“No ta semper mi tabatin interes den politica, pero durante mi carera profesional mi a experencia diferente situacion loke a pone un chispa sende den mi. Mi ta convenci cu politica ta un instrumento pa cambio y pa desaroyo di nos hendenan y nos Pais. Na dado momento mi decepcion den e politica tradicional a yega un nivel cu mi no por a keda man cruza. Despues di a sinta y scucha tur partidonan na Aruba, mi a yega cas un anochi y mi a bisa mi casa Tamarah: ‘Mi ta bay lanta mi mes un partido’, su reaccion tabata: ‘bay drumi!’
Awe mi ta’ kinan, sirbiendo mi pais y purbando di trece cambio pa un politica unificador y innovativo, basa riba respet mutuo, dialogo y sin e necesidad pa degenera otro persona.”
“Den campaña, e comunidad lo scucha promesa y ideanan realistico pero tambe promesanan falso. P’esey semper mester test tur promesa. Djis puntra e politico cuanto su idea of su promesa lo costa y cu ki placa e ta bay paga pa esaki. Esun cu tin un contesta concreto riba e pregunta ey, lo tin menos diferencia entre su campaña y loke e por realisa den su maneho.
“Mi no por bisa kico ta e low- pero locual si mi por menciona ta cu e ministerio cu ta strobami di drumi ta e ministerio di Asuntonan di Adulto Mayor. E caso nan cu nos tin den nos comunidad ta simplemente, tristo, Y den e mesun rosea mi por bisa cu 1 di e ‘high’ ta pa logra e convenio nacional pa adulto mayor cu a ancra e compromiso amplio den comunidad pa traha pa y garantisa e bienestar di nos grandinan.
“Ta importante pa tur hende compronde cu Ministerio di Integridad no a bin pa reemplasa Ministerio di Husticia. Tur violacion di ley ta un falta di integridad, pero no ta tur falta di integridad ta violacion di ley. E ta violacion di norma y loke nos mester logra prome cu tur cos ta pa haci e normanan duidelijk. Pasobra loke p’ami ta un falta di integridad, kizas otro hende ta mira diferencia. E prome paso ta pa trece claridad. Alabes mi ta traha segun ley, y unda no tin ley, aplica mi compas moral.”
“Un cos sigur cu no ta negociabel p’ami ta cu Aruba ta un Estado di Derecho; ningun hende ta riba ley. Ley ta conta tambe pa inversionista nan. Ningun hende por pensa cu nan por troce ley a cambio di beneficio economico. Traha normal, traha den regla di ley tambe bo por trece beneficio economico. Cu naturalesa mester wordo respeta no ta nifica cu crecemento economico mester stop. Ta nifica solamente cu mester traha den harmonia cu naturalesa.
E diferencianan di opinion t’ey desde comienso, MEP y RAIZ ta dos diferente partido. Nos enfoke ta pa enbes di fiha riba e diferencianan, fiha riba e meta comun y unda tin diferencia ta anda cu esaki na forma profesional,democratico, den dialogo, cu argumentacion y sigur cu respet.”
“Nos hendenan ya caba ta compronde cu Aruba por ta mas eco-friendly y cu nos mester recudi nos carbon footprint. Loke tabata falta ta un Gobierno cu tambe ta refleha e deseo aki. E strategia clave ta pa mustra cu ehempel y resultado. Por ehempel den maneho di transporte nos ta pusha pa bay mas den direccion di vehiculo electrico, maneho di desperdicio nos ta promove pa reduci, reuza y recicla, E strategia pa un pais mas eco-friendly claro ta keda adaptacion den nos balor y normanan. Pa e motibo ey tambe nos a bin ta traha pa introduci Derecho di Naturalesa. Mi ta convenci cu Aruba su naturalesa merece mas y actualmente e concepto di ley ta den proceso di revision na Directie Wetgeving en Juridische Zaken. Mi tin cu bisa cu e sosten pa e introduccion ta ricibiendo reaccion positivo y di Hulanda tambe nos a ricibi bon comentario. “
Segun Arends Aruba a progresa for di manehonan antiguo di sushi y a cuminsa transforma e manera cu ta trata su desperdicio. E cambio ya a cuminsa y pa 2024 Aruba por spera resultadonan ainda mas impresionante.
“E sufrimento cu e dump di Parkietenbos a causa ta algo cu nos no mester lubida. E proyecto 'Trash 2 Cash' (T2C) a yuda pa identifica y evalua solucionnan, y cu esaki, a logra menos sushi na Seroe Teishi y a promove reciclahe y re-uso di materialnan. E campaña 'Limpi Limpi' a sigui, den colaboracion cu mas cu 10 partners, pa fomenta separacion di sushi. E slogan "Bo sushi, ta dibo e ta", ta resumi e mentalidad cu Aruba mester tin: sushi no ta un problema solamente pa gobierno, pero pa nos tur, y hunto nos mester traha pa soluciona e situacion.”
Minister Arends ta bisa cu debi na e crecemento turistico grandi post Status Aparte cu Aruba a conoce, a enfrenta retonan y a faya cu maneho di sushi likido y solido debi na esaki.
“Ami no ta bay perde den ‘analysis paralysis’. E minister ta bisa cu su plan ta pa pa actua y converti Aruba den un ehempel mundial. “Sero Teishi ta atende cu ‘bailing’ pues deramento di desperdicio. Esaki segun e hirarchia di desperdicio ta un stap mas halto cu ‘open dumping’ mane na dump di parkietenbos. Asina mes, e no ta e stap final y nos ta consider’e como uno temporal y transitorio. E vision ta pa yega un economia circular door di recicla, re-uza y re-duci. E ta importante pa compronde, cu mientras e infrastructura pa un economia circular, pa reciclahe ainda no ta na su luga debido ainda, ya caba nos tin suficiente solucion practico pa por a cera Dump di Parkietenbos, p’asina cuminsa e proceso di tapa esaki pa converti'e den un Parke Solar. Alabes lo planta matanan local, drecha e muraya y planta e matanan di mangel bek. Pa e comunidad, lo sigui cu educacion, por ehempel lo tin materialnan di les cu lo ser introduci den scolnan, como tambe campañan di concientisacion. E actividad di Baki den Bario cu ta enfoka netamente riba separacion lo continua den 2024.
XM: Dia 6 di December 2023, Huez den corte di LAR a revoka e permiso di operacion pa e incinerador na ex-Dump Parkietenbos. Sin e permiso aki, e incinerador no por opera. E decision aki ta un victoria pa e activista y abogada sra. Anouk Balentina, kende tabata lucha e caso aki desde 2020.
"Nos ta respeta e vonnis di huez. Mi lo percura pa tur hende tambe respeta e vonnis. Pa basta tempo caba nos ta trahando pa busca otro alternativa riba incinerator. Incinerator no ta cay bou di Serlimar y nunca tabata parti di e plan pa Serlimar tampoco."
XM: "Tin un fecha cu ta bay cuminsa drecha e RWZI di Bubali?
Ta conoci cu e budget cu pais Aruba a pone pa esaki no lo ta suficiente pa drecha y modernisa e planta struturalmente, con ta bay atende esaki den futuro? “E proposicion di ley pa privatisa e RWZI ta poni pa keda trata den Parlamento cuminsamento di aña. Den esaki lo instala un autoridad priva cu lo maneha e planta nobo. E financiamento netamente lo ser realisa door di introduci algo manera un ‘sustainability fee’ na airport cu ta ser paga door di e bishitante/turista.”
XM: Con ta bayendo cu Serlimar despues di su salida for di Surceance?
“Parti di e surseance ta cu Serlimar no por a paga ni su accountant. P’esey no tin jaarrekening. No ta stroba nos di tin un bista “inoficial” di loke ta pasando y c’un tiki experticio financiero esey ta tur loke nos tabata tin mester. Hopi hende no ta compronde den ki estado deplorabel e compania aki a haña su mes. E paso mas facil lo tabata pa sera e compania y cuminsa di nobo. Pero nos a scoge pa haci un ultimo intento cu awe mi por bisa cu e compania a keda rescata. E ta birando mihor tur dia. E trahadornan di Serlimar ta stima nan compania y c’un team profesional den Raad van Toezicht (RvT) y tambe den directie, nos por mustra cu cifra cu Serlimar ta birando mas fuerte tur dia.”
XM: Aruba su ‘gray population’ ta uno creciente y ta pidiendo atencion urgente. E no ta un secreto cu cuido di nos grandi nan a bira hopi caro na Aruba c’un lista di espera largo na e casnan di cuido cu ta cay bou di gobierno. Hopi famia no por carga cu e gastonan aki. Kico ta e plan di accion pa haci e cuido mas accesibel y digno pa nos ancianonan?
Tur e puntonan cu tin den e pregunta mes ta splica pakico mi a insisti cu Aruba mester di un ministerio dedica specificamente pa atende cu e 'gray population'. Aunke tabatin resistencia, nos a logra. Mientrastanto tin un Foro Nacional pa atende tur e puntonan aki hunto cu mi ministerio. Aki 3 luna nos lo revisa e prome resultadonan.
“ E logro di cual mi ta mas orguyoso ta e hecho cu tur e cuestion nan cu ta cai bou di mi carteranan, cu a keda neglisha pa aña nan, ta hayando e debido atencion y accion. Entre nan, e maneho di desperdicio, maneho pa bienestar di Naturalesa, y Asuntonan di Adultonan Mayor. Ora mi a scoge e carteranan aki mi a haci’e a base di e retonan cu nan ta representa. Mi a sinti un deber pa abordanan y awe mi por bisa cu tur ta canando den un direccion cu lo conoce mehoracion efectivo, sostenibel y duradero.
“Si mi wak bek 7 di december 2022 un potret di e situacion di Dump di Parkietenbos y un potret di 7 di december 2023, un aña despues, esaki p’ami sigur ta un logro di y pa nos comunidad.
Tin e mesun gana ainda pa politica cu a cuminsa cune?
“Mi ta keda kere den politica unificador y innovativo como instrumento pa logra desaroyo sostenibel y bienestar pa nos comunidad.
Built with Shorthand