Tin cosnan cu ta simplemente sinonimo cu Aruba. Un di nan ta, sin duda, ta awa di lamunchi. Pa hopi Arubiano, un palo di lamunchi tabata casi un mata cu mester tin patras den cura. Nos a crece mirando nos mama, wela of tanta corta un par di lamunchi fresco pa prepara un canica friu di awa di lamunchi. E solucion perfecto contra e calor di solo, un bebida natural cu tabata forma parti di nos bida di tur dia y nos cultura.
P'esey, e concepto di Mi Lamunchi ta sinti casi natural. Pero tras di e concepto ey tin un storia di observacion, creatividad y amor pa un estilo di bida mas natural.
Tur cos a cuminsa aña pasa na 2025, ora Kinsasha cu su dos yiunan Celine y Ashlynne a percura cu, apesar di purba diferente lemonade na diferente lugar rond Aruba, ningun no tabata realmente loke nan tabata busca.
C’un deseo pa ofrece un alternativa realmente natural y saludabel, Mi Lamunchi a habri su portanan c’un filosofia cla: refresco mester ta fresco di berdad, prepara cu fruta natural y sin ingredientenan cu bo no por pronuncia.
Na november di 2025, Mi Lamunchi a nace c’un mision cla: ofrece un alternativa natural, fresco y honesto. Tur stropinan di fruta ta prepara na cas cu fruta fresco, sin colorante artificial, sin sabor artificial y sin preservativonan. E lista di ingrediente ta intencionalmente cortico.
Pero Mi Lamunchi no kier solamente sirbi un glas di limonada. Nan kier cambia e manera cu hende ta mira un bebida refrescante.
Nan ta demostra c’un bebida saludabel no mester ta laf. Ademas di e clasico awa di lamunchi, nan a crea combinacionnan unico cu ingredientenan manera mint, moringa y ginger, y tambe sabornan basa riba flor, manera Flor di Jamaica y Tontonchi la Reina (Butterfly Pea).
Loke ta haci e concepto ainda mas special ta cu hopi di e ingredientenan aki ta cultiva, cosecha y cuida door di e fundadora mes.
Pero Mi Lamunchi ta bay hopi mas leu cu solamente lemonade. Cu e mesun filosofia di sostenibilidad y produccion natural y asina Mi Lamunchi a sigui amplia su oferta. Na nan stand, clientenan por cumpra webo fresco di galiñanan cria na cas, fruta y berdura fresco proveniente di nan propio cosecha y di otro cultivadornan local. Nan tambe ta ofrece te prepara cu yerbanan y flornan cultiva y seca dor di nan mes.
Pero talvez un di e aspectonan mas bunita di Mi Lamunchi ta e deseo sincero di comparti conocemento. P'esey regularmente nan ta intercambia simianan cu personanan cu ta interesa den plantamento, promoviendo cultivacion local y inspirando otro pa conecta cu naturalesa.
Actualmente e ekipo ta desaroyando diferente proyectonan nobo cu pronto lo amplia ainda mas e experiencia cu Mi Lamunchi ta ofrece.
Loke a cuminsa como un iniciativa entre un mama y su dos yiu muhernan, pronto a supera tur expectativa. E demanda a crece tanto cu e famia a tuma un decision natural: incorpora un otro miembro di famia.
Nan a "franchise" e concepto pa su ruman muher Kyley Arzola- van der Bliek , kende awor tambe ta opera Mi Lamunchi pa atende clientenan den area di Noord, permitiendo cu mas hende por disfruta di e mesun calidad, e mesun filosofia y e mesun servicio personal.
Mi Lamunchi awor tambe tin un division special dedica na celebracionnan: Mi Lamunchi Events & Celebrations.
Cu nan lemonade cart elegante y un set-up completamente personalisa, nan ta brinda servicio na cumpleaños, bridal showers, baby showers, gender reveals, eventonan priva y eventonan publico, convirtiendo un simple bebida den un experiencia visual y gastronomico cu ta duna cada celebracion un toke fresco y original.
Un storia di un famia cu no a conforma cu loke tabata existi. Cu a scoge pa crea un producto cu nan mes tabata desea haya den mercado. Cu a pone salud, autenticidad, calidad y creatividad dilanti di facilidad. Y talvez precisamente ey ta e ingrediente secreto di nan exito. No solamente e sabor di e lamunchi. Sino e pasion, e dedicacion y e amor cu ta bin den cada fruta cu ta wordo corta, cada flor cu ta wordo cultiva y cada bebida cu ta wordo sirbi.
Built with Shorthand