E inicio di Xenia den marketing no tabata uno tradicional. Ya cu 16 aña, sin ningun experiencia formal ainda, el a cuminsa yuda su mama pa atrae mas clientenan pa su negoshi y hopi liher, el a descubri cu marketing tabata su yabi. Sin estudio riba esaki ainda y sin un plan pre-estableci, el a gradualmente siña riba su mes, explorando plataforma nan nobo y dominando Photoshop, Lightroom y software di edicion di video.
Xenia Hirschfeld
Xenia Hirschfeld
Eventualmente, el a dicidi pa studia esaki mas tumando un curso di marketing di Boston University pa siña e base y strategianan di e mundo digital. No a dura mucho cu su talento a keda nota pa companianan y asina su evolucion a cuminsa haya su caminda.
E breakthrough a yega ora el a haya un internship den social media marketing c’un boutique local. Despues di esaki, su network y experienca a habri porta den real estate marketing, caminda el a traha pa franchisenan di Merca. Awor, cu mas di 10 aña di experiencia, Xenia ta un power house riba su mes den marketing digital na Aruba y esaki ta su storia…
Xenia Hirschfeld
Xenia Hirschfeld
Despues di hopi aña den marketing corporativo, 2024 tabata un aña decisivo p’e. El a tuma e paso grandi pa bay riba su mes lansando su mesun marketing company. E cambio aki a duna su libertad y tambe e oportunidad pa traha riba su propio condicion nan. "E cambio tabata necesario. Mi ta kere cu creatividad no mester ta limita na un trabou di ‘9 to 5’ sinta den oficina. Awor, mi por crea contenido e ora y caminda cu ta funciona mihor p’ami," e ta bisa. Pero e hecho di ta bo mesun hefe, tin su desafionan y pa Xenia, un di nan ta maneha clientenan den un manera strategico.
"Mi regla ta cla: mi ta traha solamente cu clientenan cu tin energia positivo. Despues di hopi aña den mundo corporativo, mi a dicidi cu mi kier traha den un ambiente cu ta agradabel y di inspiracion."
Na Aruba, real estate marketing ta un niche cu poco hende ta domina. Pero pa Xenia, esey ta loke ta dun’e un ventaha competitivo cu su mas di 6 aña di experiencia den e ramo aki. "Real estate marketing ta diferente. E no ta solamente bende un cas, e ta un di e inversionnan mas grandi c’un hende lo haci den su bida. P’esey, e marketing mester ta personalisa y traha cu estrategia," e ta splica. El a siña con e sector ta opera, kico ta e tacticanan cu ta traha y con real estate marketing ta diferente di otro tipo di negoshi. Su enfok’e strategico ta reconoci pa clientenan cu ta busca no solamente un bendedo, pero un experto cu ta genera ‘leads’ y impacta cu resultadonan real.
Tur cos por parce facil te ora bo mes purba. Hopi negoshi nan ta sinti cu nan por maneha nan mesun marketing, pero segun Xenia, esaki ta un idea cu por bin cu hopi reto. "Den teoria, si, pero…
“Tur persona cu tin un telefon of un computer por crea contenido. Pero e pregunta ta: e lo e ta realmente atractivo, bon ‘brandea’ y capas di genera ‘leads’? Esey ta otro storia,"
P’e, e gran diferencia ta na tiempo, estrategia y creatividad. Haci un post di 10 minuto no ta suficiente. Un video pa TikTok por tuma un 4 ora di edicion, y si e contenido ta mas compleho, esaki por tuma 12 pa 24 ora di trabou.
"E realidad ta cu marketing bon haci mester tin estrategia, consistensia y un storytelling. Y aparte di esaki, social media ta cambia constantemente. Si bo no ta activo den e mundo digital, bo ta perde riba e cambio di algoritmo y tendencianan." Un dia Instagram ta duna prioridad na Reels, otro dia na Carousels. Hashtagnan tabata esencial prome, pero ya awor e long-form text ta e prioridad. Si bo no ta constantemente activo den e mundo digital, bo ta atrasa hopi liher. Esaki ta caminda haya un experto di marketing ta haci diferencia. No ta solamente crea contenido, pero ta anticipa cambio, adapta na e tendencia nobo y mantene bo brand den e spotlight.
"Contrario cu otro paisnan caminda negoshinan ta priorisa un website, na Aruba si bo no tin un Facebook page, bo negoshi basicamente no ta existi," Xenia ta bisa. Pero un nobo revolucion digital ta surgi—TikTok ta tuma mas tereno, y Xenia ta mira un potencial masivo pa negoshinan cu ta dispuesto pa drenta den e plataforma. Na lugar di busca riba Google, mayoria di Arubianonan ta uza Facebook como nan ‘search engine’ pa negoshinan, servicio y recomendacionnan. Pero den e ultimonan aña, TikTok a tuma hopi tereno, y hopi mas hende ta bay riba e plataforma aki.
Aruba no tin hopi dato detaya riba e consumo di social media p’esey clientenan ta depende hopi riba experiencia y intuicion pa maneha e tendencia nan nobo. Esaki ta un oportunidad masivo pa negoshinan, pasobra TikTok ta duna un ‘reach’ organico inigualabel y ta wordo uza cada bes mas como un plataforma di buskeda pero e ta tuma hopi mas tempo pa post un cos compara cu riba Facebook, Instagram of LinkedIn. Como resultado, TikTok ta keda un mercado sin explora na Aruba, pero negoshinan cu ta dispuesto pa pone e esfuerso por logra un coneccion fuerte c’un audiencia nobo.
Un error comun cu hopi negoshinan ta haci ta uza mesun tipo di contenido pa tur plataforma. Pero pa Xenia, tur red social tin su propio audiencia y estilo di comunicacion.
"Gen Z kier contenido real, atrevido y sincero. Mayornan ta gusta mas informacion mas curado y profesional. Loke ta traha pa TikTok, no ta mesun cos cu lo traha pa LinkedIn," e ta splica.
P’e, e clave ta conoci bo target group y adapta e contenido pa su necesidadnan.
"Si bo conoce bo audiencia, lo bo sa exactamente con pa adapta bo mensahe pa cada plataforma. Contenido interactivo y cortico ta traha bon riba TikTok, mientras un estilo mas profesional ta mas fuerte pa LinkedIn."
Na cuminsamento di cada luna, mi ta dedica un dia completo pa brainstorm y plan mi contenido pa e luna cu ta bin. Mi ta crea un calendario di contenido mensual, pasobra tur mi clientenan tin obhetivonan diferente y tin mester di contenido diferente. E calendario aki ta sirbi como un guia pa mantene tur cos organisa y riba ruta, pero claro, e plan por cambia. Un luna ta hopi tempo, y si un cliente ta manda informacion nobo of si algun situacion urgente ta surgi, mi ta adapta e contenido pa sigui cu e cambio.
Den e proceso di planificacion di Xenia, e ta sigui 4 pilar basico pa contenido:
📌 Educa – Pa duna informacion balioso
📌 Involucra – Pa aumenta interaccion cu audiencia
📌 Entretene – Pa mantene e contenido interesante y atractivo
📌 Empodera – Pa motiva y duna inspiracion
“E pilar nan aki ta guia mi manera di crea contenido, p’asina tur post ta agrega balor, ta conecta cu e audiencia y ta ahusta na e meta di e brand-marca. Si, por ehempel, un contenido tabata planea pa entretene, pero mi a haña informacion cu por educa of empodera e audiencia, mi ta ahusta esaki mesora p’asina e contenido ta keda efectivo y relevante." Hopi biaha, cosnan ta cambia riba ultimo momento, pero tin un plan di contenido di antemano ta esencial pa keda organisa y sigur cu e fluho di contenido ta consistente y strategico.
Un di e erornan mas comun ta cu negoshinan ta enfoca demasiado riba number di followers. Pero segun Xenia, engagement ta mas crucial. “Mi ta enfoca riba engagement organico.”
Pa su clientenan, e ta priorisa interaccion real.
"Marketing ta trata riba crea confiansa y interes den bo brand. Esaki no ta algo cu bo por logra den un dia. E ta un proceso di pasenshi consistensia y autenticidad."
Pa esnan cu soña di un carera den social media marketing, Xenia ta duna e siguiente conseho:
"Siña e base di marketing, siña con social media ta traha y no stop di siña. Tambe bo mester ta cla pa adapta liher. Social media ta cambia constantemente p’esey e ta importante pa bo keda al dia cu e ultimo tendencia, tools y algoritmo. Pero mas importante ainda ta desaroya un conocemento profundo di strategia—pasobra creatividad y pos contenido ta solamente un parti di e educacion. Bo mester sa con bo contenido ta conecta cu e meta di e marca y su target audience."
Built with Shorthand