Di chikito mi ta corda con e tabata gritami, "mi no mester a paribo". Nada cu mi tabata haci tabata bon, paso sla ta cai. Danki na Dios cu famianan a realisa kico tabata pasando y a kita mi for di dije pa bai biba cu nan. E mes, nunca a haci un esfuerso pa mi bai biba serca dje bek tampoco. El a sigui cu su bida normal y ora di hunga 'rol di mama' so, e tabata t’ey pa saca potret.

Durante mi bida no tabatin un momento cu mi por bisa mi a pasa bon cune. Semper tur cos mester a draai rond di dje of p’e ta e victima. Awor na grandi mi ta compronde cu bo ta yama esey un persona ‘Narcisista’. Ehempel nan cu mi por duna. Dia mi a ricibi, mi tabata malo cu keintura. Asina mes mi mester a bisti paña bunita y bai fiesta. Paso el a gasta hopi placa pa e fiesta y mi mester a bai.

Dia mi a slaag, el a haci drama paso su pareha, cu no ta mi tata, tambe mester haya ticket pa bai mi graduacion. Dia mi a cobra mi prome salario el a pidimi si mi por dun’e placa pa e paga su cosnan atrasa. Ora mi a haya pareha, e tabata bisa mi pareha pa e aleha di mi pasobra mi ta drumi rond. E ta yama amistad nan papia yen di cos di mi y despues mi ta perde amistad sin sa ta dicon. Dia di mi boda, tur hende mester a keda warda paso el a yega laat y nos no por a cuminsa. Segun e, cu e hairstyle cu mi a paga pa nan a haci p’e no a ked’e bon y e mester a dreche, p’esey el a yega laat. Y hopi cosnan cu e ta papia rond di mi, manera cu mi ta droga, cual p’ami ta o.k. paso mi sa cu no ta berdad.

Mi tin hopi aña cumi a ‘cut e off’ di mi bida. Mi a block e di tur manera cu por tin. Y letterlijk, mi no sa di dije y mi no ta interesa tampoco.

"Tur ora cu wak un anciano bandona, mes ora hopi ta puntra unda e famia ta? Algun ta cuminsa husga e famia pero no sa mes ki bida e persona ey a duna su famia, pasobra tur hende cu trata nan yiu bon, tur lo wordo bon trata bon bek pa nan yiunan."

Cu mi storia mi no kier p’abo ta di acuerdo cu mi decision di block esun cu a parimi di mi bida, pero pa bo realisa cu no tur hende tin un bon mama.
Y stop di keda bisa, “pero ta bo mama e ta”. No ta tur hende tabatin un bon mama y por pordona loke nan a pasa aden.

Si abo ta pasando den algo asina c’un mama cu no ta tratabo bon, e ta OK pabo ‘cut her off’. Mask’e cu otro lo huzgabo of papia riba ‘bo, e ta o.k. paso na final di dia, t’abo so sa kico bo a pasa aden y ki balor bo paz mental tin.

Si abo ta un mama, stima bo yiunan, trata nan cu amor y cu comprenshon y pasenshi pa asina nan por keda cu e amor p’abo tambe.

Anonimo