Esaki ta un storia relata pa un mama orguyoso di su yiu homber di nomber Timothy (Titi) Eduard Dania. Un hoben cu a gradua e aña aki na 2023 den Arte Culinario durante un periodo di 4 aña yena di retonan di salud. Su mama Usha Arends a comparti e storia di su yiu pa motiva otro hobennan pa mira adversidadnan den bida cu curashi y forsa y pa keda kere den nan mes. Paso Timothy a haci precisamente esey. Esaki ta su storia…
2019 mester a bira un aña di capitulo nan positivo y nobo pa Timothy, (Titi). Cu su 19 aña, e tabata inscribi pa cuminsa studia un Arte Culinario na EPI. Su entusiasmo tabata grandi y e no por a warda. E tabata cla wardando e temporada di vakantie caba pa cuminsa su scol. Pero net na principio di e vakantie el a cuminsa sinti un molester na e banda drechi di su cachete. Su cara a cuminsa hincha y haci hopi dolor. E prome pensamento tabata cu kizas ta trata di problema cu su verstandskies. Su mama a haci un afspraak cu dentista pa e por a bay controla y esaki tabata e momento cu tur cos a cambia…
“Mi tabata na trabou y mi a haya yamada di e dentista puntrando si e por papia cumi un rato,” Timothy su mama Usha Arends ta conta. E diagnostico tabata cu Timothy tin un Ameloblastoma. Esaki ta un tumor (benigno pero sumamente agresivo) cu ta sali solamente na e mandibula y cu ta pasa den 0.92 hende entre cada miyon di hende. Timothy tabata un di e 0.92 persona nan aki. Tabata un momento dificil p’ami y mi famia," Titi ta bisa. Sinembargo, el a nenga di laga e situacion nobo aki kibr’e.
C’un determinacion solido, den cuestion di 1 siman, na lugar di cuminsa scol, Titi tabata den avion na caminda pa Bucaramanga pa su tratamento. Eynan e diagnostico a keda confirma. E mester a haci un operacion urgente pa saca e tumor for di su kaak, un proceso largo y doloroso cu a keda haci pa dos Kaakchirurg.
Un luna despues, Titi por a bolbe Aruba bek. Pero mientrastanto, scol a cuminsa caba. E tabata sa cu e tabata perdiendo les y aki el a pensa cu su soño di cuminsa studia Arte lo no keda cumpli.
Bek na Aruba, Titi a haya sosten y comprension for di EPI pa por a cuminsa scol. Su mama a informa e scol di e situacion di Titi for di prome cu el a bay Colombia caba paso e meta tabata pa sigura pa e no perde su soño pa studia Arte Culinario na EPI. Cu cooperacion di e directiva di e scol, aunke un poco mas laat cu su compañero nan di klas, Titi por a cuminsa cu su estudio culinario. Sinembargo, apenas un siman bek na Aruba, el a haya complicacion debi na e efectonan di antibiotica. E mester a drenta hospital atrobe, perdiendo mas dianan di scol.
Entre tur e adversidadnan aki, Titi no a entrega, el a sigui lucha. “Na ningun momento mi a pensa pa ‘give up”. El a logra pasa su prome aña escolar y tambe e di 2 aña. E tabata considera entre e mihornan di klas den cushina.
Poco poco Titi tabata mira su soño di gradua den Arte Culinario mas serca. Sinembargo, na final di su tercer y ultimo aña, el a haya un baño di awa friew ora cu el a keda informa cu como cu el a perde les nan y toets nan den su prome aña cu e tabata malo, e lo no por gradua. Despues di hopi bay y bin, el a dicidi di keda un aña mas na EPI pa haal in lesnan di e prome aña pero desafortunadamente, e retonanan no a caba ‘kinan.
“Mi kiersa cu e tumor a bin bek”, Titi a bisa su mama durante e vakantie grandi di 2022. Realmente el a cuminsa sinti e mesun sintomanan na su kaak cu e tabata sinti na 2019 desde cu e tabata na scol caba, pero no kier a bisa nada pa no bolbe interumpi su estudio. Control di dokter a confirma e sospecha, e tumor a bolbe sali. E biaha ‘ki, mirando cu el a pasa door den un operacion caba, e unico opcion cu a keda tabata pa haci un mandibulectomia.
Esaki kiermen cu mester a kita su kaak, pone metal di titanium y cubri esaki cu weso di su heup. Na Juli 2022, Timothy tabata atrobe den avion, e biaha aki, rumbo pa Hulanda pa su testnan cu a dura 1 luna. El a bolbe Aruba pa cuminsa scol un rato y na fin di Oktober, el mester a haci un siguiente viahe pa Hulanda atrobe pero awor pa haci e operacion. Un operacion cu dura casi 7 ora, pero cu a resulta den un exito completo. Aunque durante su recuperacion, el a haya un infeccion masha grandi, Titi no a keha ningun dia ni perde animo.” Hasta madruga cu nos mester a cana bay eerste hulp paso pus a cuminsa sali for di su herida na su garganta, Titi tabata cana y haci joke cu mi”, su mama ta conta.
Bek na Aruba, Titi a haal in tur loke e tabata falta p’asina el a finalmente gradua pa su Associate degree den Science of Culinary Arts. Su soño a bira realidad y su meta a keda logra. Apesar di tur loke el a pasa aden, un situacion tras di otro, nunca el a perde su bista y curason riba su meta. Asina el a logra.
Awe Titi ta line cook na Caya Restaurant, disfrutando di loke e ta gusta haci. E ta biba contento y preparando su mes pa su di tres viahe pa Hulanda pa reconstruccion di su mandibula p’ asina e por haya implante di djente. “Esaki ta un otro reto cu mi no tin ningun duda cu lo e completa cu exito manera tur otro”, su mama ta bisa. Despues di esaki, Titi ta cla pa un meta nobo cu el a pone pa su mes den e ramo di cushina; sigui cu su studio na Hoge School Den Haag otro aña.
Built with Shorthand