Zilha Bruin-Wever y Queeny Bergen ta amiganan pa mas cu dos decada caba. Durante e tempo aki nan a pasa hopi hunto: aparte di comparti tempo cu otro como amiga, nan a organisa tambe fiesta, cena, fundraiser y hasta ta co fundador di e tremendo plataforma di WOW Aruba (Women empOwering Women) banda di otro muhernan di gran inspiracion na Aruba. For di tur esakinan, un cos a bira cla: nan amistad no ta solamente personal, sino tambe un plataforma pa crea eventonan di impacto, cu tin sentido pa nos comunidad.
Zilha Bruin-Wever y Queeny Bergen
Zilha Bruin-Wever y Queeny Bergen
Mientras hopi hende tabata sinti duda y miedo durante e tempo fragil y critico di pandemia, Zilha y Queeny a mira un oportunidad. Nan a transforma un edificio bieu den Caya Principal como nan cede y cu sosten di Qredits, nan a comberti esaki den un espacio moderno, vibrante y di multi uso: Piso 3 Workcenter. Un lugar di trabou, di inspiracion y di evento cu ta memorabel. Cu guia di nan coach Mingly Maduro, nan a descubri nan pasion di mas grandi: crea eventonan cu ta inspira, uni hende y forma un comunidad.
Awe, Zilha y Queeny ta e forsa tras eventonan cu ta capta atencion y interes serca varios grupo cu ta forma e comunidad di Aruba.
Eventonan cu nan a organisa exitosamente ta entre otro:
- Mind Matters
- Happy Parents
- Dare to be Brave
- Y e mas recientemente Primero Yo, e prome conferencia motivacional grandi na Spaño.
Nan ta mustra cu ora pasion, vision y disciplina ta uni, cos grandi por bira realidad.
Mientras un tin un talento natural pa marketing, e otro un wowo creativo pa diseño. Hunto nan a logra balansa nan forsa cu ta pone tur evento na un nivel mas halto, cada vez. Nan ta compronde kico hende ta desea: no solamente un actividad, sino un experiencia cu ta keda den curason y ta motiva crecemento.
Tras di tur evento, nan tin un secreto: nan ekipo. Tur proyecto ta carga cu energia di boluntarionan y hoben nan profesional, apesar di nan mesun ‘busy life’, semper nan ta cla pa yuda y contribui. E exito di un evento ta bin den varios rol; esun di e organisador, boluntario, participante, tur hunto, ta haci e vision bira un realidad.
Built with Shorthand