Na 2008 Will Mora (42) a pone pia pa prome vez na Aruba, aunke serca di su pais natal Venezuela, toch Aruba tabata un isla straño p’e. Nunca el a yega di bishita prome. Danki na su talento como un sushi chef a haci cu Will a haya e oportunidad unico pa bin traha na Aruba. Pasando dor di algun aña yen di triunfo y hasta desafionan, awe, 15 aña despues, Will no solamente a adapta na su hogar nobo, pero tambe a sobresali como un empresario cu su propio restaurantnan. Un trayecto di aprendisahe cu a forma e Will Mora cu nos conoce awe y bale la pena, pa comparti.
Realmente, Will no a cuminsa su carera den mundo culinario como un chef; tabata su humildad y dedicacion a duna e e oportunidad unico aki. Lanta den un famia campesino humilde, Will a yega Caracas pa conoce bida di ciudad. Na Caracas, cu 16 aña, e tabata traha como un empakador den un supermercado. Un dia, doño di un restaurant di sushi a gusta su forma di traha asina hopi cu el a puntr'é pa traha p’e como empakador den su restaurant y asina, Will a keda introduci na e mundo culinario, cu lo bira su destino.
Cu guia y entrenamento, el a desaroya su abilidadnan te na e punto cu el a bira sous chef y despues a sigui studia arte culinario pa dos aña mas. Aunque el a gradua den arte culinario, Will a compronde hopi liher cu e titulo di 'chef' bo no ta hay’e na un scol, e ta algo cu mester wordo gana den ramo di trabou. Y asina, c’un titulo fresco y cu hopi ambishon, el a tuma contacto c’un amigo cu tabata biba na Aruba. Esaki a resulta den un oferta di trabou como sushi chef principal na un restaurant nobo yama Gari Wasabi. Will a accepta e reto y cu su aporte, e restaurant aki a bira un di e mihornan na Aruba.
Despues di su exito na Gari Wasabi, Will a sinti e necesidad pa progresa den su carera y sigui riba su mes. El a cuminsa bende sushi for di su cas y no a dura mucho cu el a habri su propio restaurant, 'Nikkei', hunto c’un partner local. Ademas, el a colabora na establecemento di Dragonfly pa e grupo Wine and Dine tambe. Apesar di e crecemento rapido di e restaurantnan Nikkei, a surgi algun problemanan cu su socio local. “E situacion no tabata bon mas, practicamente nan tabata kier tuma ventaha di mi. Na final, e relacion no a caba bon y mi a dicidi pa retira mi mes for di e logistica, pues pa no ta e chef di mi propio restaurant mas y pa distancia mi mes. Di e forma aki mi a cuminsa cu mi propio negoshinan, aunke te awe, ainda mi ta accionista di e cadena di restaurantanan aki, cu ami a habri.”
Despues di e experiencia fastioso cu Nikkei, Will a opta pa enfoka su energia riba e lansamento di 'Continental by Will Mora'. Combinando su pasion pa cushina c’un determinashon renoba, 'Continental' a bira un restaurant cu ta refleha su vision di berdad. Awor, Will a agrega un otro restaurant di un concepto completamente diferente; 'Bokas’; un coffee gastrobar. 'Continental' ta sirbi cuminda durante anochi y 'Bokas' den oranan di mainta. “Na Continental, e plato favorito di hopi ta e banana rol mientras cu na Bokas, ta e pabellon criollo. E arepanan ta algo di mi pais cu ta hacimi sinti orguyoso di por comparti cu mi clientenan.”
Refleccionando riba su experencia, Will ta conseha futuro empresarionan: "Na cualkier lugar di mundo, semper ta amabel, respeta bo mes y e otronan. E cariño genuino pa hende lo habri hopi porta p’abo". El a siña cu na Aruba, ta escencial pa colabora c’un local pero bo mester ta extra cuidadoso ora di scoge partner nan comercial. "Confiansa ta fundamental, pero tambe ta importante pa proteha bo mes y bo vision", Will ta adverti. E experiencia cu Nikkei a siña Will hopi. El a comprende cu como inmigrante, bo ta enfrenta desafionan adicional.
No solamente bo mester comprende un mercado nobo, pero tambe un cultura y sistema legal diferente. Ademas, e importancia di colabora cu localnan y di compronde e mercado, ta loke a resulta esencial awe, pa su exito. Aunka e no a nace na Aruba, Will ta sinti cu tanto e mes como su negoshinan ta genuinamente Arubiano ya cu nan a surgi y crese, inspira pa e cultura y caracter di Aruba.
Durante 15 aña na Aruba, aunke e tabata un mal experiencia, Will ta bisa di a experencia e calor y generosidad di e Arubianonan tambe. "Aruba ta mas c’un cas p’ami; e ta un inspirashon constante", e ta bisa. Su compromiso cu e comunidad ta evidente, no solamente pa medio di e restaurantnan cu el a establese, sino tambe den su esfuerso pa siña Papiamento. Aunke e no ta papia perfectamente, e ta balora e importancia di integra. "Papia Papiamento ta un manera di brasa e cultura di Aruba completamente", e ta afirma.” E dedicashon aki ta aprecia pa e localnan, fortificando e coneccion entre Will y Aruba.
Mi ta duna danki na Dios na prome luga paso sin Dios nos dilanti, e soño aki no lo por a bira un realidad. Mi por bisa cu cada sacrificio, cada momento tabata ‘worth it’. Awendia mi ta e persona cu mi ta, danki na siña di tur e lesnan di pasado.”
Will ta sinti cu e ta ainda den e proceso, yegando na solamente 20% di loke e ta aspira pa logra na Aruba. Cu fe den Dios, e ta busca pa sigui contribui na e isla, empleando mas hende y ta duna danki na cada dia di bida paso ta esaki ta permit’e sigui cu su mision.
Built with Shorthand