tabatin un bon oferta di trabou, 2 siman despues mi a dicidi di keda Aruba y habri mi negoshi. Si bo ta kere 100% den bo vision, no laga cu ningun hende descurasha bo. Mi mayornan tin 20 aña di experiencia den e negoshi. Sinembargo, mi a haci hopi cos diferente compara cu nan. Na final, ainda esaki ta funciona. Haya bo propio caminda y mustra tur hende cu loke bo a imagina lo duna resultado! Haci e sacrificio, dun’e tempo extra awor. Bo por cosecha e beneficionan den futuro. No tur hende tin e vision, pero si abo tin e vision, confia den bo mes y NO desperdicia esaki! Den e periodo aki bo ta un spons, bo tin hopi pa siña asina cu tur cos cu hende ta siña bo y informa bo, absorbe tur cos manera un spons y uza esaki pa avansa.
Corda semper ta humilde y ta agradecido. Nunca asumi cu bo ta mihor cu otro hende. Awe por ta bo dia, pero sin e sosten di bo hendenan por bo cay di un dia pa otro. Difundi amor y semper yuda si por, loke bo duna semper ta bolbe dobel como bendicion. Mi no ta perfecto como persona, pero semper mi ta haci un esfuerso pa logra e mihor version di mi mes.
Built with Shorthand