Con ta pa maneha un empresa familiar sin perde union?

Despues di 12 aña trahando hunto como famia, nos a siña aprecia cu e bendicion di traha bou guia di nos mama Diana ta un regalo. Cada uno di nos ta trece un don diferente na mesa, y nos ta confia den e talento cu Dios a duna nos. Nos tin respet pa otro y un mision comun: yuda y inspira. Nos ta diferente, pero nos balor ta igual. E amor, pasenshi y perdon mutuo ta mantene nos den armonia, hasta den momentonan dificil. Y si, como rumanan, nos ta sostene otro, hasta den dia menos bon.

Kico cada un di boso a siña di boso mama Diana?

Valentina:
 Mi mama ta un muher poderoso cu hopi sabiduria. E ta inspira nos pa wak e mundo diferente, semper briya un lus positivo den cualiere situacion y trece e mihor for di tur hende rond di dje,sea den negoshi, famia of bida. E ta un fuente di amor, seguridad y inspiracion. P’ami, e ta mi psicologo personal, su conseho ta profundo y ta pone mi na mi lugar. E no ta solamente e curason di VADAVAS, sino tambe di nos famia henter.

Daniela: 
Mi mama a siña mi cu bida ta un regalo precioso y cu bo mes ta pinta bo realidad. Cada situacion tin dos manera pa wak e y nos mester lucha pa wak’e for di e perspectiva positivo. E ta cana tur dia cu fe, speransa y gratitud. E ta enfoka riba e bendicionnan y ta traha cu e actitud cu algo milagroso por pasa cualkier momento. Su energia ta contagioso y ta bisa na e mundo; “Bida ta bunita y un bendicion!” E ta animami pa sigui mi destino cu gozo, sin perde mi mes den ningun temporada.

Valeria:
 Como emprendedora, mi mama a siña mi pa gosa di e caminda, no solamente e meta. Mi a siña pa no haci tur cos mi so, si no confia mas den nos ekipo. E ta delega cu sabiduria, mi ta siña cu humildad ta duna otro e espacio pa yuda bo logra bo meta. Lo mi nunca lubida su fe firme den Dios. E ta kere cu cualkier persona of situacion por cambia, y e ta kere den proposito den tur cos. P’esey, e ta sigui y biba su dia cu paz y felicidad. E no tin prijs. E ta semper habri pa para y papia cu ken mester di dje. Si mi por describi mi mama den un palabra: ‘Believer’. E ta kere den Dios, den su palabra, y den poder di un sonrisa. Y esey mi lo stima semper.

Sebastian:
 Mi mama ta e definicion real di un mama bon. E ta mustra cu amor di berdad ta sacrificio: pone e necesidad di otro prome cu esun di bo mes. Esaki ta loke mi admira den dje y loke mi kier siña aplica den mi mes. Su forma di lidera ta inspira: tin un vision cla, traha bo plan, y confia den e proceso.

Kico ta e rol di cada un den VADAVAS?

Valentina ta e curason y alma di VADAVAS. E ta cuida di e ambiente humano den e team, duna apoyo emocional, mantene union, y ta sigura cu tur miembro di e grupo ta sinti nan mes balora y comprondi. Su energia ta esun cu ta mantene e cultura laboral vibrante y yena di amor.

Daniela ta e mente creativo cu ta lider den diseño di coleccionnan di VADAVAS. E ta profundamente conecta cu e mamanan cu ta traha e pieza nan y ta pone hopi cariño den e aspecto humano di e marca. E ta cuida di e ‘branding’ tambe, pa sigur cu tur cos ta alinea cu e mensahe di eleva otro y celebra famia y amistad.

Valeria tambe ta hopi creativo, pero ta distingui su mes den manera detayista. E ta encarga di finansa y di desaroyo di producto. Su pasion pa precision y su rol den diseño y marketing ta esencial pa mantene e calidad y imagen di VADAVAS.

Sebastian ta e man di negoshi di e team. E ta experto den haci dealnan y desaroya relacion nan empresarial. E ta pensa den strategia y ta contribui den un manera cu hopi sentido y respet.

Con ta traha cu mamanan soltero na Aruba y Colombia?

E proceso ta simpel: un mama por registra via red social, email of den un di nos localidadnan. E ta pasa un entrevista pa evalua su situacion y necesidad; nan situacion actual di trabou, si nan ta mama soltero, casa of biba cu un partner, cuanto yiu nan tin y kico ta nan edad. E preguntanan aki ta yuda nos pa haya un imagen cla di e situacion personal di cada mama. Nos ta warda e informacion den nos record pa compronde ken tin mas necesidad. Pa nos, e yiu ta semper prioridad, y e bista general aki ta yuda nos pa duna apoyo den e manera mas impactante. Dos biaha pa siman e mama ta haya material y entrega su trabou, huntu cu pago. E sistema ta diseña pa respeta nan dignidad y tempo. VADAVAS ta un oportunidad ideal pa un di dos ingreso pa mamanan cu kier traha for di cas. E ta eficiente den tempo y gasto

Con e experiencia cu VADAVAS a cambia boso como muhe y futuro mama?

Daniela: Mi ta kere e echo di por ta mama ta mas c’un trabou, e ta un yamado celestial. Ora un mama ta realisa cu su yiu ta un tesoro celestial cu Dios a confia na dje pa guie pa bira ken e tabata destina pa ta den bida, esey ta un poder grandi.

Trahando na VADAVAS a mustra mi con bunita e ta pa por ta un mama y con poderoso e ta ora shelo ta confiabo pa cria un ser humano.
Como muher, mi a siña cu nos tin un gran influencia. Ora nos papia,nos palabra tin poder. Tur loke nos traha tin efecto, y dobel tambe. Esaki ta e motibo cu nos mester yena nos mes cu sabiduria y warda nos curason, pasobra tur palabra y accion tin repercusion riba nos famia, ser keri y e mundo rond di nos.

Mi ta stima e vershon aki di Biblia:


"Un muhe sabi ta traha su cas, pero un muhe necio ta destrui su mes." — Proverbio 14:1

Como muhernan, nos ta yama pa traha, no pa destrui. Pa traha nos cas, nos amistadnan, nos trabou, y nos mes. E poder ey nos a ricibi y ta un gran bendicion, pero tambe un gran responsabilidad.

Valentina:
 Mi respet pa e rol di mama, y pa muhernan en general, a crece enormemente. E caminda aki a siña mi con importante e ta pa muhernan pa sostene otro. Ora muhernan yuda otro, algo realmente bunita ta pasa: nos ta bira mas fuerte, mas confia den nos mes, y mas uni.